ຮ້ານບັນເທີງ ແລະ ຮ້ານອາຫານລະເມີດບໍ່ຖືກລະບຽບ

      ຢູ່ນະຄອນຫລວງວຽງຈັນໃນປັດຈຸບັນ, ທຸລະກິດຮ້ານບັນເທີງ, ຮ້ານອາຫານໄດ້ເກີດຂຶ້ນ ເປັນຈຳນວນຫລາຍ  ແລະ ມີ ຫລາຍແຫ່ງເຫັນວ່າຍັງປະຕິບັດຕາມລະບຽບຂອງພາກ ສ່ວນກ່ຽວຂ້ອງວາງອອກບໍ່ ໄດ້ດີເທົ່າທີ່ຄວນອັນໄດ້ເຮັດໃຫ້ເກີດ ມີບັນ ຫາຫຍໍ້ທໍ້ຫລາຍອັນຕາມມາຄືເມື່ອບໍ່ດົນມານີ້, ກົມກວດກາ ແລະ ຄຸ້ມຄອງ ການທ່ອງທ່ຽວ ກະຊວງຖະ ແຫລ່ງຂ່າວ, ວັດທະ ນາທຳ ແລະ ທ່ອງທ່ຽວ ໄດ້ລົງຕິດຕາມສະພາບການບໍລິການຂອງຮ້ານບັນເທີງ ແລະ ຮ້ານອາຫານຫລາຍແຫ່ງ ໃນນະຄອນ ຫລວງວຽງຈັນ ໂດຍ ສະເພາະແມ່ນບັນດາຮ້ານເປົ້າ ໝາຍທີ່ສັງຄົມໄດ້ສ່ອງແສງວ່າມີ ການດຳເນີນທຸລະກິດບໍ່ຖືກລະບຽບ ໂດຍການເປີດສຽງເພງດັງ ເກີນກຳນົດ ເປັນຕົ້ນ: ບັນດາຮ້ານ ປິ້ງຫູໝູ ແລະ ຮ້ານງົວປິ່ນໃນເຂດ ວົງວຽນສາມແຍກບ້ານ ໂພນ ຕ້ອງສະຫວາດເມືອງຈັນທະບູລີ ເຊິ່ງ ບັນດາຮ້ານເຫລົ່ານັ້ນແມ່ນມີການ ເປີດເຄື່ອງສຽງໃຫ້ບໍລິການລູກ ຄ້າຮ້ອງເພງແຮງເກີນ ຄວນພາໃຫ້ລົບກວນປະຊາຊົນອ້ອມຂ້າງ ໃກ້ຄຽງ ແລະ ໃຫ້ບໍລິການເກີນເວ ລາທີ່ກຳນົດໄວ້ຄື 23:30 ໂມງ. ອີກ ບັນຫາໜຶ່ງ ແມ່ນສະຖານທີ່ຂອງ ຮ້ານກໍບໍ່ເໝາະສົມຄັບແຄບ ແລະ ນຳໃຊ້ແຄມທາງ ແລະ ທາງຍ່າງ ເປັນບ່ອນຈອດລົດຂອງລູກຄ້າ ສົ່ງຜົນ ເຮັດໃຫ້ການສັນຈອນໄປມາໃນບໍລິເວນເສັ້ນທາງດັ່ງກ່າວມີຄວາມແອອັດສັບສົນ ແລະ ບາງ ຄັ້ງກໍເກີດອຸປະຕິເຫດ, ສະນັ້ນພາກ ສ່ວນກ່ຽວຂ້ອງຈຶ່ງໄດ້ເຮັດບົດບັນທຶກກັບເຈົ້າຂອງຮ້ານດັ່ງກ່າວ ເພື່ອຫາວິທີແກ້ໄຂໃຫ້ຖືກຕ້ອງຕາມລະບຽບ.

       ແນວໃດກໍຕາມ,ກົມກວດກາ ແລະ ຄຸ້ມຄອງການທ່ອງທ່ຽວ ບອກວ່າ:ໃນນະຄອນຫລວງວຽງຈັນ ຍັງມີຮ້ານບັນເທີງ ແລະ ຮ້ານອາຫານຫລາຍແຫ່ງທີ່ດຳເນີນທຸລະກິດໃນລັກສະນະສວຍໂອກາດ ລະເມີດລະບຽບ ເຊັ່ນ: ປ່ອຍ ໃຫ້ນັກຮຽນທີ່ບໍ່ ທັນເຖິງກະສຽນເຂົ້າໃຊ້ບໍລິການ, ມີການລັກລອບ ຄ້າຂາຍຢາເສບຕິດ ແລະ ສິ່ງລາມົກອານາຈານຕ່າງໆເຊິ່ງບັນຫາດັ່ງກ່າວ ໄດ້ກາຍເປັນປາກົດການຫຍໍ້ທໍ້ຕໍ່ສັງຄົມເຊິ່ງບັນຫານີ້ພາກສ່ວນກ່ຽວຂ້ອງຈະຕ້ອງໄດ້ເອົາໃຈໃສ່ຕິດຕາມກວດກາໃຫ້ດີກວ່າ ເກົ່າເພື່ອໃຫ້ຖືກຕ້ອງຕາມລະບຽບ, ຮັບປະກັນຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍຂອງສັງຄົມ.