ບຸນທາດຫລວງທວງຄືນສັດທາ ແລະ ພູມປັນຍາຄົນລາວ

ໂດຍ: ວິເສດ ສະແຫວງສຶກສາ

          ໂສມໜ້າໃໝ່ຂອງບຸນທາດຫລວງປີນີ້ໄດ້ຮັບການຂານຕອບທາງບວກຈາກຜູ້ເຂົ້າທ່ຽວຊົມ ເປັນຢ່າງດີ. ຫາງສຽງທີ່ມາໃນລະດັບຫົວແຖວບອກວ່າ ການທີ່ກຳນົດຫ້າມຕັ້ງຜ້າເຕັ້ນຢູ່ພາຍໃນ ບໍ ລິເວນເດີ່ນນັ້ນດີຫລາຍ ເພາະຫລາຍຄົນ “ເບື່ອ” ຜ້າເຕັ້ນຈົນກາຍເປັນພູມແພ້, ຢູ່ໃສງານໃດ ບໍ່ວ່ານ້ອຍວ່າໃຫຍ່ກໍມີຕາຍແຕ່ຜາມຜ້າເຕັ້ນ. ດີອັນທີສອງແມ່ນການຫລຸດຈຳນວນຮ້ານຄ້າຂາຍ ທີ່ສ້າງຄວາມສັບສົນ ແລະ ສຽງດັງຈົນໜວກຫູ ເຊິ່ງສິນຄ້າກໍມີແຕ່ແບບເດີມໆຊ້ຳຊາກ, ພຽງແຕ່ເປັນການຂ່ຽນຈາກບ່ອນໜຶ່ງມາຂາຍອີກບ່ອນໜຶ່ງ. ອັນທີສາມ ຜູ້ທ່ຽວຊົມມີ

ໂອກາດໄດ້ພັກຜ່ອນຫູຫລາຍຂຶ້ນ ຍ້ອນຈຳ ນວນຮ້ານບັນເທີງຫລຸດລົງ. ແຕ່ກ່ອນຮ້ານບັນເທີງນັ້ນຕັ້ງລຽນກັນແບບຮ້ານຕໍ່ຮ້ານ, ຕັ້ງໃຈຟັງເພງດຽວ ຢູ່ຮ້ານໜຶ່ງ ແຕ່ກໍມີສິບເພງຊີງກັນ ເຂົ້າຫູເລີຍຈັບຕົ້ນຊົນປາຍບໍ່ໄດ້ວ່າແມ່ນເພງຫຍັງ. ນອກຈາກຜົນສຳເລັດໃນການຫລຸດຜ່ອນຄວາມອຶກກະທຶກ, ຄວາມຊ້ຳຊາກໜ້າເບື່ອແລ້ວ, ງານບຸນປີນີ້ ຍັງມີຫລາຍແນວຕິດຕາມຕ້ອງໃຈທີ່ຄວນສືບຕໍ່ໃນງານບຸນປີຕໍ່ໆໄປ ຄືມີສວນພະຍານາກທີ່ໄດ້ທັງຄວາມໝາຍໄດ້ທັງຄວາມງາມຕາເພີ່ມພະລັງສັດທາໃນຄວາມຍິ່ງໃຫຍ່ຂອງງານບຸນທີ່ເປັນມິ່ງຂວັນແຫ່ງດວງວິນຍານຊາວລາວທັງຊາດ. ເຮືອນລາວບູຮານທີ່ສ້າງຂຶ້ນສະເພາະ ເພື່ອປະດັບງານນັ້ນ ເບິ່ງໂດດເດັ່ນ ແລະ ມີມົນຂັງພະລັງແຫ່ງຄວາມເປັນຊາດທີ່ມີວັດທະນະທຳລໍ່າລຶກຫລາຍພັນປີມາແລ້ວ. ທ່ີສຸດຂອງ ທີ່ສຸດຂອງຜູ້ທ່ຽວບຸນທາດຫລວງນັ້ນ ແນ່ນອນບໍ່ແມ່ນເພື່ອໄປຊື້ເຄື່ອງຖືກ, ບໍ່ແມ່ນເພື່ອມ່ວນເມົາ ໃນສຽງສີສຽງເປັນຕົ້ນຕໍດອກ, ແຕ່ທີ່ເປັນໄປໃນໄລຍະຜ່ານມາກໍຍ້ອນວ່າບໍ່ມີທາງເລືອກອື່ນ. ປີໜ້າຟ້າໃໝ່ຫລາຍໆຄົນໃຫ້ຄວາມເຫັນກັບຈານແຫຍ່ວ່າຄວນຕັ້ງເປົ້າໝາຍສະເພາະໃນການຈັດງານບຸນທາດ ຫລວງ ໂດຍຫັນ ເປົ້າໝາຍທີ່ວ່ານັ້ນເປັນຄຳຂວັນຂອງງານບຸນປະຈຳປີ. ຕົວຢ່າງບຸນທາດຫລວງປີ 2017 ອາດລົງເລິກເຄື່ອງດົນຕີພື້ນເມືອງລາວ. ໃນການປະຕິບັດເປົ້າໝາຍນີ້ກໍຕ້ອງມີລາຍການລາຕີດົນຕີພື້ນເມືອງລາວ, ມີຮ້ານຂາຍຂຸຍຂາຍແຄນ, ມີການປະກວດສິນຄ້າປະເພດນີ້, ປີ 2018 ອາດຈະ ລົງເລິກກ່ຽວກັບວິຖີຊີວິດຂອງຊາວຊົນນະບົດໃນການເຮັດຢູ່ຫາກິນອາດມີການສະແດງໂຮງກະບອງ, ເຫລັກໄຟປັກ (ທີ່ໃຊ້ຫີນຕ່ອຍກັນໃຫ້ອອກແສງໄຟ), ເຄື່ອງຫາປາລ່າສັດປະເພດໜ່າງ, ກະຕໍ່າ, ແຮ້ວ, ຄືນ, ຕັງຈັ່ນ ຈັບປາ ແລະ ອື່ນໆ. ປີ 2019 ອາດມີຄຳຂວັນວັນບຸນທີ່ລົງເລິກປະເພນີບູຮານ ເຊັ່ນພິທີແຕ່ງດອງຂອງຄົນລາວເຜົ່າຕ່າງໆ, ບຸນຂຶ້ນເຮືອນໃໝ່, ບຸນຄຸນເຂົ້າ, ການງັນກຳ ແລະ ອື່ນໆ, ປີຕໍ່ໆໄປອາດລົງເລິກເຄື່ອງນຸ່ງຫົ່ມບູຮານສຸດແລ້ວ ແຕ່ເຫັນເໝາະສົມ ແລະ ເງື່ອນໄຂຕົວຈິງ, ສ່ວນບັນດາສະ ຖານທູດ ໂດຍສະເພາະແມ່ນຈາກບັນດາປະເທດອາຊຽນ ຖ້າເພິ່ນມີເງື່ອນໄຂກໍຄວນໃຫ້ເພິ່ນໄດ້ມີສ່ວນປະກອບໃນການຕັ້ງຮ້ານວາງສະແດງ ຫລື ໂຄສະນາຕາມຄຳຂວັນທີ່ຫົວຂໍ້ປະຈຳປີຂອງບຸນທາດ ຫລວງ ກໍຕ້ອງຂໍຊົມເຊີຍທຸກພາກສ່ວນທີ່ມີຫົວຄິດປະດິດສ້າງເພື່ອຜີກອອກຈາກສິ່ງຊ້ຳຊາກໜ້າເບື່ອທີ່ພານພົບໃນງານບຸນຕ່າງໆຜ່ານມາ. ເຮັດແນວນີ້ໄດ້ພວກເຮົາຈັ່ງຈະສາມາດເຂົ້າເຖິງແກ່ນແທ້ຂອງງານບຸນ, ສ່ວນກິດຈະການປິ່ນອ້ອມ (ຮ້ານຄ້າ, ຮ້ານບັນເທີງ...) ກໍຕ້ອງໃຫ້ມັນມີຖານະເປັນພຽງສ່ວນປະກອບເປືອກນອກເທົ່ານັ້ນຈະດີແລ.