ນັກທ່ອງທ່ຽວຕ່າງປະເທດຖືກດຶງຖົງແຕ່ໂຈນໂຊກຮ້າຍມືເຂົ້າຕີນລົດຂອງຕົນຈົນຂາດ

         ທ້າວ ວັດທະນາ ອາຍຸ 22 ປີ ຖືກນຳສົ່ງ ໂຮງໝໍ ມະໂຫສົດ ຢ່າງຮີບ ດ່ວນເພາະມືເບື້ອງຊ້າຍຂາດຍ້ອນຖືກ ຜັນເຂົ້າ ໃນດີ້ວຕີນ ລົດຈັກຂອງຕົນຫລັງຮ່ວມ ກັບນ້ອງຊາຍ ອີກຄົນໜຶ່ງຊື່ທ້າວ ລາດຊະວົງ ອາຍຸ 20 ປີຖືກນຳ ສົ່ງໃຫ້ເຈົ້າ ໜ້າທີ່ ປກສ ເມືອງສີສັດຕະນາກ ນະຄອນຫລວງວຽງຈັນຍ້ອນທັງສອງກໍໍ່ເຫດດຶງ ຖົງນັກທ່ອງທ່ຽວຕ່າງປະເທດຢູ່ ເສັ້ນທາງລ້ານຊ້າງ, ແຕ່ໂຊກບໍ່ເຂົ້າຂ້າງເຮັດໃຫ້ລົດ ລົ້ມລົງຈົນໄດ້ຮັບບາດເຈັບດັ່ງກ່າວ.

    ຕາມການລາຍງານຂອງເຈົ້າໜ້າທີ່ ປກສ ເມືອງສີສັດຕະ ນາກ ໃຫ້ຮູ້ວ່າ: ເຫດການດັ່ງກ່າວເກີດຂຶ້ນເວລາປະມານ 9:00 ໂມງເຊົ້າຂອງວັນທີ 23 ກຸມພາ 2013. ໂດຍມີນັກທ່ອງ ທ່ຽວປະເທດການາດາ ອາຍຸ 66 ປີ ແລະ ພັນລະ ຍາອາຍຸ 50 ປີ ພາກັນຍ່າງມາຕາມເສັ້ນທາງລ້ານຊ້າງ ແຕ່ພໍຮອດໜ້າສຳ ນັກງານທະນາຄານກຸງໄທ ຈຶ່ງມີຄົນຮ້າຍສອງຄົນຂີ່ລົດຈັກໝາຍເລກ ທະບຽນ 9466 ດຶງຖົງຂອງນັກທ່ອງທ່ຽວດັ່ງກ່າວ, ແຕ່ນັກທ່ອງທ່ຽວຊາຍໄດ້ຖົກເອົາຖົງຄືນຈຶ່ງເຮັດໃຫ້ລົດຈັກຂອງຄົນ ຮ້າຍ

ເສຍຫລັກລົ້ມລົງ ແລະ ພໍດີແຂນຂອງ ທ້າວ ວັດທະນາ ໜຶ່ງໃນຄົນຮ້າຍໄດ້ສອດເຂົ້າດີ້ວລົດຈັກຂອງຕົນທີ່ຂີ່ມາກໍໍ່ເຫດຈົນມື ຂາດ. ຈາກນັ້ນຈຶ່ງມີພົນລະເມືອງຢູ່ໃກ້ຄຽງຈຸດເກີດເຫດໄດ້ແຈ້ງຫາເຈົ້າໜ້າທີ່ເພື່ອນຳຄົນຮ້າຍທີ່ບາດເຈັບສົ່ງໂຮງໝໍ, ສ່ວນ ຄົນ ຮ້າຍອີກຄົນໜຶ່ງແມ່ນສົ່ງໃຫ້ເຈົ້າໜ້າທີ່ດຳເນີນຄະດີຕາມລະບຽບກົດໝາຍ.

       ເຈົ້າໜ້າທີ່ໃຫ້ຮູ້ວ່າ: ທີ່ຜ່ານມາເຖິງແມ່ນເຈົ້າໜ້າທີ່ຈະສຸມຄວາມພະຍາຍາມສະກັດກັ້ນ ແລະ ແກ້ໄຂສະພາບຫຍໍ້ທໍ້ຂອງ ສັງຄົມທີ່ເກີດຂຶ້ນເຊັ່ນ: ການປຸ້ນຈີ້ຊິງຊັບຂອງພົນລະເມືອງໃຫ້ຫລຸດໜ້ອຍລົງເທື່ອລະກ້າວ, ແຕ່ປາກົດວ່າບັນຫາຍັງເກີດຂຶ້ນ ມີໃຫ້ເຫັນຢ່າງລຽນຕິດ ໂດຍສະເພາະແມ່ນຢູ່ໃນຕົວເມືອງໃຫຍ່ເຊິ່ງຜູ້ກໍເຫດສ່ວນຫລາຍກໍແມ່ນລູກຫລານຢູ່ໃນໄວທີ່ພວມ ເປັນນັກຮຽນ-ນັກສຶກສາອາຍຸປະມານ 16-25 ປີ ທີ່ເປັນຜົນມາຈາກການຫລົງເຂົ້າໄປພົວພັນກັບສິ່ງເສບຕິດ ແລະ ສິ່ງອະ ບາຍະມຸກຕ່າງໆ. ສະນັ້ນ, ເພື່ອຫລຸດຜ່ອນບັນດັ່ງກ່າວ, ທຸກພາກສ່ວນໃນສັງຄົມຕ້ອງໄດ້ພ້ອມກັນເປັນເຈົ້າການໃນການແກ້ ໄຂບັນຫາ ແລະ ຊ່ວຍເປັນຫູເປັນຕາໃຫ້ເຈົ້າໜ້າທີ່ເພື່ອສະກັດກັ້ນສິ່ງຫຍໍ້ທໍ້ດັ່ງກ່າວ. ພ້ອມນັ້ນຜູ້ເປັນພໍ່ແມ່ ຫລື ຜູ້ປົກຄອງກໍ ຕ້ອງໄດ້ເພີ່ມທະວີການຕັກເຕືອນບອກສອນລູກຫລານຂອງຕົນຢ່າງເປັນປະຈຳເພື່ອບໍ່ໃຫ້ພວກເຂົາເຂົ້າໄປຫຍຸ້ກ່ຽວກັບສີ່ງບໍ່ດີ ຕ່າງໆໂດຍສະເພາະແມ່ນບັນຫາຢາເສບຕິດ.