ເຈົ້າໜ້າທີ່ນະຄອນຫລວງວຽງຈັນເປີດເຜີຍໜຶ່ງປີຜ່ານມາການຈັບຜູ້ຄ້າຢາເສບຕິດສ່ວນຫລາຍໄດ້ພຽງລາຍຍ່ອຍ

       ຄະນະກຳມະການກວດກາ ແລະ ຄວບຄຸມຢາເສບຕິດ ນະຄອນຫລວງວຽງຈັນ ເປີດເຜີຍຢູ່ກອງປະຊຸມສະຫລຸບວຽກ ງານປະ ຈຳປີ 2012 ຂອງຄະນະກຳມະການຕົນວ່າ:ໜຶ່ງປີຜ່ານມາເຖິງວ່າກຳລັງເຈົ້າໜ້າທີ່ຈະສາມາດຈັບກຸ່ມຜູ້ຄ້າຂາຍຢາເສບ ຕິດໄດ້ເປັນຈຳນວນຫລາຍກໍຕາມແຕ່ກໍເປັນພຽງຜູ້ຄ້າຂາຍລາຍຍ່ອຍເທົ່ານັ້ນ, ສ່ວນການຈັບກຸ່ມຜູ້ຄ້າຂາຍລາຍໃຫຍ່ແມ່ນເຮັດ ໄດ້ຍາກຈຶ່ງເຮັດໃຫ້ບັນຫາຢາເສບ ຕິດຍັງມີການຈຳໜ່າຍແຜ່ຫລາຍໃນສັງຄົມ.

    ຄະນະກຳມະການດັ່ງກ່າວໃຫ້ຮູ້ວ່າ: ໜຶ່ງປີຜ່ານມາ, ຕຳຫລວດຕ້ານ ແລະສະກັດກັ້ນຢາເສບຕິດນະຄອນຫລວງວຽງຈັນ ສາມາດມ້າງຄະດີຢາເສບຕິດໄດ້ 62 ກໍລະນີ, ມີຜູ້ຕ້ອງຫາ 137 ຄົນ,ຍິງ 18, ໃນນັ້ນຕ່າງປະເທດ 10 ຄົນ. ຢຶດ ຂອງກາງປະ ເພດຢາບ້າໄດ້ 36 ພັນກວ່າເມັດ,ຢາໄອ 0,6 ກຣາມ, ກັນຊາແຫ້ງ 1500 ກວ່າກິໂລກຣາມ ແລະ ແປ້ງສານເຄມີຜະ ລິດຢາ ເສບຕິດນ້ຳໜັກ 226 ກວ່າ ກິໂລກຣາມ ໂດຍທັງໝົດແມ່ນ ໄດ້ມີການນຳໄປທຳລາຍໃນວັນສາກົນຕ້ານຢາເສບຕິດ 26 ມິຖຸ ນາ. ຈາກຕົວເລກດັ່ງກ່າວເຫັນວ່າ: ການສະກັດກັ້ນ ແລະ ແກ້ໄຂບັນຫາຢາເສບຕິດຢູ່ນະຄອນຫລວງວຽງຈັນແມ່ນໄດ້ມີການ ປະສານສົມທົບຈາກຫລາຍພາກສ່ວນເປັນຢ່າງດີນັບທັງບ້ານ, ເມືອງເຮັດໃຫ້ສາມາດມ້າງແກ໊ງກຸ່ມຄ້າຂາຍ ແລະ ມົ້ວສຸມຢາເສບ

ຕິດໄດ້ເປັນຈຳນວນບໍ່ໜ້ອຍໃນໄລຍະຜ່ານມາ. ແຕ່ຄຽງຄູ່ກັບຜົນງານດັ່ງກ່າວນັ້ນກໍເຫັນຍັງມີຫລາຍຈຸດຈະໄດ້ເອົາໃຈໃສ່ຕື່ມ ເພື່ອໃຫ້ບັນຫາຢາເສບຕິດຢູ່ໃນຕົວເມືອງຫລຸດໜ້ອຍລົງ ເນື່ອງຈາກວ່າຜູ້ທີ່ຖືກເຈົ້າໜ້າທີ່ຈັບໄດ້ສ່ວນຫລາຍແມ່ນຂະບວນການ ຄ້າຂາຍຢາເສບຕິດລາຍຍ່ອຍເຊິ່ງບໍ່ແມ່ນບຸກຄົນທີ່ເປັນຂະບວນການໃຫຍ່ ຫລື ຫົວໂປ່ໂຕ ການສະນັ້ນຈຶ່ງເຮັດໃຫ້ບັນຫາຢາ ເສບຕິດຍັງມີການຈຳໜ່າຍຢ່າງແຜ່ຫລາຍໃນສັງຄົມໂດຍສະເພາະແມ່ນຢູ່ໃນກຸ່ມໄວໜຸ່ມນັກຮຽນ-ນັກສຶກສາ ແລະ ກຳມະ ກອນຜູ້ອອກແຮງງານເຊິ່ງບັນຫາດັ່ງກ່າວສ່ວນໜຶ່ງມີຊ່ອງຫວ່າງມາຈາກຄະນະພັກອຳນາດການປົກຄອງ ແລະ ອົງການ ຈັດຕັ້ງ ມະຫາຊົນຂັ້ນຕ່າງໆຍັງບໍ່ທັນເອົາໃຈໃສ່ ແລະໃຫ້ຄວາມສຳຄັນຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດເທົ່າທີ່ຄວນ,  ຍັງມີແນວຄິດຢຸດໆຢ່ອນໆອ່ຽງໄປຕາມກະແສແນວຄິດຂອງກຸ່ມຄົນຈຳນວນໜ້ອຍທີ່ເສຍຜົນປະໂຫຍດ ແລະ ຜູ້ປົກຄອງ ຂອງຜູ້ຕິດຢາເສບຕິດຈຳນວນໜຶ່ງປິດບັງຄວາມຈິງຕໍ່ອຳນາດການປົກຄອງ ແລະ ເຈົ້າໜ້າທີ່ຈຶ່ງເຮັດໃຫ້ການຈັບໄດ້ຜູ້ເປັນຫົວ ໂປ່ໂຕການໃຫຍ່ມາດຳເນີນຄະດີໄດ້ຍາກ.