ສໍາມະນາການຂະຫຍາຍທຸລະກິດຜ່ານຕະຫລາດທຶນ

           ໃນວັນທີ 17 ພະຈິກນີ້, ສໍານັກງານຕະຫຼາດຫຼັກຊັບລາວຮ່ວມກັບສະພາການຄ້າ ແລະ ອຸດ ສາຫະກຳນະຄອນຫຼວງວຽງຈັນ, ໄດ້ຈັດສຳມະນາຫົວຂໍ້: “ບາດກ້າວໃໝ່ສູ່ຄວາມສຳເລັດຂອງທຸລະກິດຜ່ານຕະຫຼາດທຶນ” ຂຶ້ນທີ່ນະຄອນຫລວງວຽງຈັນ, ໂດຍການເປັນປະທານຂອງທ່ານ ວັນຄຳ ວໍຣະວົງ ອຳນວຍການໃຫຍ່ຕະຫລາດຫລັກຊັບລາວ, ທ່ານ ສັງຄົມ ຈັນສຸກ ປະທານສະພາການຄ້າ ແລະ ອຸດສະຫະກໍານະຄອນຫລວງວຽງຈັນ, ພ້ອມດ້ວຍຜູ້ປະກອບການທຸລະກິດເຂົ້າຮ່ວມເປັນຈໍານວນຫລາຍ.

           ທ່ານອໍານວຍການຕະຫລາດຫລັກຊັບລາວ ກ່າວວ່າ: ການສໍາມະນາດັ່ງກ່າວແມ່ນມີຄວາມ

ສຳຄັນທີ່ຈະຊ່ວຍໃຫ້ຜູ້ປະກອບການທຸລະກິດໃນລາວເຫັນໄດ້ຊ່ອງທາງໃໝ່ໃນການລະດົມທຶນ, ຫາແຫຼ່ງທຶນ ເພື່ອຕໍ່ຍອດຄວາມສໍາເລັດຂອງຕົນໃຫ້ສູງຂຶ້ນ ແລະ ກ້າວໄປສູ່ການເປັນທີ່ຮັບຮູ້ໃນເວທີພາກພື້ນ ແລະ ສາກົນ.

            ທ່ານ ສັງຄົມ ຈັນສຸກ ກ່າວວ່າ: ການສໍາມະນານີ້ຈະຊ່ວຍຊຸກຍູ້ສົ່ງເສີມໃຫ້ຜູ້ປະກອບການລາວໄດ້ຫັນມານຳໃຊ້ຊ່ອງທາງລະດົມທຶນໃນຕະຫຼາດທຶນຫລາຍຂຶ້ນເພື່ອຂະຫຍາຍທຸລະກິດໃຫ້ເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ. ນອກຈາກນີ້ຜູ້ເຂົ້າຮ່ວມຍັງໄດ້ຮັບຟັງການບັນຍາຍຈາກວິທະຍາ ກອນທີ່ມີປະສົບການກ່ຽວກັບການສ້າງທຸລະກິດດ້ວຍຊ່ອງທາງການນຳໃຊ້ຕະຫຼາດທຶນເພື່ອຂະຫຍາຍທຸລະກິດໃຫ້ມີຄວາມສຳເລັດທັງຢູ່ພາຍໃນ ແລະຕ່າງປະເທດ, ພ້ອມທັງແລກປ່ຽນບົດຮຽນ ແລະ ປະ ສົບການກ່ຽວກັບການກະກຽມບໍລິສັດກ່ອນການລະດົມທຶນ, ບັນດາຜົນປະໂຫຍດ ແລະ ສິ່ງທ້າທາຍຂອງທຸລະກິດໃນການລະດົມທຶນຜ່ານຕະຫຼາດທຶນ ແລະ ຈົດທະບຽນໃນຕະຫຼາດຫຼັກຊັບຈາກບັນດາບໍລິສັດທີ່ີປະສົບຜົນສຳເລັດໃນການລະດົມທຶນຜ່ານຕະຫຼາດທຶນ ແລະ ຈົດທະບຽນໃນຕະຫຼາດຫຼັກຊັບລາວ ແລະ ຕະຫຼາດຫຼັກຊັບແຫ່ງປະເທດໄທອີກດ້ວຍ.