ກົມຄວບຄຸມພະຍາດຕິດຕໍ່ກະຊວງສາທາລະນະສຸກ
ເປີດເຜີຍວ່າ: ມາຮອດດຽວນີ້ ໂດຍສັງເກດເຫັນວ່າພະ ຍາດໄຂ້ເລືອດອອກທີ່ພວມຄຸກຄາມຢູ່ນະຄອນຫລວງວຽງຈັນນັ້ນມີທ່າອ່ຽງຫລຸດລົງຫລາຍ
ເນື່ອງຈາກຂະແໜງການກ່ຽວຂ້ອງ, ອຳນາດການປົກຄອງທ້ອງຖິ່ນໄດ້ເປັນເຈົ້າການຄວບຄຸມ
ແລະ ສະກັດກັ້ນການລະບາດຂອງພະຍາດດັ່ງ ກ່າວຢ່າງມີປະສິດທິຜົນດ້ວຍຫລາຍວິທີການ
ໂດຍສະເພາະການສຸມໃສ່ຈັດຕັ້ງປະຕິບັດຄຳຂວັນ 5 ປ ເພື່ອປາບປາມໄຂ້ເລືອດອອກຄື
ປ.ປິດພາຊະນະເກັບນ້ຳ, ປ.ປ່ຽນນ້ຳໃນພາຊະນະຕ່າງໆ ຄື ເຕົ້າດອກໄມ້, ນ້ຳຮອງຕີນຕູ້
ແລະ ອື່ນໆ, ປ.ປ່ອຍປາຫາງນົກຍຸງ ເພື່ອກິນໜອນນ້ຳ, ປ.ປັບປຸງການອະນາໄມສິ່ງແວດລ້ອມ
ແລະ ປ.ປະຕິບັດສິ່ງເຫລົ່າ ນັ້ນໃຫ້ເປັນນິໄສ ແລະ ພ້ອມນັ້ນ ກໍແມ່ນການເອົາໃຈໃສ່ຂອງໜ່ວຍງານກ່ຽວຂ້ອງໃນການປຸກ
ລະດົມມວນຊົນສ້າງຂະບວນ ການຕ້ານການລະບາດຂອງໄຂ້ຍຸງລາຍ ຄືເມື່ອມໍ່ໆມານີ້
ນຳໂດຍການປິ່ນປົວພະແນກສາທາ ລະນະສຸກນະຄອນຫລວງວຽງຈັນ ແລະ ອຳນາດການປົກຄອງເມືອງປາກງື່ມ
ເມືອງໄຊທານີ ລົງຈັດຕັ້ງຂະບວນການທຳ ລາຍແຫລ່ງເພາະພັນຂອງຍຸງລາຍ, ອະນາໄມບ້ານເຮືອນ,
ພົ່ນຢາຂ້າຍຸງຢູ່ຕາມບ້ານທີ່ມີການລະບາດຮ້າຍແຮງຢູ່ໃນເມືອງດັ່ງກ່າວຢ່າງເປັນຂະບວນ
ແລະ ມີປະ ສິດທິຜົນ, ສ່ວນກົມຄວບຄຸມພະຍາດຕິດຕໍ່ຂອງກະຊວງສາທາ ລະນະສຸກກໍໄດ້ຮ່ວມກັບທີມງານນັກສຶກສາແພດທີ່ລົງຊ່ວຍເມືອງສີສັດຕະນາກ,
ເມືອງຫາດຊາຍຟອງຖອດຖອນບົດຮຽນໃນການ ຈັດຕັ້ງປະຕິບັດມາດຕະການຕ່າງໆ ເພື່ອຄວບຄຸມການລະ
ບາດຂອງໄຂ້ຍຸງລາຍໃຫ້ມີຜົນ ໂດຍໄດ້ຖືເອົາຄຳຂວັນ 5 ປ ຕ້ານໄຂ້
ເລືອດອອກເປັນຫລັກ.
ພ້ອມເຮັດວຽກງານໂຄສະນາສຸຂະສຶກສາໃນໝູ່ປະຊາຊົນໃຫ້ກວ້າງ ຂວາງເພື່ອເຂົາເຈົ້າມີຄວາມເຂົ້າໃຈ
ແລະ ຮັບຮູ້ເຖິງສະພາບຄວາມອັນຕະລາຍຂອງການລະ ບາດຂອງພະຍາດດັ່ງ ກ່າວ ເພື່ອເປັນເຈົ້າການຮ່ວມກັນຕ້ານ
ແລະ ສະກັດກັ້ນໃຫ້ມີຜົນ.
ຜູ້ລາຍງານຂ່າວຍັງເຕືອນໃຫ້ຮູ້ວ່າ: ໄປຄຽງຄູ່ກັບການຫລຸດ
ຜ່ອນລົງຂອງໄຂ້ເລືອດອອກຢູ່ນະຄອນຫລວງວຽງຈັນນັ້ນໂດຍສະເລ່ຍຢູ່ທົ່ວປະເທດພັດມີທ່າອ່ຽງເພີ່ມສູງຂຶ້ນ
ເຊິ່ງມາຮອດປັດຈຸບັນມີຜູ້ຕິດເຊື້ອທັງໝົດຫລາຍກວ່າ 23.000 ຄົນ ແລະ ມີຜູ້ເສຍຊີວິດແລ້ວ
72 ຄົນ, ໃນນັ້ນ ຢູ່ນະຄອນຫລວງມີຜູ້ເສຍຊີວິດ 17 ຄົນ. ຕໍ່ສະພາບດັ່ງ ກ່າວມັນເຖິງຂັ້ນເຕືອນໄພອັນຕະລາຍແລ້ວ
ເຊິ່ງມັນຮຽກຮ້ອງໃຫ້ທົ່ວປະເທດຕ້ອງສຸມໃສ່ສະກັດກັ້ນ ແລະ ຕ້ານໄຂ້ຍຸງລາຍນີ້ໃຫ້ມີຜົນ,
ນອກຈາກການເຮັດອະນາໄມ, ທຳລາຍແຫລ່ງເພາະພັນຂອງຍຸງລາຍແລ້ວ, ຂະແໜງສາທາ ລະນະສຸກຕ້ອງເພີ່ມທະວີພົ່ນຢາໃນເຂດມີການລະບາດໃຫ້ຫລາຍຂຶ້ນ,
ເບື້ອງໂຮງໝໍ ແລະ ສຸກສາລາຕ່າງໆ ກໍຕ້ອງເປັນເຈົ້າການເອົາໃຈໃສ່ຄວບຄຸມ ແລະ
ປິ່ນປົວຜູ້ປ່ວຍໃຫ້ມີປະສິດທິຜົນ. ພ້ອມນັ້ນ ເບື້ອງລັດຖະບານກໍຕ້ອງສຸມທຸກທຶນຮອນເພື່ອຊ່ວຍຕ້ານການລະບາດຂອງພະຍາດຮ້າຍແຮງນີ້ໃຫ້ມີຜົນ.
No comments:
Post a Comment