ນັບແຕ່ປີ 2011 ເຖິງປັດຈຸບັນ,
ຂະແໜງການທ່ອງທ່ຽວໄດ້ຮັບການພັດທະນາ ແລະ
ປັບປຸງຢ່າງຕໍ່ເນື່ອງໃນຂອບເຂດທົ່ວປະເທດ, ໂດຍສະເພາະການພັດທະນາ ແຫລ່ງທ່ອງທ່ຽວ
ແລະ ສິ່ງອຳນວຍຄວາມສະ ດວກຕ່າງໆ ເພື່ອຕອບຄວາມຕ້ອງການຂອງນັກທ່ອງທ່ຽວເປັນຕົ້ນເຮືອນພັກ,
ໂຮງແຮມ, ຮ້ານອາຫານ, ການບໍລິການຂົນສົ່ງ, ຮ້ານຂາຍເຄື່ອງຫັດຖະກຳ,
ທຸລະກິດບໍລິການທ່ອງທ່ຽວ ແລະ ອື່ນໆ.
ທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການກະຊວງຖະແຫລງຂ່າວ,
ວັດທະນະທຳ ແລະ ທ່ອງທ່ຽວ (ຖວທ) ໃຫ້ຮູ້ວ່າ:
ມາຮອດປັດຈຸບັນ ວຽກງານທ່ອງທ່ຽວໄດ້ຮັບການພັດທະນາ
ໂດຍສະເພາະການພັດທະນາການທ່ອງທ່ຽວແບບປະຊາຊົນມີສ່ວນຮ່ວມຊຶ່ງພວມປະຕິບັດຢູ່
13 ແຂວງໃນທົ່ວປະເທດ ເຮັດໃຫ້ນັກທ່ອງທ່ຽວມີຄວາມສົນໃຈ,
ເປັນທາງເລືອກໃໝ່ສຳລັບການທ່ອງ ທ່ຽວນອກຈາກໄປທ່ຽວຊົມຕາມແຫລ່ງວັດທະນະທຳ,
ບູຮານສະຖານ, ແຫລ່ງປະຫວັດສາດ ແລະ ທ່ອງທ່ຽວທຳມະຊາດ ເຮັດໃຫ້ປະຊາ ຊົນຢູ່ເຂດຊົນນະບົດມີລາຍຮັບເພີ່ມຂຶ້ນຈາກການບໍລິ
ການທ່ອງທ່ຽວ ແລະ ຈຳໜ່າຍຜະລິດຕະພັນທາງກະສິກຳ ແລະ ຫັດຖະກຳ.
ດ້ານການໂຄສະນາໄດ້ດຳເນີນໄປຢ່າງກວ້າງຂວາງ, ເລິກເຊິ່ງ ແລະ ຫລາຍຮູບແບບຢູ່ທັງພາຍໃນ
ແລະ ຕ່າງປະເທດໄດ້ຮັບຮູ້ໂດຍຜ່ານບັນດາອຸປະກອນໂຄສະນາ, ສິ່ງພິມ, ຮູບພາບ,
ວີດີໂອ, ການເຂົ້າຮ່ວມວາງສະແດງ, ການຈັດງານເທສະການບຸນປະເພນີ. ພິເສດແມ່ນການຈັດກິດຈະກຳໂຄ
ສະນາປີທ່ອງທ່ຽວລາວ 2012.
ດ້ານການຄຸ້ມຄອງທຸລະກິດດ້ານການທ່ອງທ່ຽວໄດ້ຮັບການເອົາໃຈໃສ່ເຮັດໃຫ້ການຄຸ້ມຄອງການເຄື່ອນໄຫວຂອງພາກ
ສ່ວນທຸລະກິດບໍລິການເຂົ້າສູ່ລະບຽບກົດໝາຍຫລາຍຂຶ້ນ. ພ້ອມນັ້ນ ກໍໄດ້ສຳເລັດການສ້າງ
ແລະ ປັບປຸງນິຕິກຳຫລາຍສະບັບ, ປັດຈຸບັນກໍໄດ້ປັບປຸງກົດ ໝາຍທ່ອງທ່ຽວເຊິ່ງໄດ້ສະເໜີຜ່ານກອງປະຊຸມສະພາໃນເດືອນມິຖຸນານີ້.
ຍ້ອນຄວາມເອົາໃຈໃສ່ຊີ້ນຳຂອງຄະນະພັກ-ຄະນະນຳກະຊວງ
ຖວທ ໄດ້ເຮັດໃຫ້ການປະຕິບັດໜ້າທີ່ວຽກງານຂອງພະນັກງານ, ການປະກອບສ່ວນສະໜັບ
ສະໜູນຂອງພາກສ່ວນຕ່າງໆ ແຕ່ສູນກາງຮອດທ້ອງຖິ່ນກວ້າງຂວາງກວ່າເກົ່າ,
ການປັບປຸງຍົກລະດັບມາດຕະຖານການບໍລິ ການຂອງພາກສ່ວນທຸລະກິດ
ເຮັດໃຫ້ການທ່ອງທ່ຽວຂອງປະເທດເຮົາມີຜົນສຳເລັດຫລາຍດ້ານເປັນຕົ້ນການສ້າງແຜນພັດທະນາແຫລ່ງທ່ອງທ່ຽວ,
ການພັດທະນາສິ່ງອຳນວຍຄວາມສະດວກດ້ານການທ່ອງທ່ຽວ,
ການເປັນເຈົ້າພາບຈັດງານມະຫະກຳການທ່ອງທ່ຽວອະນຸພາກພື້ນແມ່ນ້ຳຂອງໃນປີ 2011,
ການສະເຫລີມສະຫລອງຈັດງານເທສະ ການ ແລະ ກິດຈະກຳສົ່ງເສີມປີທ່ອງທ່ຽວລາວ
2012, ເປັນເຈົ້າພາບຈັດກອງປະຊຸມລັດຖະມົນຕີທ່ອງທ່ຽວອາຊຽນ ແລະ
ງານວາງສະແດງການທ່ອງທ່ຽວອາຊຽນ 2013 ແລະ ອື່ນໆ ສາມາດສ້າງຄວາມສົນໃຈ ແລະ
ດຶງດູດນັກທ່ອງທ່ຽວເຂົ້າມານັບມື້ເພີ່ມຂຶ້ນ. ໃນປີ 2011
ມີນັກທ່ອງທ່ຽວເຂົ້າມາລາວ 2.723.564 ຄົນ ເພີ່ມຂຶ້ນ 8% ທຽບໃສ່ປີ 2010, ສ້າງ
ລາຍຮັບໄດ້ຫຼາຍກວ່າ 400 ລ້ານໂດລາສະຫະລັດ. ປີ 2012 ຈຳ
ນວນນັກທ່ອງທ່ຽວເພີ່ມຂຶ້ນເປັນ 3.330.072 ຄົນ ທຽບໃສ່ປີ 2011 ເພີ່ມຂຶ້ນ 22%,
ສ້າງລາຍຮັບເພີ່ມຂຶ້ນເປັນ 513 ລ້ານກວ່າໂດລາສະຫະລັດ. ຈາກຜົນສຳເລັດດັ່ງ ກ່າວ
ໂດຍສະເພາະການບໍລິການ, ການອະນຸລັກຮັກສາສະ ພາບແວດລ້ອມທາງວັດທະນະ ທຳ ແລະ
ທຳມະຊາດ ເຮັດໃຫ້ ສປປ.ລາວ ໄດ້ຮັບລາງ ວັນດີເດັ່ນ
“ເປັນປະເທດທີ່ໜ້າທ່ອງທ່ຽວທີ່ສຸດໃນໂລກປີ 2013 ຈາກສະພາການທ່ອງທ່ຽວ
ແລະ ການຄ້າເອີຣົບ”.
ທ່ານຍັງກ່າວຕື່ມອີກວ່າ: ແຕ່ນີ້ຫາປີ
2015 ຈະສືບຕໍ່ປັບປຸງແຜນຍຸດທະສາດພັດທະນາການ ທ່ອງ ທ່ຽວປີ 2020
ໃຫ້ສຳເລັດ, ພັດທະນາການທ່ອງທ່ຽວຢ່າງມີຈຸດສຸມໂດຍສະເພາະແຫລ່ງ
ທ່ອງທ່ຽວທີ່ເປັນເປົ້າໝາຍສຳ ຄັນທີ່ເປັນບູລິມະສິດ, ສ້າງ-ປັບ
ປຸງນິຕິກຳໃຫ້ຄົບຖ້ວນ, ອອກແຮງໂຄສະນາການທ່ອງທ່ຽວດ້ວຍພາຫະນະສື່ມວນຊົນຢ່າງຕັ້ງໜ້າ,
ມີເນື້ອໃນເລິກເຊິ່ງ, ສົ່ງເສີມງານບຸນປະເພນີ,
ກິດຈະກຳສົ່ງເສີມການທ່ອງທ່ຽວ ແລະ ການສ້າງຂະບວນການທ່ອງທ່ຽວພາຍໃນເພີ່ມຂຶ້ນພາຍໃຕ້ຄຳຂວັນ
“ລາວທ່ຽວລາວ” ໃຫ້ຟົດຟື້ນ ແລະ ກວ້າງຂວາງ, ສ້າງບຸກ ຄະລາກອນໃຫ້ຮັບປະກັນທາງດ້ານປະລິມານ
ແລະ ຄຸນ ນະພາບດີຂຶ້ນເພື່ອກຽມພ້ອມເຂົ້າສູ່ປະຊາຄົມເສດຖະກິດອາຊຽນໃນປີ
2015,
ຍາດແຍ່ງການຮ່ວມມືຊ່ວຍເຫລືອຈາກສາກົນເຂົ້າໃນການພັດທະນາການທ່ອງທ່ຽວໃຫ້ກວ້າງຂວາງໃນຂອບເຂດສອງຝ່າຍ
ແລະ ຫລາຍຝ່າຍ.
No comments:
Post a Comment