ບັນຫາການຂາດສານອາຫານຂອງເດັກນ້ອຍຢູ່ແຂວງອັດຕະປືຍັງເປັນສິ່ງທ້າທາຍ

          ພະແນກສາທາລະນະສຸກ ແຂວງອັດຕະປື ໄດ້ລາຍງານໃຫ້ຮູ້ເມື່ອບໍ່ດົນມານີ້ ວ່າ: ບັນຫາການຂາດສານອາຫານຂອງ ເດັກນ້ອຍຢູ່ພາຍໃນແຂວງດັ່ງກ່າວຍັງ ເປັນສິ່ງທ້າ ທາຍສຳລັບຂະແໜງ ສາທາລະນະສຸກ ເນື່ອງຈາກວ່າອັດຕາສະເລ່ຍເດັກນ້ອຍ ໜຶ່ງສ່ວນ ສາມມີຮ່າງກາຍເຕ້ຍ,ນ້ຳໜັກເບົາ ແລະ ຈ່ອຍຜອມ ເຊິ່ງບັນຫາດັ່ງ ກ່າວມີຜົນມາຈາກ ການຂາດໂພ ສະນາການ.

        ພະແນກດັ່ງກ່າວ ໃຫ້ຮູ້ວ່າ: ມີຫລາຍສາເຫດທີ່ພາໃຫ້ເກີດບັນຫາອັດຕາໂພສະ ນາການຕ່ຳເຊັ່ນ: ໂພສະນາການຂອງແມ່ ບໍ່ເໝາະສົມ, ວິທີການໃຫ້ອາຫານເດັກ ອ່ອນບໍ່ ມີຄວາມແທດເໝາະ, ການເຂົ້າເຖິງລະບົບນ້ຳທີ່ສະອາດ ແລະ ສຸຂາພິບານທີ່ ປອດໄພ ມີຂອບເຂດຈຳກັດ, ການເຂົ້າເຖິງຕາໜ່າງສາທາລະນະສຸກ ແລະ ການສຶກສາຍັງຈຳກັດ, ອັນສຳຄັນແມ່ນເດັກນ້ອຍ ແລະ ແມ່ຍິງ ແມ່ນມີຄວາມສຽງສູງ ແລະ ຍ້ອນ ທີ່ຕັ້ງພູມສັນຖານ, ຊົນເຜົ່າ ຫລື ສະພາບເສດຖະ ກິດຍິ່ງເປັນບັນຫາທ້າທາຍ ຫລາຍ.

     ຈາກການເຮັດວຽກຮ່ວມກັນລະຫວ່າງພະແນກສາທາລະນະ ສຸກແຂວງ ແລະ ອົງການອຸຍນີ ເຊບ ເຫັນວ່າ: ມີພຽງ 16% ຂອງ ແມ່ຍິງທີ່ໄດ້ກິນຢາເສີມທາດ ເຫລັກ(Iron Acid Eolic) ຫລາຍ ກວ່າ 90 ເມັດ ໃນໄລຍະຖືພາເພື່ອ ປ້ອງກັນພະຍາດ ເມັດເລືອດຈາງ, ມີພຽງ 34% ຂອງແມ່ຍິງຖືພາທີ່ ໄດ້ມາກວດທ້ອງຫລາຍກວ່າ4 ຄັ້ງກ່ອນການເກີດລູກ,ການລ້ຽງ ລູກດ້ວຍ ນົມແມ່ແຕ່ມື້ເກີດຈົນ ຮອດ 6 ເດືອນປະຕິບັດບັນລຸພຽງ 43% ແລະ ການເຂົ້າເຖິງການເສີມວິຕາມີນອາໃຫ້ເດັກອາຍຸແຕ່

6-59 ເດືອນແມ່ນມີພຽງເຄິ່ງໜຶ່ງຈາກສະພາບດັ່ງກ່າວ ຈຶ່ງເຮັດໃຫ້ ເດັກນ້ອຍໜຶ່ງໃນ 5 ຄົນຢູ່ແຂວງອັດຕະປື ມີນ້ຳໜັກໜ້ອຍ ໃນເວລາເກີດ, ໜຶ່ງໃນສາມຄົນມີຮ່າງກາຍ ເຕ້ຍຜິດປົກກະຕິ. ດັ່ງນັ້ນ ເພື່ອແກ້ ໄຂບັນຫາດັ່ງກ່າວພະແນກສາທາລະນະສຸກ ຈຶ່ງ ໄດ້ເລັ່ງໃຫ້ມີການສົ່ງເສີມ ແລະ ສະໜັບສະໜູນການຈັດຕັ້ງປະຕິບັດສຶກສາອົບຮົມກ່ຽວກັບຫລັກການໂພສະນາການ, ການ ລ້ຽງລູກດ້ວຍນ້ຳນົມ ແມ່ພຽງຢ່າງດຽວໃນໄລຍະ 6 ເດືອນ,ນອກຈາກນີ້ ຍັງດຳເນີນ ວຽກງານສຳຄັນຕ່າງໆທີ່ໄດ້ຮັບການສະ ໜັບສະໜູນຈາກສະຫະພາບເອີຣົບ(EU) ແລະ ອຸຍນີເຊບ (Unicef) ໂດຍການຈັດຊື້ສິ່ງຂອງ ເພື່ອຊ່ວຍເຫລືອດ້ານໂພສະນາ ການ ເຊັ່ນ:ຢາເສີມທາດເຫລັກ,ຢາຂ້າແມ່ທ້ອງ,ວິຕາມິນອາ ແລະ ອາຫານເສີມຕ່າງໆໄປຄຽງຄູ່ກັບການເຝິກອົບຮົມໃຫ້ພະນັກ ງານແພດເພື່ອປັບປຸງຄວາມຮູ້ ແລະ ທັກສະໃນການຊ່ວຍເຫລືອໃນກໍລະນີປິ່ນປົວສຸກເສີນ.