6 ເດືອນຕົ້ນປີນີ້ຈຳນວນນັກທ່ອງທ່ຽວເຂົ້າມາລາວຫລຸດລົງ

         ສະພາບເສດຖະກິດໂລກເວົ້າລວມ, ເວົ້າສະເພາະເສດຖະກິດຂອງ ບັນດາປະເທດເອີຣົບ ທີ່ໄດ້ຮັບຜົນກະທົບຈາກ ວິກິດການເຂດເອີໂຣ ທີ່ສືບເນື່ອງມາຈາກວິກິດການການເງິນໂລກໃນປີ 2008 ນັ້ນໄດ້ສົ່ງຜົນກະທົບໂດຍທາງກົງ ແລະ ທາງອ້ອມຕໍ່ກັບອຸດສາຫະກຳທ່ອງທ່ຽວຂອງ ລາວໂດຍຕົວເລກຈຳນວນນັກທ່ອງທ່ຽວຈາກທະ ວີບເອີຣົບເຊິ່ງເປັນທະວີບທີ່ເຄີຍມີນັກທ່ອງທ່ຽວ ເຂົ້າມາລາວຫຼາຍທີ່ສຸດໃນໄລຍະຜ່ານມານັ້ນໄດ້ຫຼຸດລົງຢ່າງຫຼວງຫຼາຍ, ຂະນະທີ່ຜູ້ປະກອບການທຸລະ ກິດນຳ ທ່ຽວລາວເປີດເຜີຍວ່າ:ມີສາເຫດມາຈາກສະພາບເສດຖະກິດໂລກ ແລະ ຜົນສະທ້ອນຈາກ ການເປີດປະຕູສູ່ໂລກພາຍນອກ​ເຮັດ​ໃຫ້​ນັກ​ທ່ອງ​ທ່ຽວ​ມີ​ທາງ​ເລືອກ​ຫຼາຍ​ຂຶ້ນ.

          ທ່ານ ດາວອນ ສຸວັນນະພົງ ຜູ້ບໍລິຫານບໍລິສັດ ວຽງຈຳປາ ທ່ອງທ່ຽວ ຈຳກັດ ເຊິ່ງເປັນໜຶ່ງ ໃນບໍລິສັດນຳທ່ຽວທີ່ນອນຢູ່ໃນອັນດັບແຖວໜ້າຂອງລາວກ່າວ ວ່າ: ຈາກການໃຫ້ການບໍລິການ ນຳທ່ຽວນັກທ່ອງທ່ຽວຕ່າງປະເທດທີ່ເຂົ້າມາລາວໃນ 6 ເດືອນຕົ້ນປີ 2013 ຜ່ານມານີ້ ເຫັນວ່າຈຳ ນວນນັກທ່ອງທ່ຽວຕ່າງປະເທດທີ່ເຂົ້າມາລາວຫຼຸດລົງເຖິງ 30% ເມື່ອທຽບກັບປີ ຜ່ານມາໂດຍສະເພາະແມ່ນນັກທ່ອງທ່ຽວຈາກເອີຣົບ, ຂະນະທີ່ຈຳ ນວນນັກທ່ອງທ່ຽວຈາກບັນດາປະເທດອາຊີຍັງຄົງຢູ່ໃນ ສະພາບເດີມ ຫຼື ເພີ່ມຂຶ້ນເລັກໜ້ອຍໂດຍສະເພາະແມ່ນນັກທ່ອງທ່ຽວຈາກປະ ເທດສິງກະ ໂປ, ມາເລເຊຍ, ສ.ເກົາຫຼີ ແລະ ຍີ່ປຸ່ນເຊິ່ງສາເຫ ຕົ້ນຕໍທີ່ເຮັດໃຫ້ຈຳນວນນັກທ່ອງທ່ຽວຈາກເອີຣົບເຂົ້າມາລາວຫຼຸດລົງນັ້ນ ເນື່ອງຈາກສະພາບເສດຖະ

ກິດຂອງ ບັນດາປະເທດເອີຣົບເວົ້າລວມ, ເວົ້າສະເພາະແມ່ນບັນດາປະເທດອີຢູ ເຊິ່ງເປັນກຸ່ມປະເທດເສດຖະກິດທີ່ໃຫຍ່ທີ່ສຸດໃນ ໂລກ ແລະ ເປັນປະ ເທດທີ່ມີຈຳນວນນັກທ່ອງທ່ຽວເຂົ້າມາລາວ ຫຼາຍທີ່ສຸດນັ້ນໄດ້ຮັບຜົນກະທົບຈາກວິກິດການເຂດເອີໂຣ ແລະ ຜົນກະທົບຈາກການເປີດປະຕູສູ່ໂລກ ພາຍນອກຂອງ​ມຽນມາ ນັ້ນ ໄດ້ດຶງດູດເອົາຄວາມສົນໃຈຂອງນັກທ່ອງທ່ຽວທີ່ເຂົ້າມາ ລາວນັ້ນມີ​ທາງ​ເລືອກ​ຫຼາຍ​ຂຶ້ນຈາກທີ່ເຄີຍຕ້ອນຮັບຈຳ ນວນນັກທ່ອງທ່ຽວເຖິງ 4 ພັນກວ່າຄົນ ໃນປີຜ່ານມາຫຼຸດລົງ 30 % ໃນປັດຈຸບັນ (6 ເດືອນຕົ້ນປີ 2013).

         ຜູ້ບໍລິຫານ ບໍລິສັດ ວຽງຈຳ ປາທ່ອງທ່ຽວ ຍັງກ່າວອີກວ່າ: ເພື່ອດຶງດູດເອົານັກທ່ອງທ່ຽວເຂົ້າມາລາວຫຼາຍຂຶ້ນ ນັ້ນ, ພວກເຮົາຕ້ອງສືບຕໍ່ເປີດ ກວ້າງ ແລະ ເພີ່ມສິ່ງອຳນວຍຄວາມສະດວກໃຫ້ແກ່ນັກທ່ອງທ່ຽວຕ່າງຊາດທີ່ສົນໃຈເຂົ້າມາລາວ, ສືບຕໍ່ປັບປຸງ ແລະ ປົກປັກຮັກສາແຫຼ່ງທ່ອງ ທ່ຽວທາງທຳມະຊາດ,ປະຫວັດສາດ ແລະ ວັດທະນະທຳ-ສັງຄົມ ໃຫ້ມີຄວາມຍື່ນ ຍົງຄົງໂຕຕະຫຼອດໄປທັງຮັກສາວັດທະນະທຳ- ຮີດຄອງປະເພນີ, ແບບແຜນການດຳລົງຊີວິດທີ່ດີງາມຂອງຊາດ, ຂອງປະຊາຊົນ ລາວບັນດາເຜົ່າ, ຂະນະດຽວກັນກໍຕ້ອງເພີ່ມສິ່ງອຳນວຍຄວາມສະ ດວກດ້ານການ ບໍລິການໂດຍສະເພາະແມ່ນໂຮງແຮມ, ເຮືອນ ພັກ, ຮ້ານອາຫານໃຫ້ໄດ້ມາດຕະຖານໃນລະດັບສາກົນ ແລະ ປັບປຸງຂອດການບໍລິການໃຫ້ດີຂຶ້ນກວ່າ ເກົ່າ. ນອກນີ້ກໍຍັງຕ້ອງ ໄດ້ສືບຕໍ່ອອກວີຊາໃຫ້ນັກທ່ອງທ່ຽວຕ່າງປະເທດໃນຮູບການທີ່ສະດວກ ແລະ ງ່າຍຂຶ້ນກວ່າເກົ່າເປັນຕົ້ນແມ່ນບັນດາປະເທດ ທີ່ຍັງບໍ່ທັນມີນະໂຍບາຍອອກວິຊາກັບທີ່ ແລະ ອື່ນໆ.