ລັດຖະບານຊີ້ແຈງຕື່ມກ່ຽວກັບຜະລິດຕະພັນໄມ້ທີ່ອະນຸຍາດສົ່ງອອກ ແລະ ຫ້າມສົ່ງອອກ

          ໃນວັນທີ 11 ຕຸລານີ້, ທ່ານລັດຖະມົນຕີປະຈຳຫ້ອງວ່າການສຳນັກງານນາຍົກລັດຖະມົນຕີ ໂຄສົກລັດຖະບານ ຈະເລີນ ເຢຍປາວເຮີ, ໄດ້ອອກມາຊີ້ແຈງຕື່ມກ່ຽວກັບກໍລະນີຜະລິດຕະພັນໄມ້ທີ່ລັດຖະບານອະນຸຍາດໃຫ້ສົ່ງອອກ ແລະ ຫ້າມສົ່ງອອກຕໍ່ສື່ມວນຊົນ, ພາຍຫລັງກະຊວງອຸດສາຫະກຳ ແລະ ການຄ້າ ໄດ້ສຳເລັດການກຳນົດ ຢ່າງລະອຽດຈະແຈ້ງກ່ຽວກັບມາດຕະຖານ, ລະດັບຂະໜາດ ແລະ ຮູບແບບຂອງຜະລິດຕະພັນໄມ້ແຕ່ລະປະເພດທີ່ອະນຸຍາດໃຫ້ສົ່ງອອກ ແລະ ຫ້າມສົ່ງອອກຕາມການແນະນຳຂອງທ່ານນາຍົກລັດຖະມົນຕີ.

          ໂຄສົກລັດຖະບານ ກ່າວວ່າ: ຜະລິດຕະພັນໄມ້ທີ່ລັດຖະບານອະນຸຍາດໃຫ້ສົ່ງອອກໄດ້ມີ 12 ປະເພດຄື: ຜະລິດຕະພັນຂີ້ເລື່ອຍອັດແທ່ງ-ອັດເມັດ, ເຄື່ອງໃຊ້ສອຍທີ່ເຮັດດ້ວຍໄມ້, ໄມ້ປະກອບໃນອາຄານ, ເຄື່ອງຫັດຖະກຳທີ່ເຮັດດ້ວຍໄມ້, ເຄື່ອງເຟີນີເຈີເຮັດດ້ວຍໄມ້, ຜະລິດຕະພັນໄມ້ປ່ອງ-ຫວາຍ, ໄມ້ຄ້ຳແບບ,

ໄມ້ຂ້າວ, ໄມ້ຮົ້ວ (ໄມ້ກົມ) ແລະ ໄມ້ເລື່ອຍເປັນແຜ່ນ (ໄມ້ປູກ), ຜະລິດຕະພັນເຫຍື່ອໄມ້ ແລະ ໄມ້ເກດສະໜາບົດເປັນຝຸ່ນ-ເສດໄມ້ນ້ອຍໆ. ສ່ວນຜະລິດຕະພັນໄມ້ທີ່ຫ້າມສົ່ງອອກໄດ້ແກ່ໄມ້ທຸກປະເພດ, ທຸກຊະນິດ, ທຸກຮູບແບບ ແລະ ທຸກຂະໜາດທີ່ບໍ່ໄດ້ລະບຸໃນລາຍການປະເພດໄມ້ທີ່ສົ່ງອອກໄດ້ ຕົວຢ່າງ: ໄມ້ເສົາໂຊ, ໄມ້ເສົາ ແລະ ຄານອັດປະສານ, ຜະລິດຕະພັນໄມ້ໂຕະ ແລະ ຕັ່ງທີ່ເປັນໜ້າໄມ້ທຳມະຊາດ ແຜນດຽວທີ່ມີຂະໜາດໃຫຍ່, ຜະລິດຕະພັນທີ່ມີຂະໜາດໃຫຍ່ (ໜາ 5 ຊັງຕີແມັດ, ກວ້າງ 30 ຊັງຕີແມັດ ແລະ ຍາວ 50 ຊັງຕີແມັດ) ຂຶ້ນໄປ, ໄມ້ປູກທີ່ມີລຳຕົ້ນຂະໜາດໃຫຍ່ກວ່າ 12 ຊັງຕີແມັດຂຶ້ນໄປ, ຖ່ານດຳທຸກຊະນິດ, ໄມ້ປູພື້ນສຳລັບພາຍນອກ, ໄມ້ບົວ, ໄມ້ປະກອບຖັງລົດ, ໂລງສົບ, ລູກຕິ່ງ, ຮາວພະນັກ ແລະ ພະນັກອັດປະສານດັ່ງນີ້ເປັນຕົ້ນ ສະນັ້ນ ເມື່ອມີການກຳນົດໄວ້ຢ່າງລະອຽດ ດັ່ງນັ້ນແລ້ວກໍຂໍໃຫ້ເຈົ້າໜ້າທີ່ກ່ຽວຂ້ອງຕ່າງໆ, ຜູ້ປະກອບການ, ນັກທຸລະກິດ ແລະ ປະຊາຊົນບັນດາ ເຜົ່າພ້ອມກັນປະຕິບັດໃຫ້ຖືກຕ້ອງເຂັ້ມງວດ ແລະ ມີຜົນສັກສິດ.