laophatthananewspaper: ສຳມະນາການຕິດຕາມນະໂຍບາຍວິທະຍາສາດ ແລະ ນະວັດຕະກຳ

ໃນວັນທີ 16 ພະຈິກນີ້, ຢູ່ໂຮງແຮມເມືອງແທງ ນະຄອນຫລວງວຽງຈັນ, ກະຊວງວິທະຍາສາດ ແລະ ເຕັກໂນໂລຊີ ແລະ ອົງການອຸຍແນສໂກ (UNESCO) ປະຈຳລາວ ໄດ້ຈັດສຳມະນາຫົວຂໍ້ “ສ້າງຄວາມເຂົ້າໃຈກ່ຽວກັບໂຄງການຊຸກຍູ້ຜູ້ຕິດຕາມນະໂຍບາຍດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳຂອງບັນດາປະເທດຕ່າງໆ” ໂດຍການເປັນປະທານຂອງທ່ານ ຫຸມ ພັນ ອິນທິລາດ ຮອງລັດຖະມົນຕີກະຊວງວິທະຍາ ສາດ ແລະ ເຕັກໂນໂລຊີ ທັງເປັນຮອງປະທານຄະນະກຳມະການແຫ່ງຊາດເພື່ອອຸຍແນສໂກ, ມີທ່ານ ຣາມາຊາມີ ຈາຢາກູມາ (MR. Ramasamy Jayakumar) ຫົວໜ້າຂະແໜງວິທະຍາສາດທຳມະຊາດ ອົງການອຸຍແນສໂກ ແລະ ຜູ້ຕາງໜ້າຈາກຂະແໜງການຕ່າງໆເຂົ້າຮ່ວມຢ່າງພ້ອມພຽງ.

ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ກ່າວວ່າ: ການສຳມະນາຄັ້ງນີ້ແມ່ນມີຄວາມສຳຄັນຫລາຍ ເພາະວ່າອົງການອຸຍແນສໂກໄດ້ເລືອກເອົາ ສປປ ລາວ ເປັນປະເທດທຳອິດໃນພາກພື້ນນີ້ ເພື່ອຈັດຕັ້ງປະຕິບັດໂຄງການດັ່ງກ່າວ ເຊິ່ງຈະເປັນພື້ນຖານໃຫ້ແກ່ການກຳນົດນະໂຍບາຍ, ຍຸດທະສາດ ແລະ ແຜນພັດທະນາທັງໄລຍະສັ້ນ ແລະ ໄລຍະຍາວ ໂດຍສະເພາະເພື່ອບັນລຸເປົ້າໝາຍການພັດທະນາແບບຍືນຍົງ (SDG 2030).

ທ່ານຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ກ່າວວ່າ: ໃນໄລຍະຜ່ານມາ, ພັກ ແລະ ລັດຖະບານ ໄດ້ໃຫ້ຄວາມສຳຄັນຕໍ່ຂະແໜງວິທະຍາສາດ ແລະ ເຕັກໂນໂລຊີ ເຊິ່ງໄດ້ກຳນົດແຈ້ງໃນລັດຖະທຳມະນູນ, ກົດໝາຍ ແລະ ນະໂຍບາຍຕ່າງໆ ເພື່ອເຮັດໃຫ້ຂະແໜງວິທະຍາສາດ, ເຕັກໂນໂລຊີ, ນະວັດຕະກຳຊັບສິນທາງປັນຍາ, ມາດຕະຖານ, ວັດແທກ ແລະ ອື່ນໆ ໄດ້ມີການປັບປຸງດີຂຶ້ນເປັນກ້າວໆ. ແຕ່ຄຽງຄູ່ກັນນັ້ນ ກໍຍັງມີບາງດ້ານທີ່ເປັນສິ່ງທ້າທາຍ ເປັນຕົ້ນການຈັດຕັ້ງຜັນຂະຫຍາຍບັນດານະໂຍບາຍ, ລະບຽບກົດໝາຍ, ແຜນຍຸດທະສາດ ແລະ ບັນດາແຜນງານທີ່ຖືກຮັບຮອງເຂົ້າໃນວຽກງານຕົວຈິງຍັງເຮັດໄດ້ໜ້ອຍ ຍ້ອນຂາດການຕິດຕາມເກັບກຳ ແລະ ວິເຄາະຂໍ້ມູນທີ່ເປັນບູລິມະສິດດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳບໍ່ທັນລະອຽດ. ດັ່ງນັ້ນ ວຽກງານຊຸກຍູ້ຕິດ ຕາມນະໂຍບາຍດ້ານດັ່ງກ່າວຈຶ່ງມີຄວາມຈຳເປັນ ເພື່ອເຮັດໃຫ້ວຽກງານວິທະຍາສາດ ແລະ ເຕັກໂນໂລຊີກາຍເປັນເຄື່ອງມື ແລະ ພາຫະນະພັກດັນການຂັບເຄື່ອນການພັດທະນາເສດຖະກິດ-ສັງຄົມແຫ່ງຊາດໄດ້ຢ່າງມີປະສິດທິຜົນ.