ທະນາຄານແຫ່ງ ສປປ ລາວ ໄດ້ກ່າວວ່າ: ຈະພະຍາຍາມຊອກຫາກົນໄກ
ເພື່ອປັບອັດຕາດອກເບ້ຍເງິນກູ້ໃຫ້ຕ່ຳລົງອີກໃນຕໍ່ໜ້າ ຫລັງສະມາຊິກສະພາແຫ່ງຊາດຈຳນວນບໍ່ໜ້ອຍເຫັນວ່າ:
ອັດຕາດອກເບ້ຍເງິນກູ້ທີ່ທະນາ ຄານໄດ້ກຳນົດໃນປັດຈຸບັນສູງຫລາຍ ອາດເຮັດໃຫ້ປະຊາຊົນບໍ່ສາມາດເຂົ້າເຖິງແຫລ່ງທຶນທີ່ຈະນຳມາເຮັດການຜະລິດ
ເພື່ອຫລຸດພົ້ນຄວາມທຸກຍາກໄດ້.
ທ່ານ ສົມພາວ ໄພສິດ ຜູ້ວ່າ ການທະນາຄານແຫ່ງ
ສປປ ລາວ ໄດ້ຕອບຂໍ້ຊັກຖາມຂອງສະມາຊິກສະພາແຫ່ງຊາດທີ່ວ່າ: ອັດຕາດອກເບ້ຍເງິນກູ້ສູງຄືໃນປັດຈຸບັນຈະຊ່ວຍປະຊາຊົນກູ້ຢືມໄດ້ບໍ່
? ແລະ ທະນາຄານນະໂຍບາຍປ່ອຍເງິນກູ້ເຂົ້າໃນເມືອງເປົ້າໝາຍທຸກຍາກ ແຕ່ປະຊາຊົນໃນເມືອງບໍ່ທຸກຍາກກໍຍັງມີປະຊາຊົນທຸກຍາກຢູ່
ທະນາຄານນະໂຍບາຍຈະໃຫ້ກູ້ໄດ້ ຫລື ບໍ່ ? ເຊິ່ງສອງບັນຫາດັ່ງ ກ່າວ, ຜູ້ວ່າການທະນາຄານ
ໄດ້ຊີ້ແຈງວ່າ: ອັດຕາດອກເບ້ຍເງິນກູ້ມີ 2 ລະບົບ ຄືອັດຕາດອກເບ້ຍເງິນກູ້ຕາມກົນໄກຕະຫລາດ
ແມ່ນມີຕົ້ນທຶນເງິນຝາກໃນລະດັບ 8-9%, ຍັງມີຄ່າບໍລິຫານຂອງທະ ນາຄານ ແລະ ຄ່າໃຊ້ຈ່າຍອື່ນໆອີກ.
ດັ່ງນັ້ນ ອັດຕາດອກເບ້ຍເງິນກູ້ຢູ່ໃນລະດັບ 13-14% ຕໍ່ປີ ເຫັນວ່າອັດຕາດັ່ງກ່າວຍັງສາມາດຮັບໄດ້
ເຊິ່ງສະແດງອອກໜີ້ເສຍຂອງລະບົບທະນາຄານຍັງຢູ່ໃນລະດັບ 2% ເຫັນວ່າຫົວໜ່ວຍທຸລະກິດຍັງຮັບເອົາ
ອັດຕາດອກເບ້ຍເງິນກູ້ນີ້ໄດ້.
ແຕ່ເຖິງຢ່າງໃດກໍຕາມ ທະ ນາຄານຈະພະຍາຍາມຫລຸດຜ່ອນຄ່າໃຊ້ຈ່າຍບໍລິຫານລົງ
ເພື່ອເຮັດໃຫ້ອັດຕາດອກເບ້ຍເງິນກູ້ດັ່ງ ກ່າວຫລຸດລົງ ແລະ ອັດຕາດອກເບ້ຍເງິນກູ້ນະໂຍບາຍ
ໃນໄລຍະ ສັ້ນແມ່ນ 5% ຕໍ່ປີ, ໄລຍະກາງ 6% ຕໍ່ປີ ແລະ ໄລຍະຍາວ 7% ຕໍ່ປີ ໂດຍຜ່ານທະນາຄານນະໂຍບາຍ
ເຊິ່ງໃນໄລຍະຜ່ານມາ ປະຕິບັດ 7%, 8% ແລະ 10% ຕໍ່ປີຕາມລຳ ດັບ. ປັດຈຸບັນ, ທະນາ
ຄານນະໂຍບາຍໄດ້ດຳເນີນມາ 5-6 ປີແລ້ວ ໄດ້ມີຄວາມພະຍາຍາມຂະຫຍາຍເຄືອຂ່າຍຂອງຕົນໄດ້
10 ສາຂາ ແລະ 64 ໜ່ວຍບໍລິການ ເພື່ອຮັບໃຊ້ເຂົ້າໃນເປົ້າໝາຍທີ່ກຳນົດໄວ້. ສຳລັບປະຊາຊົນທຸກຍາກທີ່ຢູ່ໃນເມືອງບໍ່ທຸກຍາກ,
ທະນາຄານນະໂຍບາຍຈະໄດ້ປັບປຸງ ແລະ ຖອດຖອນບົດຮຽນ ເພື່ອຂະຫຍາຍຕາ ໜ່າງ ແລະ ຄວາມສາມາດຕົວຈິງຂອງທະນາຄານນະໂຍບາຍ
ແລະ ຈະຄົ້ນຄວ້າການສະໜອງສິນເຊື່ອໃຫ້ປະຊາຊົນທຸກຍາກທີ່ຢູ່ນອກເມືອງເປົ້າໝາຍໃຫ້ໄດ້ໃນຕໍ່ໜ້ານີ້.
No comments:
Post a Comment