ກະຊວງຊັບພະຍາກອນທຳມະຊາດ
ແລະ ສິ່ງແວດລ້ອມອອກຄຳສັ່ງໃຫ້ພະແນກກ່ຽວຂ້ອງເພີ່ມທະວີການເອົາໃຈໃສ່ປ້ອງກັນ
ແລະ ສະກັດກັ້ນໄຟໄໝ້ປ່າໃນລະດູແລ້ງທີ່ຈະເຖິງນີ້.
ກະຊວງຊັບພະຍາກອນທຳມະຊາດ
ແລະ ສິ່ງແວດລ້ອມ ໄດ້ອອກຄຳສັ່ງແນະນຳ ເພື່ອໃຫ້ພະແນກການກ່ຽວຂ້ອງຢູ່ນະຄອນ
ຫລວງວຽງຈັນ ແລະ ທ້ອງຖິ່ນເພີ່ມທະວີຄວາມເອົາໃຈໃສ່ຕໍ່ວຽກງານປ້ອງກັນ ແລະ
ສະກັດກັ້ນໄຟໄໝ້ລາມປ່າໃນລະດູແລ້ງສົກປີ 2012-2013, ຫລັງຈາກເຫັນວ່າໃນແຕ່ລະປີຍັງປາກົດມີໄຟໄໝ້ລາມປ່າຢູ່ບາງທ້ອງຖິ່ນ
ເຊິ່ງສາເຫດຕົ້ນຕໍເກີດຈາກການກະທຳຂອງຜູ້ຄົນຈຳນວນໜຶ່ງທີ່ຮູ້ເທົ່າບໍ່ເຖິງການ
ແລະ ຂາດຄວາມຮັບ ຜິດຊອບເຊັ່ນ: ການຈູດປ່າເພື່ອລ່າສັດ, ການຈູດໄຮ່ເພື່ອກຽມດິນປູກພືດ,
ການດັງໄຟ ຫລື ຖິ້ມຂີ້ ກອກຢາໃນປ່າຢ່າງຊະຊາຍ.
ຄຳສັ່ງແນະນຳດັ່ງກ່າວລະບຸວ່າ: ໃຫ້ພະແນກຊັບພະຍາກອນທຳມະຊາດ
ແລະ ສິ່ງແວດລ້ອມປະຈຳແຂວງ ແລະ ນະຄອນ ຫລວງຄົ້ນຄວ້ານຳສະເໜີຕໍ່ເຈົ້າແຂວງ,
ເຈົ້າຄອງນະຄອນຫລວງແຕ່ງຕັ້ງຄະນະຮັບຜິດຊອບຊີ້ນຳລວມເພື່ອສະກັດກັ້ນ ແລະ ປ້ອງກັນໄຟໄໝ້ລາມປ່າໃນລະດູແລ້ງສົກປີ
2012-2013 ເຊິ່ງຄະນະດັ່ງກ່າວປະກອບມີຮອງເຈົ້າແຂວງ, ຮອງເຈົ້າ ຄອງນະຄອນເປັນຫົວໜ້າ,
ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມປະຈຳແຂວງ, ນະຄອນຫລວງເປັນຮອງ
ຫົວໜ້າທັງເປັນຜູ້ປະຈຳການ,
ຫົວໜ້າພະແນກກະສິກຳ ແລະ ປ່າໄມ້ປະຈຳແຂວງ, ນະຄອນຫລວງເປັນຮອງຫົວໜ້າ ແລະ ບັນດາຮອງຫົວໜ້າພະແນກການອ້ອມຂ້າງແຂວງ,
ນະຄອນຫລວງ, ກອງບັນຊາການ ປກຊ-ປກສ ເປັນຄະນະ. ພ້ອມກັນນັ້ນ ກໍສະເໜີໃຫ້ຄະນະຮັບຜິດຊອບລວມດັ່ງກ່າວນີ້ອອກແຈ້ງການໃຫ້ເຈົ້າເມືອງແຕ່ລະເມືອງທີ່ມີປ່າໄມ້ແຕ່ງຕັ້ງອະນຸກຳມະການຂັ້ນເມືອງ
ແລະ ໜ່ວຍງານປະຈຳບ້ານຂຶ້ນ ເພື່ອຮັບຜິດ ຊອບ ໂດຍປະສານສົມທົບກັບໜ່ວຍງານກໍ່ສ້າງຮາກຖານການເມືອງ
ແລະ ຄະນະຮັບຜິດຊອບການຈັດຕັ້ງເຮັດທົດລອງວຽກງານ 3 ສ້າງ ເພື່ອເຮັດໜ້າທີ່ໂຄ
ສະນາເຜີຍແຜ່ຄຳສັ່ງແນະນຳສະ ບັບນີ້ ແລະ ນິຕິກຳຕ່າງໆກ່ຽວກັບຄຸ້ມຄອງຊັບພະຍາກອນປ່າໄມ້ທີ່ເຫັນວ່າຈຳເປັນ
ໂດຍສະເພາະການວາງແຜນ,ກຳນົດມາດ ຕະການ ແລະ ວິທີການເພື່ອປ້ອງກັນ ແລະ ສະກັດກັ້ນໄຟໄໝ້ລາມປ່າ,
ການດັບມອດໄຟ ແລະ ການສ່ອງແສງລາຍງານໃຫ້ໄດ້ຢ່າງທັນການ ແລະ ມີປະສິດທິພາບ.
ສຳລັບວິທີການ ແລະ ມາດຕະການຕ່າງໆໃຫ້ປະຕິບັດດັ່ງນີ້:
ໃນບ່ອນທີ່ຍັງບໍ່ມີຖາງປ່າເຮັດໄຮ່ຢູ່ຕ້ອງໄດ້ຈັດຕັ້ງແນະນຳໃຫ້ປະຊາຊົນເຮັດຢູ່ສະເພາະເຂດທີ່ໄດ້ກຳນົດໄວ້ສຳລັບການເຮັດໄຮ່ເທົ່ານັ້ນເຊັ່ນ:
ດິນປ່າຊຸດໂຊມ, ດິນທີ່ບໍ່ມີປ່າໄມ້ໃຫຍ່ ແລະ ຕ້ອງຢູ່ຫ່າງໄກຈາກແມ່ນ້ຳບໍ່ໜ້ອຍກວ່າ
500 ແມັດຂຶ້ນໄປ. ກ່ອນຈະຈູດໄຮ່ຕ້ອງຖາງແລວກັນໄຟອ້ອມຮອບເນື້ອທີ່ໄຮ່ໄວ້ໃຫ້ຮັບປະກັນເສຍກ່ອນຈຶ່ງທຳການຈູດ,
ການຈູດໄຮ່ຕ້ອງຈູດຍາມແລງ ຫລື ຍາມແດດອ່ອນ ແລະ ບໍ່ມີລົມແຮງ, ດີແທ້ຕ້ອງຈູດເວລາຕາເວັນຕົກດິນ,
ຫ້າມເດັດຂາດບໍ່ໃຫ້ຖາງປ່າເຮັດໄຮ່ໃສ່ 3 ປະເພດປ່າ ຄືປ່າສະ ຫງວນ, ປ່າປ້ອງກັນ
ແລະ ປ່າຜະ ລິດ ເປັນຕົ້ນປ່າປ້ອງກັນຍອດນ້ຳ, ປ່າປ້ອງກັນແຫລ່ງນ້ຳ, ປ່າປ້ອງກັນລະບົບນິເວດ,
ປ່າຟື້ນຟູ, ປ່າທີ່ຢູ່ຕາມພື້ນທີ່ທີ່ມີຄວາມຄ້ອຍຊັນສູງ ແລະ ປ່າຢູ່ໃກ້ເສັ້ນທາງຄົມ
ມະນາຄົມ; ເຂດປ່າໂຄກ ແລະ ເຂດທຳມາຫາກິນຂອງປະຊາຊົນຕ້ອງໄດ້ແນະນຳໃຫ້ປະຊາຊົນໃນເຂດອ້ອມຂ້າງຈັດຕັ້ງປະຕິບັດຢ່າງເຂັ້ມງວດ
ຄືເວລາເຂົ້າໄປໃນປ່າ ຖ້າຈະດັງໄຟກໍຕ້ອງມີການຖາງອ້ອມຮອບຄັກແນ່ ປ້ອງກັນບໍ່ໃຫ້ໄຟລຸກລາມໄປສູ່ຈຸດອື່ນໄດ້,
ກ່ອນຈະຈາກໄປໃຫ້ເອົານ້ຳຫົດມອດໄຟໃຫ້ດີ ແລະ ອັນສຳຄັນບໍ່ອະນຸຍາດໃຫ້ຈູດເຜົາ
ຫລື ອຸດຕົ້ນໄມ້ ແລະ ປ່າຫຍ້າ ເພື່ອລ່າສັດປ່າ ຫລື ຈຸດປະສົງອື່ນຢ່າງເດັດຂາດ;
ໃນກໍລະນີມີໄຟໄໝ້ລ່າປ່າຢູ່ບ່ອນໃດ ແມ່ນມອບໃຫ້ບ້ານ ແລະ ເມືອງນັ້ນເປັນຜູ້ຮັບຜິດຊອບ
ໃນການປຸກລະດົມປະຊາຊົນຊ່ວຍກັນດັບມອດ, ກໍລະນີໄຟໄໝ້ລາມຢ່າຮຸນແຮງບໍ່ສາມາດດັບມອດໄດ້ຕ້ອງຂໍຄວາມຊ່ວຍເຫລືອຈາກປະຊາຊົນ,
ກຳລັງທະຫານ, ຕຳຫລວດ ແລະ ກົມກອງການຈັດ ຕັ້ງອື່ນໆທີ່ຢູ່ໃກ້ຄຽງ ເພື່ອຊ່ວຍກັນດັບມອດໄຟປ່າ.
ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງ, ໜ່ວຍງານປະຈຳບ້ານຕ້ອງເປັນເຈົ້າການເຝົ້າລະວັງຕິດຕາມແກ້ໄຂ
ພ້ອມທັງລາຍງານໃຫ້ເຈົ້າເມືອງ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມປະຈຳແຂວງ,
ນະຄອນຫລວງ,ອົງການປົກຄອງ ແຂວງ ແລະ ນະຄອນຫລວງເພື່ອ ຮັບຊາບໂດຍດ່ວນ ເພື່ອຫາວິທີແກ້ໄຂຢ່າງທັນການ;ໃຫ້ພະແນກ
ຊັບພະຍາກອນທຳມະຊາດ ແລະ ສິ່ງແວດລ້ອມ ແລະນະຄອນ ຫລວງເປັນເຈົ້າການໃນການຄົ້ນຄວ້ານຳສະເໜີແຜນງົບປະມານສຳຮອງປະຈຳປີຕໍ່ອົງການປົກ
ຄອງທ້ອງຖິ່ນຂອງຕົນ ເພື່ອກຽມຈັດຕັ້ງປະຕິບັດມາດຕະການສະ ກັດກັ້ນໄຟໄໝ້ລາມປ່າ
ຕາມທີ່ໄດ້ກຳນົດໄວ້ໃນມາດຕາ 24 ຂອງກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ
ສະບັບເລກທີ 09/ສພຊ, ລົງວັນທີ 24 ທັນວາ 2007.
ສຳລັບກົມກອງໃດ ແລະ ການຈັດຕັ້ງໃດເຮັດໄດ້ດີມີຜົນງານດີເດັ່ນໃຫ້ນຳສະເໜີຕໍ່ອົງການປົກ
ຄອງທ້ອງຖິ່ນທີ່ຕົນເອງຂຶ້ນກັບປະຕິບັດນະໂຍບາຍຊົມເຊີຍ, ຍ້ອງຍໍຕາມເໝາະສົມຕໍ່ການຈັດຕັ້ງ,
ກຸ່ມບ້ານ ຫລື ບຸກຄົນທີ່ມີຜົນງານດີເດັ່ນນັ້ນແລະຕໍ່ຜູ້ລະເມີດກໍຕ້ອງໄດ້ປະຕິບັດມາດຕະການອັນເດັດຂາດຕໍ່ຜູ້ກ່ຽວຕາມທີ່ໄດ້ກຳນົດໄວ້ໃນພາກທີ
XI ຂອງກົດໝາຍວ່າດ້ວຍປ່າໄມ້ຢ່າງເຂັ້ມງວດ.
ມອບໃຫ້ກົມຄຸ້ມຄອງຊັບພະຍາກອນປ່າໄມ້ສົມທົບກັບພະແນກຊັບພະຍາກອນທຳມະຊາດ
ແລະ ສິ່ງແວດລ້ອມປະຈຳແຂວງ, ນະຄອນຫລວງ ແລະ ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງປະສານກັບພາກສ່ວນທີ່ກ່ຽວຂ້ອງເພື່ອຈັດຕັ້ງປະຕິບັດຄຳສັ່ງສະບັບນີ້ໃຫ້ໄດ້ຮັບຜົນສຳເລັດພ້ອມທັງມີການສະຫລຸບລາຍງານໃຫ້ການນຳກະຊວງຮັບຊາບຢ່າງເປັນປົກກະຕິ.
No comments:
Post a Comment