laophatthananewspaper: ສູນການຄ້ານະຄອນຊັບຊ໊ອບປິງພລາຊາ ຈະເປີດບໍລິການໃນທ້າຍປີນີ້

ທ່ານ ເຈິນ ຢ້າວຮົວ ຜູ້ອຳ ນວຍການໃຫຍ່ບໍລິສັດ ຮົວເຊິນ ລົງທຶນ ແລະ ພັດທະນາ (ລາວ) ຈຳກັດ,ຜູ້ລົງທຶນກໍ່ສ້າງສູນການຄ້ານະຄອນຊັບຊ໊ອບປິງພລາຊາ ເຊິ່ງຕັ້ງຢູ່ 4 ແຍກໄຟແດງບ້ານໂພນສະອາດ ເມືອງໄຊເສດຖາ ນະຄອນຫລວງວຽງຈັນ ໄດ້ໃຫ້ສຳພາດຕໍ່ນັກຂ່າວໜັງສືພິມລາວພັດທະ ນາ ໃນວັນທີ 16 ກໍລະກົດນີ້ວ່າ:ສູນການຄ້າແຫ່ງນີ້ຈະເປີດໃຫ້ບໍລິການຢ່າງເປັນທາງການໃນທ້າຍປີນີ້ ເຊິ່ງຈະເປັນສະຖານທີ່ໃຊ້ຈ່າຍຊື້ສິນຄ້າທີ່ມີລະດັບ, ທັນສະໄໝ ແລະ ໂດດເດັ່ນແຫ່ງໜຶ່ງຢູ່ນະຄອນ ຫລວງວຽງຈັນ.

ທ່ານ ເຈິນ ຢ້າວຮົວ ກ່າວວ່າ: ສູນການຄ້າແຫ່ງນີ້ເລີ່ມລົງມືກໍ່ສ້າງມາແຕ່ກາງເດືອນພະຈິກ 2012 ແລະ ມາຮອດປັດຈຸບັນ ຄືບໜ້າຫລາຍກວ່າ 85% ເຫລືອພຽງການຕົກແຕ່ງພາຍໃນ ແລະ ຕິດຕັ້ງລິບ, ຂັ້ນໄດເລື່ອນ, ລະບົບໄຟຟ້າ, ນ້ຳປະປາ, ລະບົບປັບອາ ກາດ,ລະບົບຮັກສາຄວາມປອດໄພ ແລະ ອື່ນໆ ເຊິ່ງຄາດວ່າຈະໃຫ້ສຳເລັດໃນເດືອນຕຸລາທີ່ຈະເຖິງນີ້ ໂດຍການກໍ່ສ້າງໄລຍະທຳອິດມີມູນຄ່າ 25 ລ້ານໂດລາສະ ຫະລັດ ແລະ ໄລຍະສອງຈະມີມູນຄ່າ 55 ລ້ານໂດລາສະຫະລັດ.

“ ສູນການຄ້ານະຄອນຊັບ ສ້າງຂຶ້ນໃນເນື້ອທີ່ກວ້າງຂວາງຢູ່ໃຈກາງເມືອງ ເຊິ່ງອ້ອມລ້ອມໄປດ້ວຍອາຄານສຳນັກງານຂອງລັດ, ເອກະຊົນ ແລະ ອົງການຈັດຕັ້ງສາກົນຕ່າງໆບວກໃສ່ການອອກແບບໃຫ້ເປັນອາຄານສູນການຄ້າທີ່ທັນສະໄໝລະດັບສາ ກົນຈຶ່ງໄດ້ຮັບຄວາມສົນໃຈຫລາຍຈາກນັກລົງທຶນທັງພາຍໃນ ແລະ ຕ່າງປະເທດເຊັ່ນ: ລາວ, ໄທ, ຈີນ, ຫວຽດນາມ, ສິງກະໂປ, ມາເລເຊຍ ແລະ ກຳປູເຈຍ”.

ອຳນວຍການບໍລິສັດຜູ້ລົງທຶນກໍ່ສ້າງ ກ່າວວ່າ: ອາຄານດັ່ງກ່າວມີທັງໝົດ 5 ຊັ້ນ, ມີ 300 ກວ່າຫ້ອງຂາຍໂດຍຊັ້ນທີ 1 ແມ່ນ ສິນຄ້າປະເພດນ້ຳຫອມ ແລະ ອັນ ຍະມະນີ,ຊັ້ນ 2 ຂາຍສິນຄ້າປະເພດເຄື່ອງສຳອາງ,ເສື້ອຜ້າ,ຊັ້ນ 3 ຂາຍສິນຄ້າໄອທີ,ເຄື່ອງໃຊ້ໄຟຟ້າຕ່າງໆ,ຊັ້ນທີ 4 ແລະ ຊັ້ນ 5 ແມ່ນສູນບໍລິການອາຫານປະເພດຕ່າງໆ,ມີສະຖານທີ່ຈອດລົດກວ້າງຂວາງຮອງຮັບໄດ້ຫລາຍກວ່າ 1 ພັນຄັນ ເຊິ່ງມາຮອດປັດ ຈຸບັນມີລູກຄ້າຈອງຫ້ອງຂາຍແລ້ວຫລາຍກວ່າເຄິ່ງໜຶ່ງ.

ທ່ານ ເຈິນ ຢ້າວຮົວ ກ່າວວ່າ: ເປົ້າໝາຍຂອງພວກເຮົາແມ່ນຈະພັດທະນາສູນການຄ້າແຫ່ງນີ້ໃຫ້ເປັນສະຖານທີ່ຈຳໜ່າຍສິນຄ້າ, ພັກຜ່ອນທີ່ມີລະດັບໂດດເດັ່ນ ເພື່ອດຶງດູດເອົາກຸ່ມຄົນທີ່ມັກໄປໃຊ້ຈ່າຍຊື້ສິນຄ້າທີ່ມີລະດັບຢູ່ຕ່າງປະເທດໃຫ້ຫັນມາຊື້ສິນຄ້າຢູ່ພາຍໃນປະເທດຫລາຍຂຶ້ນ ໂດຍຈະນຳໃຊ້ລະບົບການບໍລິການຄຸ້ມຄອງທີ່ດີ, ການໂຄສະນາຈາກບົດຮຽນທີ່ປະສົບຜົນສຳເລັດຂອງສູນການຄ້າຢູ່ ສປ ຈີນ ມານຳໃຊ້ ເພື່ອໃຫ້ສູນການຄ້າແຫ່ງນີ້ໄດ້ຮັບຄວາມນິຍົມຈາກສັງຄົມເພີ່ມຂຶ້ນເທື່ອລະກ້າວ ໃຫ້ກາຍເປັນສີສັນໃໝ່ຂອງຕົວເມືອງຢູ່ນະຄອນຫລວງວຽງຈັນ,ເປັນສະຖານທີ່ເຮັດໃຫ້ມີການໃຊ້ຈ່າຍໝູນວຽນຂອງເງິນເປັນຈຳນວນຫລາຍ ເພື່ອກະຕຸ້ນເສດຖະກິດທັງສ້າງວຽກເຮັດງານທຳ ແລະ ປະກອບສ່ວນມອບພັນທະງົບປະມານໃຫ້ລັດໄດ້ເປັນຢ່າງດີເພື່ອປະກອບສ່ວນເຂົ້າໃນການພັດທະນາເສດຖະກິດ- ສັງຄົມຂອງປະເທດເວົ້າລວມ, ເວົ້າສະເພາະແມ່ນນະຄອນ ຫລວງວຽງຈັນໃຫ້ມີໃບໜ້າໃໝ່.