ສສຊ ຫລາຍເຂດນຳສະເໜີສານປະຊາຊົນສູງສຸດ ແລະ ອົງການໄອຍະການປະຊາຊົນປັບປຸງຈຸດຄວາມເຂັ້ມແຂງ ແລະ ແກ້ໄຂຈຸດບົກພ້ອງຕ່າງໆ

          ການດຳເນີນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ 8 ໃນຕອນເຊົ້າວັນທີ 2 ພະຈິກນີ້, ທີ່ຫໍສະພາແຫ່ງຊາດ ນະຄອນຫລວງວຽງຈັນ, ພາຍໃຕ້ການເປັນປະທານຂອງທ່ານ ພັນໂທ ແສງນວນ ໄຊຍະລາດ ຮອງປະທານສະພາແຫ່ງຊາດ, ຊຶ່ງສະມາຊິກສະພາແຫ່ງຊາດ ໄດ້ສືບຕໍ່ປະກອບຄຳຄິດຄຳເຫັນຕໍ່ບົດລາຍງານການເຄື່ອນໄຫວວຽກງານ 5 ປີຜ່ານມາຂອງອົງການໄອຍະການປະຊາຊົນ ແລະ ສານປະຊາຊົນສູງສຸດຢ່າງກົງໄປກົງມາ ແລະ ມີຄວາມຜິດຊອບສູງໃນນັ້ນ ຜູ້ແທນໃຫ້ຄວາມສົນໃຈ ແລະ ປະກອບຄຳເຫັນຫລາຍແມ່ນສະພາບການປະຕິບັດສິດ, ພາລະບົດບາດຂອງເຈົ້າໜ້າທີ່ອົງການໄອຍະ

ການປະຊາຊົນ ແລະ ສານປະຊາຊົນສູງສຸດ ເພື່ອນຳເອົາບັນດາຈຸດອ່ອນຂໍ້ຄົງຄ້າງ ລວມເຖິງບັນດາຂໍ້ສະເໜີເຫລົ່ານັ້ນໄປປັບປຸງແກ້ໄຂ, ແນໃສ່ເຮັດໃຫ້ການເຄື່ອນໄຫວວຽກງານໃນຂົງເຂດຕຸລາການມີຄວາມສັກສິດ ແລະ ມີປະສິດທິຜົນສູງສຸດຂຶ້ນໃນຕໍ່ໜ້າ. ທ່ານ ຄຳຈັນ ໂສ ຕະປະເສີດ ສະມາຊິກສະພາແຫ່ງຊາດເຂດເລືອກຕັ້ງທີ 18 ແຂວງໄຊສົມບູນ ມີຄຳເຫັນວ່າ: ການປະຕິບັດພາລະບົດບາດຂອງອົງການໄອຍະການ ແລະ ສານປະຊາຊົນ ໃນໄລຍະຜ່ານມາຍັງເຮັດບໍ່ທັນໄດ້ດີເທົ່າທີ່ຄວນ, ເຮັດໃຫ້ມີຫາງສຽງຈົ່ມວ່າຈາກສັງຄົມ ແລະ ຂາດຄວາມເຊື່ອໝັ້ນຕໍ່ການປະຕິບັດໜ້າທີ່ຂອງພະນັກງານໄອຍະການ ແລະ ສານປະຊາຊົນ ສະແດງອອກການຕັດສິນບາງຄະດີມີຄວາມຊັກຊ້າ, ແກ່ຍາວ ທັງໆທີ່ມີຂໍ້ມູນ, ຫລັກຖານຊັດເຈນ. ທ່ານນາງ ແສງຄຳ ຊົ່ງຊະນະ ສະມາຊິກສະແຫ່ງຊາດປະຈຳເຂດເລືອກຕັ້ງທີ 9 ແຂວງຊຽງຂວາງ ປະກອບຄຳເຫັນກ່ຽວກັບການຕັດສິນຄະດີຕ່າງໆໃນໄລຍະຜ່ານມາສ່ວນຫລາຍຈະເນັ້ນໜັກໃສ່ດ້ານໂດດ້ານໜຶ່ງ ຍັງບໍ່ທັນຮອບດ້ານ ແລະ ຮັດ ກຸມເທົ່າທີ່ຄວນ, ຕົວຢ່າງ: ຄະດີອຸປະຕິເຫດສ່ວນຫລາຍຈະແກ້ໄຂທາງແພ່ງ ແຕ່ທາງອາຍາຫລາຍຄະ ດີທີ່ເກີດຂຶ້ນໃນສັງຄົມບໍ່ທັນໄດ້ສຶກສາອົບຮົມຜູ້ກະທຳຜິດສືບຕໍ່ລອຍນວນ ແລ ບໍ່ນັບຖືລະບຽບກົດໝາຍຕົກໃນກໍລະນີສັງຄົມສ່ອງແສງເຊັ່ນ: ຄົນຮັ່ງບໍ່ໄດ້ເຂົ້າຄຸກ-ຄົນທຸກບໍ່ໄດ້ນອນໂຮງໝໍ. ທ່ານ ສົມເພັດ ອິນທາທິລາດ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ແຂວງສະຫວັນນະເຂດ ສະເໜີໃຫ້ພາກສ່ວນກ່ຽວຂ້ອງເບິ່ງຄືນເພື່ອແກ້ໄຂບັນຫາຄະດີຢ່າຮ້າງທີ່ມີທ່າອ່ຽງສູງຂຶ້ນໃນປັດຈຸບັນ, ໂດຍສະເໜີໃຫ້ສົມທົບກັນສຶກສາອົບຮົມພົນລະເມືອງໃຫ້ມີແນວຄິດຮັກດຽວໃຈດຽວແຕ່ໄວໜຸ່ມ, ເນື່ອງຈາກບັນຫານີ້ກາຍເປັນປະກົດການຫຍໍ້ທໍ້ໜຶ່ງທີ່ສົ່ງຜົນສະທ້ອນບໍ່ດີຕໍ່ສັງຄົມລາວ.