ງານວາງສະແດງສິນຄ້າລາວ-ໄທ ປະຈຳປີ 2013 ຈະຈັດຂຶ້ນໃນຕົ້ນເດືອນກໍລະກົດທີ່ຈະມາເຖິງນີ້

        ກົມສົ່ງເສີມ ແລະ ພັດທະນາສິນຄ້າກະ ຊວງອຸດສະຫະກຳ ແລະ ການຄ້າ ແຫ່ງ ສປປ ລາວ ແລະ ກົມສົ່ງເສີມການ ຄ້າລະຫວ່າງປະເທດກະຊວງພານິດແຫ່ງຣາຊະອານາຈັກໄທ, ຈະໄດ້ຈັດງານວາງສະແດງສິນຄ້າ ແລະ ເຈລະຈາທຸລະກິດລາວ -ໄທ ປະຈຳປີ 2013 (Lao​​​ - Thailand Sourcing and Business Matching 2013) ຂຶ້ນໃນລະຫວ່າງວັນທີ 3 - 7 ກໍລະກົດ 2013 ທີ່ຈະເຖິງນີ້ ຢູ່ສູນການຄ້າລາວ-ໄອເຕັກ ນະຄອນຫລວງວຽງຈັນ.

          ທ່ານນາງ ພິມົນ ປົງກອງແກ້ວ ອັກຄະ ຣາ ຊະທູດທີ່ປຶກສາຝ່າຍການຄ້າແຫ່ງຣາຊະອານາຈັກໄທກ່າວວ່າ: ງານວາງ ສະແດງ ສີນຄ້າທີ່ຈະມີຂຶ້ນນີ້ ພາກສ່ວນກ່ຽວຂ້ອງທັງ ສອງປະເທດໄດ້ຄັດເລືອກຜູ້ຜະລິດ ແລະ ຜູ້ປະກອບການຈຳໜ່າຍສີນ ຄ້າຈາກປະເທດລາວ ແລະ ໄທ ເຂົ້າຮ່ວມຫລາຍກວ່າ 200 ບໍລິສັດ ເປັນຕົ້ນ: ອາ ໄຫລ່ ແລະ ອຸປະກອນຕົບແຕ່ງ ລົດ,ເຄື່ອງກໍ່ ສ້າງ, ເຄື່ອງມືຊ່າງ, ກົນຈັກ, ເຄື່ອງໃຊ້ໄຟຟ້າ, ເຄື່ອງໃຊ້ຫ້ອງການ, ອຸປະກອນການສຶກສາ, ເຄື່ອງນຸ່ງຫົ່ມ, ເຟີນີເຈີ, ເຄື່ອງ ໃຊ້ໃນ ຄົວເຮືອນ, ແຜ່ນແພ, ເຄື່ອງທີ່ລະນຶກອາຫານ, ເຄື່ອງດື່ມ, ສີນຄ້າເພື່ອສຸຂະພາບ ແລະ ຄວາມງາມ ແລະ ອື່ນໆອີກຫລາຍ ປະ ເພດ.ນອກຈາກນີ້ຍັງຈະມີເວທີພົບປະເຈລະຈາດ້ານທຸລະກິດ ເຊັ່ນ: ການເຈລະຈາຈັບຄູ່ທາງທຸລະກິດເພື່ອໃຫ້ນັກທຸລະກິດ ລາວ- ໄທໄດ້ມີໂອກາດພົບປະດ້ານທຸລະກິດ, ການບໍລິການ ແລະ ຊອກຫາວັດຖຸດິບເພື່ອຫາຄູ່ຄ້າ ແລະ ຜູ້ລົງທຶນຮ່ວມກັນ ໃນເວທີປະຊາຄົມເສດຖະກິດອາຊຽນ, ການຈັດສະແດງນິທັດສະການໃນໂຄງການພະຣາດຊະດຳຣິ, ໂຄງການສູນພັດທະນາ

ແລະ ບໍລິການດ້ານ ການກະເສດຫ້ວຍ ຊອນ-ຫ້ວຍຊົ້ວ (ຫລັກ 22) ເມືອງນາຊາຍທອງ ນະຄອນຫລວງວຽງຈັນ ຂອງສົມ ເດັດພະເທບຣັດຕະນະ ຣາດຊະ ສຸດາ ສະຍາສບໍຣົມຣາຊະກຸມາຣີ, ການ ນຳສະເໜີພາລະບົດບາດ, ການ ຮ່ວມມື ແລະ ກິດຈະກຳ ຕ່າງໆຂອງສະຖານເອກອັກຄະ ຣາຊະທູດໄທ ແລະ ການສະແດງ ຄອນເສີດຂອງສີລະ ປິນທີ່ມີຊື່ ສຽງຂອງລາວ-ໄທ ເພື່ອແລກ ປ່ຽນວັດທະນາທຳເຊິ່ງກັນ ແລະ ກັນ.

       ສະຖານທູດໄທປະຈຳລາວ ໃຫ້ຮູ້ວ່າ: ໃນປີ 2012 ຜ່ານມາ, ການຮ່ວມມືທາງດ້ານເສດຖະກິດ, ການຄ້າລະຫວ່າງ ສ ປປ ລາວ ແລະ ຣາຊະອານາຈັກໄທບັນລຸຫລາຍ ກວ່າ 4,848 ລ້ານໂດລາ ສະຫະລັດ, ໃນນັ້ນ ສີນຄ້າຈາກໄທ ເຂົ້າມາລາວ ມີມູນຄ່າ 3,609 ກວ່າລ້ານໂດລາສະຫະລັດ ແລະ ສີນຄ້າຈາກລາວສົ່ງໄປໄທ ມີມູນ ຄ່າ 1,238 ກວ່າລ້ານໂດລາສະ ຫະລັດ, ສະເພາະແຕ່ເດືອນມັງ ກອນ-ເດືອນເມ ສາ 2013 ມູນ ຄ່າ ການຄ້າລະຫວ່າງສອງປະ ເທດ ບັນລຸຫລາຍກວ່າ1,691 ລ້ານໂດ ລາສະຫະລັດ,ໃນນັ້ນ ເປັນສີນຄ້າຈາກໄທມາລາວມີມູນຄ່າ 1,301 ລ້ານກວ່າໂດລາສະຫະລັດ ແລະ ສີນຄ້າຈາກລາວໄປໄທມີ ມູນຄ່າ 390 ລ້ານກວ່າໂດລາສະຫະລັດ ເຊິ່ງເຫັນວ່າມີອັດຕາສ່ວນເພີ່ມ ຂຶ້ນຕາມລຳດັບ ໂດຍສາເຫດທີ່ມູນຄ່າການສົ່ງອອກ ຈາກໄທເຂົ້າມາລາວຫລາຍກວ່າມູນຄ່າການສົ່ງອອກຈາກລາວໄປໄທກໍເພາະວ່າ ສປປ ລາວ ຢູ່ໃນໄລຍະ ຂອງການພັດທະ ນາພື້ນຖານໂຄງລ່າງ ແລະ ໂຄງການກໍ່ສ້າງເຂື່ອນໄຟຟ້າ ຫລາຍແຫ່ງທີ່ສຳຄັນຈຶ່ງມີຄວາມຈຳເປັນຕ້ອງນຳເຂົ້າ ເຄື່ອງຈັກ, ວັດສະດຸການກໍ່ສ້າງ ແລະສ່ວນປະກອບອື່ນໆ ເປັນຈຳນວນຫລາຍເພື່ອພັດທະນາພື້ນຖານໂຄງລ່າງໃຫ້ສຳເລັດ.