ລາວຫາລືກຽມສ້າງຕັ້ງສະພາຄຸ້ມຄອງວິຊາຊີບສາທາລະນະສຸກ

        ກະຊວງສາທາລະນະສຸກ, ຮ່ວມກັບອົງການອະນາໄມໂລກ ແລະ ອົງ ການ GIZ ໄດ້ຈັດກອງປະຊຸມປຶກສາຫາລືກ່ຽວກັບການກະກຽມສ້າງຕັ້ງສະພາຄຸ້ມຄອງວິຊາຊີບປິ່ນປົວ ແລະ ກຳມະການປິ່ນປົວ, ວິຊາການແພດ, ທັນຕະແພດ ແລະ ພະຍາບານຜະດຸງຄັນຂອງ ສປປ ລາວ ຂຶ້ນໃນວັນທີ 2 ພະຈິກນີ້, ທີ່ນະຄອນຫຼວງວຽງຈັນ, ໂດຍການເປັນປະທານຮ່ວມຂອງທ່ານ ບຸນກອງ ສີຫາວົງ ລັດຖະ ມົນຕີກະຊວງສາທາລະນະສຸກ, ທ່ານ ນາງ ຈູລຽດ ໄຟລໂຊຄ໌ ຜູ້ຕາງໜ້າອົງການອະນາໄມໂລກປະຈຳລາວ, ທ່ານ Ernst Hustadt ຜູ້ຕາງໜ້າອົງການ GIZ  ປະຈຳລາວ, ຜູ້ຕາງໜ້າອົງການຈັດຕັ້ງສາ ກົນ ແລະ ຄູ່ຮ່ວມພັດທະນາ, ເຂົ້າຮ່ວມເປັນຈຳນວນ ຫຼາຍ.

          ທ່ານລັດຖະມົນຕີກະຊວງສາທາລະນະສຸກກ່າວໃນທີ່ປະຊຸມວ່າ: ກອງປະຊຸມຄັ້ງນີ້ແມ່ນມີຄວາມໝາຍສຳຄັນຫຼາຍສຳລັບຂະແໜງການສາທາລະນະສຸກ, ຊຶ່ງຜູ້ເຂົ້າຮ່ວມຈະໄດ້ຮ່ວມກັນປະກອບຄຳເຫັນຕໍ່ການກະກຽມສ້າງຕັ້ງສະພາຄຸ້ມຄອງວິຊາຊີບປິ່ນປົວ ແລະ ກຳມະການປິ່ນປົວສະເພາະວິຊາການແພດ, ທັນຕະແພດ ແລະ ພະຍາບານຜະດຸງຄັນໃນຂະແໜງສາທາະລະສຸກ, ເພື່ອໃຫ້ການຈັດຕັ້ງປະຕິບັດວຽກງານຂອງຂະແໜງສາທາລະນະສຸກສອດຄ່ອງກັບມະຕິ 9  ແລະ  10 ຂອງພັກ, ກໍຄືດ້ານຄຸນນະພາບຂອງວຽກງານສາທາລະນສຸກ, ສະໜອງການບໍລິການໃຫ້ທົ່ວເຖິງ, ໂດຍຖືເເອົາວຽກງານອະນາໄມ, ກັດພະຍາດ ແລະ ສົ່ງເສີມສຸຂະພາບເປັນຕົ້ນຕໍ, ໂດຍສະເພາະໃນຕໍ່ໜ້ານີ້ທິດທາງຂອງວຽກງານສາທາລະນະສຸກຈະຕ້ອງໄດ້ເພີ່ມທະວີເຮັດໃຫ້ການບໍລິການດ້ານສຸຂະພາບກ້ວາງຂວາງດີຂື້ນກວ່າເກົ່າດັ່ງນັ້ນຂະແໜງສາທາລະນະສຸກຈະຕ້ອງໄດ້ມີການປັບປຸງຕົນເອງເປັ້ນຕົ້ນແມ່ນການພັດ ທະນາດ້ານບຸກຄະລາກອນ, ພັດທະນາດ້ານການເງິນໃຫ້ເປັນລະບົບເຮັດໃຫ້ປະຊາຊົນລາວບັນດາເຜົ່າໄດ້ເຂົ້າເຖິງການບໍລິການສາທາລະນະສຸກຫຼາຍຂຶ້ນ, ເອົາໃຈໃສ່ພັດທະນາດ້ານການຄຸ້ມຄອງບໍລິຫານ, ພັດທະນາດ້ານການບໍລິການໃຫ້ມີຄຸນນະພາບ ແລະ ພັດທະນາດ້ານຂໍ້ມູນຂ່າວສານ ແລະ ການລາຍງານຕ່າງໆທາງດ້ານສາທາລະນະສຸກໃຫ້ເປັນລະບົບ, ຊຶ່ງທັງໝົດນັ້ນລ້ວນແລ້ວແຕ່ເປັນວຽກງານທີ່ພົວພັນ ແລະ ກ່ຽວຂ້ອງກັນໃນຂະແໜງສາທາລະນະສຸກ ແລະ ແຍກອອກຈາກກັນບໍ່ໄດ້, ດັ່ງນັ້ນກອງປະຊຸມຄັ້ງນີ້ມີຄຄວາມສຳຄັນຫຼາຍເພື່ອຈະຊ່ວຍໃຫ້ວຽກງານສາທາລະນະສຸກກ້າວໄປສູ່ຄຸນພະພາບ ແລະ ເປັນລະບົບ, ໂດຍການຈັດຕັ້ງປຕິບັດລະບຽບກົດໝາຍ ແລະ ການຊີ້ທາງໃຫ້ພະນັກງານແພດໝໍຂອງຂະແໜງສາທາລະນະສຸກໃຫ້ມີຄຸນນະພາບຫຼາຍຂຶ້ນ, ເຊັ່ນດຽວກັບຂົງເຂດພາກພື້ນ ແລະ ສາກົນທີ່ຕ້ອງການໃຫ້ມີການຄຸ້ມຄອງທາງດ້ານການບໍລິການສຸຂະພາບ, ຊຶ່ງຖືເປັນພັນທະໜຶ່ງທີ່ປະເທດເຮົາຈະຕ້ອງໄດ້ຈັດຕັ້ງປະຕິບັດ, ໂດຍສະເພາະແມ່ນ, ການຄຸ້ມຄອງວິຊາຊີບ, ວິຊາສະເພາະການແພດ, ທັນຕະແພດ ແລະ ພະຍາບານຜະດຸງຄັນ.

          ທ່ນ ລັດຖະມົນຕີກ່າວວ່າ: ສຳລັບການຄຸ້ມຄອງການປະຕິບັດວຽກງານຂອງແພດໝໍໃນໄລຍະຜ່ານມາເຖິງວ່າຈະມີກົດໝາຍການປິ່ນປົວ, ກົດໝາຍອາຫານ ແລະ ຢາ, ກົດໝາຍອະນາໄມກັນພະ ຍາດແຕ່ວ່າການຈັດຕັ້ງປຕິບັດວຽກງານຕົວຈິ່ງຍັງບໍ່ທັນດີເທົ່າທີ່ຄວນ, ດັ່ງນັ້ນຖ້າຫາກວ່າພວກເຮົາມີສະພາຄຸ້ມຄອງວິຊາຊີບເກີດຂຶ້ນ, ຈະເຮັດໃຫ້ການຈັດຕັ້ງປະຕິບັດວຽກງານຂອງຂະແໜງສາທາລະນະສຸກເປັນລະບົບດີ, ມີລະບົບ ແລະ ກວ້າງຂວາງ.