ກະຊວງແຮງງານຍອມຮັບການປະຕິບັດນະໂຍບາຍຕໍ່ຜູ້ມີຄຸນງາມຄວາມດີຍັງບໍ່ທົ່ວເຖິງ

            ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຄໍາແພງ ໄຊສົມແພງ ຍອມ ຮັບວ່າ: ໃນໄລຍະຜ່ານມາ, ການຈັດຕັ້ງປະຕິບັດນະໂຍບາຍຕໍ່ຜູ້ມີຄຸນງາມຄວາມດີໃນພາລະກິດປະຕິ ວັດຍັງຊັກຊ້າ ແລະ ບໍ່ທັນທົ່ວເຖິງເທົ່າທີ່ຄວນ, ຊຶ່ງສະແດງອອກຄື: ໃນສົກປີ 2015-2016 ໄດ້ສະເໜີເປົ້າໝາຍບູລິມະສິດຈໍານວນ 6.974 ຄົນຕົກເປັນເງິນ 134 ຕື້ກີບ, ແຕ່ໄດ້ງົບປະມານ ແລະ ຈັດຕັ້ງປະຕິບັດນະໂຍ ບາຍໄດ້ພຽງ 1.665 ຄົນເທົ່າກັບ 23,8% ຂອງແຜນການ.

             ທ່ານລັດຖະມົນຕີກະຊວງດັ່ງກ່າວ ໃຫ້ຮູ້ວ່າ: ນັບແຕ່ປີ 1993-2015 ກະຊວງແຮງງານ ແລະ ສະຫວັດດີການສັງຄົມໄດ້ປະຕິບັດນະໂຍບາຍຕ່າງໆໃຫ້ບັນດາເປົ້າໝາຍ ເຊັ່ນ: ນະໂຍບາຍດ້ານທີ່ຢູ່ອາໄສ, ໂກຕາລົດ, ເງິນປ່ຽນແທນໂກຕາລົດ, ອຸດໜູນນາມມະຍົດວິລະຊົນແຫ່ງຊາດ, ນັກຮົບແຂ່ງຂັນ, ປຸກສ້າງ

ເຮືອນໃຫ້ພະນັກງານເສຍອົງຄະ, ອຸດໜູນເທື່ອດຽວໃຫ້ຄອບຄົວຜູ້ເສຍສະຫລະຊີວິດຍ້ອນການສູ້ຮົບໃນພາລະກິດປົດປ່ອຍຊາດ, ອຸດໜູນບໍານານຄືນໃຫ້ພະນັກງານ, ທະຫານ, ຕໍາຫລວດຜູ້ທີ່ມີເງື່ອນໄຂບໍານານຫລາຍກວ່າ 29 ພັນຄົນ, ຕົກເປັນເງິນຫລາຍກວ່າ 400 ຕື້ກີບ. ແຕ່ແນວໃດກໍຕາມ, ເມື່ອທຽບໃສ່ການຄອງຄອຍ, ການເລັ່ງທວງຂອງບັນດາເປົ້າໝາຍເຫັນວ່າມີຫລາຍສາເຫດທີ່ພາໃຫ້ການຈັດຕັ້ງປະຕິບັດວຽກງານດັ່ງກ່າວເຮັດບໍ່ທັນໄດ້ດີເທົ່າທີ່ຄວນ ເປັນຕົ້ນ: ການສະໜອງງົບ ປະມານມີຈໍາກັດເຮັດໃຫ້ການແກ້ໄຂນະໂຍບາຍບໍ່ທົ່ວເຖິງ ແລະ ແກ່ຍາວ, ການໂຄສະນາເຜີຍແຜ່ນະໂຍບາຍດັ່ງກ່າວອອກສູ່ສັງຄົມບໍ່ທັນກວ້າງຂວາງ, ການປະກອບສ່ວນຂອງສັງຄົມເຂົ້າໃນວຽກງານດັ່ງກ່າວມີໜ້ອຍ, ຂໍ້ມູນສະຖິຕິຈໍານວນໜຶ່ງຍັງບໍ່ຊັດເຈນເຮັດໃຫ້ການຈັດຕັ້ງປະຕິບັດມີຄວາມຫຍຸ້ງຍາກຊັກຊ້າ, ນິຕິກໍາທີ່ເປັນບ່ອນອິງເພື່ອຈັດຕັ້ງປະຕິບັດບໍ່ທັນຄົບຖ້ວນ, ຮັດກຸມ ຈຶ່ງເຮັດໃຫ້ບຸກຄົນສວຍໃຊ້ຊ່ອງຫວ່າງເພື່ອຫາຜົນປະໂຫຍດນໍາເປົ້າໝາຍຕ່າງໆ. ນອກຈາກນີ້ກົນໄກການຄຸ້ມຄອງລະ ຫວ່າງສູນກາງ ແລະ ທ້ອງຖິ່ນໄດ້ມີການປັບປຸງຕະຫລອດມາ, ແຕ່ຄວາມຮັບພິຊອບຂອງພະນັກງານເຮັດວຽກນະໂຍບາຍຈໍານວນໜຶ່ງຍັງບໍ່ທັນສູງເທົ່າທີ່ຄວນ, ຂອດປະສານງານລະຫວ່າງຂະແໜງການຕ່າງໆ ແລະ ທ້ອງຖິ່ນບໍ່ຄ່ອງຕົວ, ເຮັດໃຫ້ການແກ້ໄຂນະໂຍບາຍບາງອັນກໍຍັງບໍ່ທັນລວມສູນຈຶ່ງເຮັດໃຫ້ເກີດມີການປຽບທຽບ ແລະ ຕໍ່ລອງຂອງບັນດາເປົ້າໝາຍ.

          ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກ່າວວ່າ: ເພື່ອຮັບປະກັນໃຫ້ການຈັດຕັ້ງປະຕິບັດວຽກງານດັ່ງກ່າວມີປະສິດທິຜົນດີ ແລະ ທົ່ວເຖິງກວ່າເກົ່າ, ຂະແໜງການກ່ຽວ ຂ້ອງຈະສຸມໃສ່ຍົກລະດັບຄວາມຮູ້ ແລະ ເຊື່ອມຊຶມບັນດານິຕິກໍາກ່ຽວຂ້ອງຕ່າງໆໃຫ້ພະນັກງານລັດ ຖະກອນທີ່ຮັບພິຊອບວຽກງານນະໂຍບາຍ ເພື່ອແນໃສ່ສ້າງຄວາມເປັນເອກະພາບດ້ານແນວຄິດ, ທັດສະນະ ແລະ ການກະທໍາຕົວຈິງໃຫ້ມີປະສິດທິຜົນ, ສືບຕໍ່ສ້າງ ແລະ ປັບປຸງນິຕິກໍາໃຫ້ຮັດກຸມ, ເກັບກໍາຂໍ້ມູນ, ການຄົ້ນຄວ້າ, ວິເຄາະຂໍ້ມູນຂອງເປົ້າໝາຍຕ່າງໆໃຫ້ລະອຽດແທດຕົວຈິງ, ປັບປຸງກົນໄກການປະສານງານລະຫວ່າງສູນກາງ ແລະ ທ້ອງຖິ່ນໃຫ້ມີຄວາມຄ່ອງຕົວ.