ປັດຈຸບັນ ນະຄອນຫລວງວຽງຈັນພວມສຸມໃສ່ປັບປຸງພື້ນຖານໂຄງລ່າງ
ນັບທັງສະຖານທີ່ພັກເຊົາ, ໂຮງແຮມ, ຮ້ານອາຫານ, ຖະໜົນຫົນທາງ ຕະຫລອດຮອດຄວາມເປັນລະບຽບຮຽບຮ້ອຍຕ່າງໆ
ເພື່ອຮອງຮັບການເປັນເຈົ້າພາບຈັດກອງປະຊຸມທ່ອງທ່ຽວອາຊຽນ (ATF) ຄັ້ງທີ 32
ເຊິ່ງຈະມີຂຶ້ນໃນລະຫວ່າງວັນທີ 17-24 ມັງກອນນີ້ ໃຫ້ມີບັນຍາ ກາດ ຄຶກຄື້ນ
ແລະ ຮັບປະກັນຜົນສຳເລັດສູງ. ໜຶ່ງໃນນັ້ນກໍແມ່ນການລົງມືກໍ່ສ້າງທາງຮ່ອມ
1, ຮ່ອມ 8 ແລະ ຮ່ອມ 10 ເຂດບ້ານສີດຳດວນ ລວມມີຄວາມຍາວ 800 ແມັດ ແລະ ເສັ້ນທາງຮ່ອມ
1 ແລະ ຮ່ອມ 2 ຍາວ 214 ແມັດ ເປັນເສັ້ນທາງເບຕົງ. ເສັ້ນທາງຮ່ອມດັ່ງກ່າວແມ່ນນອນຢູ່ໃນເຂດໃຈກາງຂອງເມືອງຈັນທະບູລີ
ເພື່ອແນໃສ່ອຳນວຍຄວາມສະ ດວກໃຫ້ແກ່ການສັນຈອນໄປມາໃນເຂດໃຈກາງຕົວເມືອງດີຂຶ້ນ.
ດັ່ງທ່ານ ວິໄຊ ໄລລະມິດມົງຄຸນ ກຳມະການຜູ້ຈັດການບໍລິສັດເດືອນສະຫວັນກຣຸບຈຳກັດ
ເຊິ່ງເປັນບໍລິສັດທີ່ໄດ້ລົງທຶນກໍ່ສ້າງເສັ້ນທາງຮ່ອມດັ່ງກ່າວ ໄດ້ລາຍງານຕໍ່ນັກຂ່າວໜັງສືພິມລາວພັດທະນາ
ໃນວັນທີ 9 ມັງກອນນີ້ວ່າ: ໃນຄວາມຈິງແລ້ວ ບໍລິສັດຂອງຕົນແມ່ນໄດ້ເຕີບໃຫຍ່ມາຈາກເຮັດບໍລິການຂົນສົ່ງມາຫລາຍກວ່າ
30 ປີ
ແລ້ວ, ແຕ່ໂດຍມອງເຫັນເຖິງຄວາມຕ້ອງການຂອງການພັດທະນາພື້ນຖານໂຄງລ່າງຂອງລາວ,
ບໍລິສັດຈຶ່ງໄດ້ຫັນມາເຮັດວຽກງານກໍ່ສ້າງຕື່ມອີກ ແລະ ກໍໂຊກດີທີ່ໄດ້ລົງທຶນກ່ອນ
ເພື່ອຮັບເໝົາກໍ່ສ້າງເສັ້ນທາງເບຕົງສາຍສຳຄັນນີ້ ຄືເສັ້ນທາງຮ່ອມ 1, ຮ່ອມ
8 ແລະ ຮ່ອມ 10 ໃນເຂດບ້ານສີດຳດວນ ມີມູນຄ່າການລົງທຶນ 4,6 ຕື້ກີບ, ໃນນັ້ນ
ມີທຶນສົມທົບຂອງປະຊາຊົນ 10% ໂດຍຈະສ້າງເປັນທາງເບຕົງເສີມຫລັງກວ້າງ 5 ແມັດ
ພ້ອມຮ່ອງລະບາຍນ້ຳທີ່ໄດ້ມາດຕະຖານ, ສ່ວນເສັ້ນທາງຮ່ອມ 1 ແລະ ຮ່ອມ 2 ບ້ານຊຽງຍືນ
ຈະສ້າງເປັນເສັ້ນ ທາງເບຕົງເສີມຫລັກ ກວ້າງ 5 ແມັດ ຕົກເປັນມູນຄ່າຫລາຍກວ່າ
1,2 ຕື້ກີບ, ໃນນັ້ນ ມີທຶນປະກອບ ສ່ວນຂອງປະຊາຊົນ 30%, ສ່ວນເຫລືອເປັນທຶນລັດ.
ພາຍຫລັງສຳເລັດການກໍ່ສ້າງແລ້ວ, ລັດຈະສົ່ງທຶນດັ່ງກ່າວໃຫ້ບໍລິສັດຜູ້ຮັບເໝົາ.
ໃນໂອກາດນີ້, ຜູ້ຈັດການບໍລິສັດດັ່ງກ່າວກໍຮຽກຮ້ອງມາຍັງປະຊາຊົນຜູ້ຢູ່ເຂດໂຄງການຈົ່ງໄດ້ອຳນວຍຄວາມສະດວກ
ແລະ ໃຫ້ການຮ່ວມມືປະຕິບັດການກໍ່ສ້າງໃຫ້ສຳເລັດລົງໂດຍໄວຕາມຄາດໝາຍວາງໄວ້ພາຍໃນ
6 ເດືອນ. ທັງນີ້ກໍເພື່ອສ້າງຄວາມສະດວກໃຫ້ແກ່ການສັນ ຈອນໄປມາບົນເສັ້ນທາງຮ່ອມດັ່ງກ່າວ
ທັງເປັນການປະກອບ ສ່ວນພັດທະນາພື້ນຖານໂຄງລ່າງຂອງນະຄອນຫລວງວຽງຈັນນັບມື້ຈະເລີນຮຸ່ງເຮືອງ.
No comments:
Post a Comment