ເກີດສະພາບລັກຊັບພົນລະເມືອງຫລາຍກໍລະນີໃນບຸນທາດຫລວງ

            ຮອງຫົວໜ້າ ປກສ ນະຄອນຫລວງວຽງຈັນ ໃຫ້ຮູ້ວ່າ: ໃນໄລຍະບຸນນະມັດສະການພະທາດຫລວງວຽງຈັນແຕ່ວັນທີ 8-14 ພະຈິກຜ່ານມານີ້, ໄດ້ມີກຸ່ມຄົນບໍ່ດີກໍ່ເຫດລັກຊັບ ແລະ ຊິງຊັບພົນລະ ເມືອງທີ່ມາທ່ຽວບຸນດັ່ງກ່າວຫລາຍກໍລະນີຄື: ໃນຄໍ່າຄືນວັນທີ 10 ພະຈິກ ມີການດຶງກະເປົາປະຊາຊົນ 3 ກໍລະນີ ແລະ ສາມາດຈັບຕົວຄົນຮ້າຍໄດ້ໜຶ່ງຄົນ, ວັນທີ 11 ພະຈິກມີການຈົກກະເປົາ 3 ກໍລະນີ, ດຶງສາຍຄໍໜຶ່ງກໍລະນີ ແລະ ຈັບຜູ້ກໍເຫດໄດ້ໜຶ່ງຄົນ, ຕໍ່ມາວັນທີ 12 ພະຈິກມີການຈົກກະເປົາເກີດຂຶ້ນເຖິງ 11 ກໍລະນີ, ແຫກກະເປົາ ແລະ ຊິງຊັບໜຶ່ງ

ກໍລະນີ, ວັນທີ 13 ພະຈິກມີການຈົກກະເປົາ 9 ກໍລະນີ, ຊິງຊັບ 7 ກໍລະນີ ແລະ ວັນທີ 14 ພະຈິກ, ເຊິ່ງເປັນມື້ສຸດທ້າຍໄດ້ມີການຈົກກະເປົາເກີດຂຶ້ນ 6 ກໍລະ ນີ, ແຫກກະເປົາໜຶ່ງກໍລະນີ, ອັນໄດ້ເຮັດໃຫ້ຊັບສີນຂອງປະຊາຊົນເສຍຫາຍເປັນຈໍານວນບໍ່ໜ້ອຍຄື: ເງິນສົດ 37 ລ້ານກວ່າກີບ, 600 ກວ່າໂດລາສະຫະລັດ, 36 ພັນກວ່າບາດ (ສະກຸນເງິນໄທ), ພັນກວ່າຢວນ (ສະກຸນເງິນຈີນ), ໂທລະສັບມືຖື 15 ໜ່ວຍ ແລະ ວັດຖຸມີຄ່າອື່ນໆ. ດັ່ງກໍລະນີເກີດຂຶ້ນເວລາປະມານ 19:00 ໂມງຂອງວັນທີ 13 ພະຈິກໄດ້ມີຄົນຮ້າຍພະຍາຍາມດຶງສາຍຄໍຄໍາຂອງປະຊາ

ຊົນຄົນໜຶ່ງໜັກປະມານ 10 ບາດແຕ່ບໍ່ສໍາເລັດ, ຍ້ອນຄົນຮ້າຍຈັບຖືກຄໍເສື້ອຈາກນັ້ນເຈົ້າຂອງສາຍຄໍຈຶ່ງໄດ້ຈັບແຂນຄົນຮ້າຍໄວ້ທັນແລ້ວຮ້ອງໃຫ້ປະຊາຊົນທີ່ຢູ່ໃກ້ມາຊ່ວຍຈັບຕົວແລ້ວສົ່ງໃຫ້ເຈົ້າໜ້າທີ່ເພື່ອນໍາຕົວໄປດໍາເນີນຄະດີ, ຊຶ່ງເປັນຄົນສັນຊາດຫວຽດນາມຊື່ທ້າວ ຫງວຽນ ທວງ ຫາຍ. ສ່ວນຜູ້ຮ່ວມຂະບວນການຈໍານວນໜຶ່ງແມ່ນສາມາດເອົາຕົວຫລົບໜີໄດ້.