laophatthananewspaper: ຄວນມີມາດຕະການເຂັ້ມງວດຕໍ່ການຮັກສາຄວາມສະອາດຂອງໂຄງການກໍ່ສ້າງໃນຕົວເມືອງ

ປັດຈຸບັນ ຢູ່ລາວເຮົາແມ່ນໄລຍະແຫ່ງການສຸມໃສ່ພັດທະນາພື້ນຖານໂຄງລ່າງເປັນຈຳນວນຫລວງຫລາຍ ນັບທັງຕົວເມືອງ ແລະ ເຂດຊົນນະບົດ, ບ່ອນໃດກໍມີການກໍ່ສ້າງຖະໜົນຫົນທາງ, ອາ ຄານເຮືອນຂານ ແລະ ສາທາລະນຸປະໂພກຕ່າງໆ ຕົ້ນຕໍກໍເພື່ອພັດ ທະນາບ້ານເມືອງໃຫ້ມີຄວາມຈະເລີນຮຸ່ງເຮືອງ ເຊິ່ງໃຜໆກໍໃຝ່ຝັນ ແລະ ຍົກຍ້ອງ. ແຕ່ຄຽງຄູ່ກັນນັ້ນ ກໍມີບາງດ້ານທີ່ຈະຕ້ອງໄດ້ເອົາໃຈໃສ່ຄວບຄຸມນັບທັງຄຸນນະພາບ ຂອງໂຄງການ ແລະ ຄວາມສະ ອາດໃນເຂດໂຄງການ ໂດຍສະເພາະບັນດາໂຄງການໃນຕົວເມືອງໃຫຍ່ທີ່ມີປະຊາຊົນອາໄສຢູ່ໜາແໜ້ນດັ່ງນະຄອນຫລວງວຽງຈັນຂອງພວກເຮົາຍິ່ງມີຄວາມຈຳເປັນ ເພາະແມ່ນໃບໜ້າໃບຕາຂອງປະເທດຊາດ ແລະ ຕໍ່ບັນ ຫານີ້ຜ່ານມາ,ຂະແໜງມະຫາພາກກໍໄດ້ມີນິຕິກຳ ແລະ ຂໍ້ແນະ ນຳຕ່າງໆມາຫລາຍແລ້ວໃນເລື່ອງຮັກສາອະນາໄມສິ່ງແວດລ້ອມຂອງຕົວເມືອງ ກໍເໝືອນຄຳຂວັນ 6 ສ ຂອງນະຄອນຫລວງວາງອອກໜຶ່ງໃນນັ້ນກໍແມ່ນ ສ. ສະອາດ ແລະ ກໍແມ່ນ ສ ຕົ້ນຕໍ ເພື່ອສ້າງໃຫ້ນະຄອນຫລວງສະ ອາດສວຍງາມ ແລະ ເປັນຕາໜ້າຢູ່, ແຕ່ແລ້ວໃນປັດຈຸບັນ ກໍຍັງມີໃຫ້ເຫັນຫລາຍໂຄງການກໍ່ສ້າງຍັງບໍ່ສາມາດປະຕິບັດໄດ້ ໂດຍສະເພາະການບັນທຸກດິນຊາຍເຂົ້າ- ອອກໃນເຂດໂຄງການໄດ້ຕົກເຮ່ຍໄປທົ່ວບໍລິເວນ ນັບທັງຖະໜົນຫົນທາງເປິະເປື້ອນໄປແຕ່ຂີ້ດິນ, ເມື່ອຝົນຕົກລົງມາກໍເກີດເປັນຂີ້ ຕົມ ແລະ ເມື່ອບໍ່ມີຝົນກໍແມ່ນຂີ້ຝຸ່ນໄງ່ໄປທົ່ວເມື່ອມີລົດແລ່ນຜ່ານໄປ. ສະເພາະປັດຈຸບັນຮ້າຍແຮງທີ່ສຸດກໍແມ່ນບັນດາລົດດາມທີ່ຜັດປ່ຽນກັນຂົນດິນອອກຈາກບໍລິເວນໂຄງການກໍ່ສ້າງໂຮງແຮມ 5 ດາວ ຢູ່ຄ້າຍສື່ສານຫລັກສອງ ຕໍ່ໜ້າເຂດສວນອະນຸສາວະລີເຈົ້າ ຟ້າງຸ່ມ ເຮັດໃຫ້ເສັ້ນທາງ ແລະ ສະພາບແວດລ້ອມຢູ່ເຂດດັ່ງ ກ່າວຂາດຫລັກອະນາໄມ ແລະ ຄວາມ

ງາມ. ພ້ອມນັ້ນກໍຍັງມີຫລາຍໂຄງການກໍ່ສ້າງອື່ນໆທີ່ພວມເກີດຂຶ້ນໃນລັກສະນະແບບນີ້,ແຕ່ແລ້ວກໍບໍ່ມີພາກສ່ວນກ່ຽວ ຂ້ອງໃດໆເຂົ້າມາກ່າວເຕືອນ. ດັ່ງນັ້ນ,ຖ້າປະປ່ອຍໄປໃນສະພາບແບບນີ້ ເມື່ອຮອດຍາມຝົນມາຍິ່ງຈະຮ້າຍແຮງ ໂດຍສະເພາະບັນ ດາໂຄງການກໍ່ສ້າງໃຫຍ່ຢູ່ເຂດຕົວເມືອງ.

ເອົາລະເວົ້າມາກໍຫລາຍ, ແຕ່ຫວັງວ່າພາກສ່ວນກ່ຽວຂ້ອງຄວນຈະຕ້ອງມີມາດຕະການເຂັ້ມ ງວດໃນການຮັກສາຄວາມສະ ອາດຂອງບັນດາໂຄງການກໍ່ສ້າງ ຈຶ່ງຈະເຮັດໃຫ້ຕົວເມືອງຮັກສາໄດ້ຄວາມສະອາດງົດງາມດັ່ງຄຳຂວັນວາງໄວ້.