laophatthananewspaper: ໄອຍະການຊີ້ແຈງຫລັກການຂອງການກັກຕົວໃນກໍລະນີຄະດີອາຍາ

ທ່ານ ພຸດທະວົງ ບົວລະພາ ຫົວໜ້າໄອຍະການປະຊາຊົນນະ ຄອນຫລວງວຽງຈັນ ໄດ້ໃຫ້ສຳ ພາດຕໍ່ນັກຂ່າວໜັງສືພິມລາວພັດທະນາ ໃນວັນທີ 21 ກຸມພານີ້ ກ່ຽວກັບຫລັກການຂອງການກັກໂຕໃນກໍລະນີຄະດີອາຍາ ຫລັງບັນຫາການກັກຕົວນີ້,ສັງຄົມໃຫ້ຄວາມສົນໃຈຫລາຍ ໂດຍສະເພາະແມ່ນມີຫລາຍກໍລະນີທີ່ຜູ້ຖືກສົງໄສຖືກເຈົ້າໜ້າທີ່ເຊີນເຂົ້າໄປໃຫ້ປາກຄຳ ເພື່ອສືບສວນຄະດີໃດໜຶ່ງ,ແຕ່ພັດຖືກຈັບທັນທີ ທັງໆທີ່ຍັງບໍ່ທັນມີຄຳສັ່ງກັກຕົວຈາກໄອຍະການ.

ຫົວໜ້າໄອຍະການປະຊາຊົນນະຄອນຫລວງວຽງຈັນ ກ່າວວ່າ: ການກັກຕົວແມ່ນມາດຕະ ການສະກັດກັ້ນໜຶ່ງທີ່ນຳໃຊ້ໂດຍອົງການສືບສວນ-ສອບສວນ ຫລື ຫົວໜ້າອົງການໄອຍະການປະ ຊາຊົນ ເພື່ອກັກໂຕຜູ້ຖືກສົງໄສໄວ້ສອບສວນພາຍໃນກຳນົດ 48 ຊົ່ວໂມງ ໂດຍບໍ່ມີການຕໍ່ກຳນົດຕື່ມອີກໄດ້. ການກັກໂຕຕ້ອງມີຄຳສັ່ງເປັນລາຍລັກອັກສອນຂອງຫົວ ໜ້າອົງການສືບສວນ-ສອບສວນ ຫລື ຫົວໜ້າອົງການໄອຍະການປະຊາຊົນ. ໃນກໍລະນີທີ່ຫົວໜ້າອົງການສືບສວນ-ສອບສວນອອກຄຳສັ່ງກັກຕົວນັ້ນ ຕ້ອງລາຍງານໃຫ້ຫົວໜ້າອົງການໄອຍະການປະຊາຊົນຊາບພາຍໃນກຳນົດ 24 ຊົ່ວໂມງ ນັບແຕ່ເວລາທີ່ໄດ້ກັກໂຕເປັນຕົ້ນໄປ. ຕາມມາດ ຕາ 138 ຂອງກົດໝາຍວ່າດ້ວຍການດຳເນີນຄະດີອາຍາສະບັບປັບປຸງປີ 2012.

ການກັກໂຕດຳເນີນໃນ 2 ກໍລະນີ ຄືໃນເວລາທີ່ເຈົ້າໜ້າທີ່ສືບສວນ-ສອບສວນ ຫລື ພະນັກງານໄອຍະການເອົາຄຳໃຫ້ ການຂອງບຸກຄົນໃດໜຶ່ງ ຖ້າຫາກເຫັນວ່າຜູ້ກ່ຽວອາດຈະເປັນຜູ້ກະທຳຜິດແລ້ວ ກໍສາມາດກັກໂຕຜູ້ກ່ຽວໄວ້ໄດ້, ແຕ່ຕ້ອງຂໍຄຳສັ່ງກັກໂຕຈາກຫົວໜ້າອົງການສືບສວນ-ສອບສວນ ຫລື ຫົວໜ້າອົງການໄອຍະການປະຊາຊົນ. ຕົວຢ່າງ ທ້າວ ກໍ ຮ້ອງຟ້ອງທ້າວ ຂໍ ໃນສະຖານສໍ້ໂກງຊັບຂອງພົນລະເມືອງ ຫລື ໃນສະຖານຍັກຍອກຊັບຂອງພົນ ລະເມືອງ ໃນມູນຄ່າຄວາມເສຍຫາຍ 100 ລ້ານກີບ. ໃນກໍລະນີດັ່ງກ່າວ ເຈົ້າໜ້າທີ່ສືບສວນ- ສອບສວນ ຫລື ພະນັກງານໄອຍະການ ຕ້ອງໄດ້ເອົາຄຳໃຫ້ການທ້າວ ຂໍ. ຜ່ານການເອົາຄຳໃຫ້ ການທ້າວ ຂໍ ແລ້ວເຫັນວ່າມີຂໍ້ມູນຢັ້ງຢືນວ່າທ້າວ ກໍ ໄດ້ກະທຳຜິດທາງອາຍາ ຈຶ່ງໄດ້ກັກໂຕເພື່ອດຳເນີນການສືບສວນ-ສອບສວນ.

ໃນເວລາລົງເກັບກຳຂໍ້ມູນຫລັກຖານໃນການດຳເນີນຄະດີອາຍານັ້ນ ຖ້າຫາກມີການສົງໄສບຸກຄົນໃດໜຶ່ງມີສ່ວນພົວພັນກັບການກະທຳຜິດ, ເຈົ້າໜ້າທີ່ສືບ ສວນ-ສອບສວນ, ພະນັກງານສອບສວນຕ້ອງສອບສວນຜູ້ກ່ຽວກັບທີ່ຖ້າຫາກເຫັນວ່າມີຄວາມຈຳເປັນຕ້ອງໄດ້ກັກຕົວຜູ້ກ່ຽວເພື່ອທຳການສືບສວນ-ສອບສວນຕື່ມອີກຕ້ອງຂໍຄຳສັ່ງກັກຕົວຜູ້ກ່ຽວຈາກຫົວໜ້າອົງການສືບສວນ-ສອບສວນຫລື ຫົວໜ້າອົງການໄອຍະການປະຊາຊົນ.

ການກັກຕົວໃນທຸກກໍລະນີ ເຈົ້າໜ້າທີ່ສືບສວນ-ສອບສວນ ຫລື ພະນັກງານໄອຍະການ ຕ້ອງອ່ານຄຳສັ່ງກັກໂຕ ພ້ອມທັງແຈ້ງສິດ ແລະ ພັນທະໃຫ້ຜູ້ຖືກກັກຕົວຊາບ ແລະ ແຈ້ງສະຖານທີ່ກັກໂຕໃຫ້ຄອບຄົວ, ສຳນັກງານ, ອົງການ ຫລື ວິສາຫະກິດທີ່ຜູ້ກ່ຽວສັງກັດຢູ່ຊາບພາຍໃນກຳນົດ 24 ຊົ່ວໂມງ.

ພາຍຫລັງຫົວໜ້າອົງການສືບສວນ-ສອບສວນ ຫລື ຫົວໜ້າອົງການໄອຍະການປະຊາຊົນໄດ້ຮັບໃບສະເໜີ ແລະ ບົດລາຍງານກ່ຽວກັບການຂໍຄຳສັ່ງກັກຕົວຈາກເຈົ້າໜ້າທີ່ສືບສວນ-ສອບສວນ, ພະນັກງານໄອຍະການແລ້ວຕ້ອງທຳການຄົ້ນຄວ້າຖ້າເຫັນວ່າບໍ່ມີຄວາມຈຳເປັນກໍບໍ່ຕ້ອງອອກຄຳສັ່ງກັກຕົວ ແລະ ໃຫ້ທຳການປ່ອຍຕົວບຸກຄົນດັ່ງກ່າວ. ແຕ່ຖ້າເຫັນວ່າການສະເໜີມານັ້ນສົມເຫດສົມຜົນມີຂໍ້ມູນຢ່າງໜັກແໜ້ນ ແລະ ເຫັນວ່າມີຄວາມຈຳເປັນຕ້ອງທຳການກັກຕົວຜູ້ຖືກສົງໄສດັ່ງກ່າວ,ຫົວໜ້າອົງການສືບສວນ-ສອບສວນ ຫລື ຫົວໜ້າໄອຍະການປະຊາຊົນກໍຕ້ອງອອກຄຳສັ່ງກັກຕົວຕາມການສະເໜີ.

ພາຍຫລັງໄດ້ກັກຕົວຜູ້ຖືກສົງໄສແລ້ວເຈົ້າໜ້າທີ່ສືບສວນ-ສອບ ສວນ, ພະນັກງານໄອຍະການຕ້ອງເອົາຄຳໃຫ້ການພາຍໃນກຳ ນົດ 48 ຊົ່ວໂມງ ແລະ ຕ້ອງລົງຄຳເຫັນຊີ້ຂາດວ່າຈະປ່ອຍຕົວ ຫລື ຈະຂໍຄຳສັ່ງກັກຂັງພາງຈາກຫົວໜ້າອົງການໄອຍະການປະຊາ ຊົນ ເພື່ອສືບຕໍ່ດຳເນີນການສືບສວນ-ສອບສວນຄະດີອາຍາດັ່ງ ກ່າວ.

ໃນກໍລະນີຖ້າເຫັນວ່າບໍ່ມີຂໍ້ມູນຫລັກຖານໜັກແໜ້ນທີ່ຈະພາໃຫ້ເປີດການສືບສວນ-ສອບສວນໄດ້ຫົວໜ້າອົງການສືບ ສວນ-ສອບສວນຕ້ອງທຳການປ່ອຍຕົວພ້ອມທັງລາຍງານໃຫ້ຫົວໜ້າອົງການໄອຍະການປະຊາຊົນຊາບໃນທັນໃດ.

ໃນກໍລະນີທີ່ເຫັນວ່າມີຂໍ້ມູນຫລັກຖານໜັກແໜ້ນທີ່ພາໃຫ້ເປີດການສືບສວນ-ສອບສວນໄດ້ຫົວໜ້າອົງການສືບສວນ-ສອບສວນ ຫລື ຫົວໜ້າອົງການໄອຍະການປະຊາຊົນຕ້ອງອອກຄຳສັ່ງເປີດການສືບສວນ-ສອບສວນ. ຖ້າຫົວໜ້າອົງການສືບ ສວນ-ສອບສວນເປັນຜູ້ອອກຄຳສັ່ງເປີດການສືບສວນ-ສອບສວນນັ້ນຕ້ອງລາຍງານ ແລະ ຂໍຄຳສັ່ງກັກຂັງພາງຈາກຫົວໜ້າອົງ ການໄອຍະການປະຊາຊົນ. ສຳລັບພະນັກງານໄອຍະການຕ້ອງຂໍຄຳສັ່ງເປີດການສືບສວນ-ສອບສວນ ແລະ ຂໍຄຳສັ່ງກັກຂັງພາງຈາກຫົວໜ້າອົງການໄອຍະການປະຊາຊົນ.