ບໍລິສັດ MMG ລ້ານຊ້າງ ມີເນໂຣນສ໌ ລິມິເຕັດ
(MMG LXML Sepon) ໄດ້ແຈ້ງວ່າ: ຕົນ ມີຄວາມໝັ້ນໃຈທີ່ຈະຜະລິດທອງ ແລະ ຄຳໄດ້ຕາມຄາດໝາຍຂອງແຜນການປີ
2013 ວາງໄວ້ຢ່າງແນ່ນອນ ຄືພຽງໃນໄຕມາດທີ II ນີ້, ບໍ່ຄຳເຊໂປນຜະລິດແຜ່ນທອງໄດ້
22.851 ໂຕນ ເຊິ່ງຫລາຍກວ່າ 12% ເມື່ອທຽບໃສ່ຜົນຜະລິດໃນໄຕມາດທຳອິດຂອງປີນີ້.ພ້ອມນັ້ນ
ຍັງຜະລິດຄຳໄດ້ 11.301 ອອນ ເຊິ່ງຫລາຍກວ່າ 25% ເມື່ອທຽບໃສ່ໄຕມາດທຳອິດຂອງປີ
2013.
ທ່ານ ຣິກ ວັດສ໌ຝອດ ຜູ້ຈັດການໃຫຍ່ຂອງ
MMG LXML Sepon ກ່າວວ່າ: ປັດຈຸ ບັນ ບໍ່ຄຳເຊໂປນບັນລຸການຜະລິດໄດ້ເກີນຂີດຄວາມສາມາດຂອງການຜະລິດທີ່ໄດ້ອອກແບບມາເປັນໄລຍະ
5 ໄຕມາດຕິດຕໍ່ກັນ. ຜົນການຜະລິດທີ່ເພີ່ມຂຶ້ນໃນເຄິ່ງ ປີທຳອິດຂອງປີນີ້
ຍ້ອນການປັບ ປຸງການຜະລິດຢູ່ບໍ່ຄຳເຊໂປນ ໂດຍອີງໃສ່ການປະຕິບັດຕົວຈິງໃນໂຮງງານ.
ທ່ານ ວັດສ໌ຝອດ ກ່າວຕື່ມອີກວ່າ:
ປັດຈຸບັນ,ການຂຸດຄົ້ນແຮ່ທັງໝົດຢູ່ບໍ່ຄຳເຊໂປນແມ່ນດຳເນີນໂດຍພະນັກງານຂອງ
MMG LXML Sepon ແລະ ບໍລິສັດກໍໄດ້ເລັ່ງໃສ່ປັບປຸງຄວາມປອດໄພ,ບໍລິມາດການຜະລິດ
ແລະ ຄ່າໃຊ້ຈ່າຍຕ່າງໆ ເພື່ອຍົກສູງຜົນຜະລິດຂອງຕົນໃຫ້ຮັບ ປະ ກັນດັ່ງພວກເຮົາເຫັນໄດ້ທຸກມື້ນີ້.
ດັ່ງນັ້ນ ບໍ່ຄຳເຊໂປນມີຄວາມໝັ້ນໃຈວ່າ:ຈະຜະລິດທອງໄດ້ 83.000-88.000 ໂຕນ
ແລະ ຄຳໄດ້ 40.000-50.000 ອອນ ດັ່ງເປົ້າ ໝາຍວາງໄວ້ໃນປີ 2013 ແນ່ນອນ.
No comments:
Post a Comment