laophatthananewspaper: ລາວ-ແຊັກບີ ເພີ່ມທະວີການພົວພັນຮ່ວມມື

ຕອບສະໜອງຕາມຄຳເຊີນຂອງ ທ່ານ ດຣ. ທອງລຸນ ສີສຸລິດ ຮອງນາຍົກ ລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ, ທ່ານ ອີວານ ເມີກິກ ລັດຖະມົນຕີວ່າການກະຊວງການຕ່າງປະເທດ ແຫ່ງສາ ທາລະນະລັດ ແຊັກບີ ພ້ອມດ້ວຍຄະນະໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການແຕ່ວັນທີ 22- 25 ກຸມພາ 2013.

ໃນຕອນເຊົ້າຂອງວັນທີ 23 ກຸມພາ 2013 ທ່ານ ດຣ. ທອງລຸນ ສີສຸລິດ, ຮອງນາຍົກລັດຖະ ມົນຕີ, ລັດຖະມົນຕີວ່າການກະຊວງການຕ່າງປະເທດແຫ່ງ ສປປ ລາວ ໄດ້ໃຫ້ກຽດຕ້ອນຮັບ ແລະ ພົບປະປຶກສາຫາລືຢ່າງເປັນທາງການ ກັບທ່ານ ອີວານ ເມີກິກ, ລັດຖະມົນຕີວ່າການກະຊວງການຕ່າງປະເທດແຫ່ງສາທາລະນະລັດ ແຊັກບີ ຢູ່ທີ່ກະຊວງການຕ່າງປະເທດ, ໃນການພົບປະຄັ້ງນີ້ ທັງສອງຝ່າຍໄດ້ຕີລາຄາສູງການພົວພັນ ແລະ ຮ່ວມມືໃນຂອບສອງຝ່າຍກໍຄືຫລາຍຝ່າຍໃນຫລາຍປີຜ່ານ ມາ ແລະ ໄດ້ປຶກສາຫາລື ເພື່ອເສີມຂະຫຍາຍສາຍພົວພັນ ແລະ ການຮ່ວມມືໃນດ້ານຕ່າງໆ ໂດຍສະເພາະແມ່ນການຊອກຊ່ອງທາງຂະຫຍາຍການຮ່ວມມືດ້ານກະສິກຳ, ການສຶກສາ, ເຕັກໂນໂລຊີ ແລະ ອື່ນໆ. ຝ່າຍແຊັກບີ ຍັງໄດ້ປະກາດໃຫ້ທຶນການສຶກສາລະດັບມະຫາວິທະຍາໄລຢູ່ເບນກຣາດ 4 ທຶນສຳລັບສົກປີ 2013-2014. ນອກນັ້ນ ຍັງໄດ້ແລກປ່ຽນຄຳຄິດຄຳເຫັນກ່ຽວກັບບັນຫາສາກົນທີ່ຕ່າງຝ່າຍມີຄວາມສົນໃຈ.

ພ້ອມກັນນີ້ ທັງສອງຝ່າຍຍັງໄດ້ຮ່ວມລົງນາມໃນບົດບັນ ທຶກຄວາມເຂົ້າໃຈ ກ່ຽວກັບການປຶກສາຫາລື ແລະ ການຮ່ວມມືລະຫ່ວາງກະຊວງການຕ່າງປະເທດ ແຫ່ງ ສປປ ລາວ ແລະ ກະ ຊວງການຕ່າງປະເທດແຫ່ງ ສ ແຊັກບີ ຊຶ່ງແມ່ນຜົນສຳເລັດຂອງການພະຍາຍາມຂອງທັງສອງຝ່າຍ ທີ່ມີຈຸດປະສົງຢາກສົ່ງເສີມ ແລະ ຮັດແໜ້ນການຮ່ວມມືກັນ ໃຫ້ນັບມື້ແຕກດອກອອກຜົນຍິ່ງຂຶ້ນ. ນອກນັ້ນ ທັງສອງຝ່າຍຍັງໄດ້ແລກປ່ຽນຄຳຄິດຄຳເຫັນນຳກັນ ເພື່ອຈະກ້າວໄປສູ່ການເຊັນສັນຍາວ່າດ້ວຍການຍົກເວັ້ນພາສີຊ້ຳຊ້ອນ, ສັນຍາວ່າດ້ວຍການສົ່ງເສີມ ແລະ ປົກປ້ອງການລົງທຶນ, ສັນຍາຍົກເວັ້ນວິຊາການທູດ ແລະ ລັດຖະ ການ ແລະ ສັນຍາຮ່ວມມືດ້ານວັດທະນະທຳໃນຕໍ່ ໜ້ານີ້,ການຢ້ຽມຢາມ ສປປ ລາວ ໃນຄັ້ງນີ້ ເປັນເຫດການອັນສຳຄັນແຫ່ງການພົວພັນຮ່ວມມື ລາວ-ເຊີເບຍ, ເປັນການຢ້ຽມ ຢາມຄັ້ງທຳອິດຂອງເຈົ້າໜ້າທີ່ຂັ້ນສູງຂອງແຊັກບີ ພາຍຫລັງແຊັກບີໄດ້ຮັບການສ້າງຕັ້ງເປັນສາທາລະນະລັດ ແຊັກ ບີ ໃນປີ 2006.