ລາວ-ຫວຽດນາມແລກປ່ຽນບົດຮຽນວຽກງານກວດກາ ແລະ ຕ້ານການສໍ້ລາດບັງຫລວງ

          ວັນທີ 27-28 ຕຸລານີ້, ກະຊວງການເງິນລາວ ແລະ ສສຫວຽດນາມ, ໄດ້ຈັດຝຶກອົບຮົມວຽກງານກວດກາການຕ້ານການສໍ້ລາດບັງຫລວງ ຈາກບົດຮຽນຂອງ ສສ ຫວຽດ ນາມ, ໂດຍການເປັນປະທານຂອງທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ, ມີທ່ານ ວູ້ຮົ່ງຫາຍ ຮອງຫົວໜ້າກົມກວດກາການເງິນ ກະຊວງການເງິນຫວຽດ ນາມ, ພ້ອມຄະນະ ແລະ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມເປັນຈຳນວນຫລາຍ.

          ການຝຶກອົບຮົມດັ່ງກ່າວ ມີຫົວຂໍ້: “ຂັ້ນຕອນການກວດກາຕ້ານການສໍ້ລາດບັງຫລວງໃນຂະແໜງການເງິນລົງເລິກການເກັບລາຍຮັບ ແລະ ການຄຸ້ມຄອງລາຍຈ່າຍງົບປະມານແຫ່ງລັດ ໃນຂັ້ນສູນກາງ ແລະ ຂັ້ນແຂວງ-ນະຄອນຫລວງ”; “ຂັ້ນຕອນການແກ້ໄຂຜົນຂອງການກວດກາ” ຈາກຜູ້ຊ່ຽວຊານດ້ານວິຊາສະເພາະຂອງ ສສ ຫວຽດນາມ, ເພື່ອຍົກລະດັບຄວາມຮູ້ສາມາດຂອງພະນັກງານກວດກາຂອງລາວ, ພ້ອມທັງເປັນການແລກປ່ຽນບົດຮຽນຕົວຈິງຈາກພະນັກງານກວດກາຫວຽດ ນາມ ເພື່ອພ້ອມກັນຖອດຖອນ ແລະ ຫາວິທີແກ້ໄຂໃຫ້ທັນເວລາ, ນອກນີ້ນັກສຳມະນາກອນຍັງຈະໄດ້ນຳເອົາຄວາມຮູ້ໄດ້ຈາກການແລກປ່ຽນຄັ້ງນີ້ໄປຜັນຂະຫຍາຍ ແລະ ໝູນໃຊ້ເຂົ້າໃນວຽກງານຕົວຈິງໃຫ້ເກີດປະໂຫຍດສູງສຸດ.

          ທ່ານຮອງລັດຖະມົນຕີ ໄດ້ກ່າວຂອບໃຈມາຍັງລັດຖະບານຫວຽດນາມ ກໍຄືກະຊວງການເງິນ ທີ່ຍາມໃດກໍໄດ້ເອົາໃຈໃສ່ຊ່ວຍເຫລືອ ສປປ ລາວ, ໂດຍສະເພາະການບຳລຸງສ້າງ ແລະ ຍົກລະດັບຄວາມຮູ້, ຄວາມສາມາດ ທາງດ້ານວິຊາສະເພາະຕະຫລອດມາ, ຊຶ່ງເຫັນວ່າບົດຮຽນດັ່ງກ່າວ ມັນມີຄວາມໝາຍຄວາມສຳຄັນຕໍ່ການພັດທະນາວຽກງານກວດກາ ແລະ ຕ້ານການສໍ້ລາດບັງຫລວງຢູ່ປະເທດເຮົາ.