ມອບ-ຮັບສູນຝືກອົບຮົມສູນກາງແນວລາວສ້າງຊາດ

          ພິທີມອບ-ຮັບສູນຝຶກອົບຮົມສູນກາງແນວລາວສ້າງຊາດຂອງຂວັນຈາກ ສປ ຈີນ ລວມມີມູນຄ່າຫລາຍກວ່າ 32 ລ້ານຢວນ (ສະກຸນເງິນຈີນ) ໄດ້ຈັດຂຶ້ນໃນວັນທີ 17 ພະຈິກນີ້, ໂດຍມີທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ, ທ່ານເອກອັກຄະລັດຖະທູດແຫ່ງ ສປຈີນ ປະຈໍາລາວ ກວນ ຮົວ ປິງ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.

            ສູນອົບຮົມດັ່ງກ່າວປະກອບມີອາຄານ 2 ຊັ້ນໜຶ່ງຫລັງທີ່ເປັນຫ້ອງເຮັດວຽກຂອງຄູອາຈານ,

ຫ້ອງປະຊຸມ, ຫ້ອງຮຽນ, ຫ້ອງອາຫານ ແລະ ອາຄານຫໍພັກສູງ 3 ຊັ້ນໜຶ່ງຫລັງມີ 36 ຫ້ອງ ແລະ ມີລະບົບອໍານວຍຄວາມສະດວກຄົບຊຸດ, ໂດຍແມ່ນກຸ່ມບໍລິສັດ ເຫີເປ ກໍ່ສ້າງ ຈໍາກັດເປັນຜູ້ຮັບເໝົາກໍ່ສ້າງ ແລະ ສະພາທີ່ປຶກສາການເມືອງທົ່ວປະເທດຈີນໃຫ້ທຶນຊ່ວຍເຫລືອ.

           ທ່ານຮອງປະທານສູນກາງແນວລາວສ້າງຊາດ ຄໍາໃບ ດໍາລັດ ໄດ້ກ່າວໃນພິທີວ່າ: ສູນຝຶກອົບຮົມແຫ່ງນີ້, ໄດ້ເປັນສັນຍາລັກໃໝ່ຂອງການຮ່ວມມືລະຫວ່າງ ສປປ ລາວ ແລະ ສປຈີນ, ເວົ້າສະເພາະແມ່ນສູນກາງແນວລາວສ້າງຊາດລາວ ແລະ ສະພາທີ່ປຶກສາການເມືອງທົ່ວປະເທດຈີນ, ເປັນສະຖານທີ່ສໍາຄັນສໍາລັບການບໍາລຸງກໍ່ສ້າງ ແລະ ພັດທະນາຊັບພະຍາກອນມະນຸດໃນຂົງເຂດແນວລາວສ້າງຊາດໃຫ້ມີຄຸນນະພາບເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານແນວໂຮມໃນໄລຍະໃໝ່ໃຫ້ມີປະສິດທິຜົນກວ່າເກົ່າ.