ຕະຫລາດເມືອງຊະນະຄາມຈະລົງມືກໍ່ສ້າງພາຍຫລັງໄດ້ຮັບອະນຸຍາດສຳປະທານ

     ການລົງນາມໃນສັນຍາໂຄງ ການກໍ່ສ້າງຕະຫລາດເມືອງຊະ ນະຄາມ ແຂວງວຽງຈັນ ລະຫວ່າງເຈົ້າຂອງໂຄງການກັບ ບໍລິສັດຜູ້ຮັບເໝົາສຳປະທານ ໄດ້ມີຂຶ້ນໃນວັນທີ 17 ກໍລະກົດນີ້ ໂດຍ ແມ່ນທ່ານ ບຸນທັນ ປັນຍາທິລາດປະທານບໍລິສັດ ປັນຍາທິລາດກໍ່ສ້າງຂົວທາງ ແລະ ຊົນລະປະທານຈຳກັດຜູ້ ດຽວ ແລະ ທ່ານ ອຸດົງ ພົງໄພປະດິດ ຫົວໜ້າພະແນກແຜນ ການ ແລະ ການລົງທຶນແຂວງໄດ້ຮ່ວມລົງນາມໃນສັນຍາ, ຊ້ອງໜ້າພະນັກງານພາກສ່ວນ ຕ່າງໆທີ່ກ່ຽວຂ້ອງເຂົ້າຮ່ວມ.

     ປະທານບໍລິສັດດັ່ງກ່າວໄດ້ ກ່າວວ່າ: ພາຍຫລັງທີ່ເຊັນສັນຍາລົງມືກໍ່ສ້າງນີ້ແລ້ວ, ບໍລິສັດຕົນ ຈະເລີ່ມລົງມືກໍ່ສ້າງໃນທ້າຍເດືອນກໍລະກົດນີ້ເປັນ ຕົ້ນໄປ ໂດຍ ຕາມແຜນການແລ້ວຈະໃຊ້ເວລາ 3 ປີ, ແຕ່ທາງບໍລິສັດຈະເລັ່ງໃຫ້ສຳເລັດພາຍ ໃນ 2 ປີ ເພື່ອໃຫ້ປະຊາຊົນຊາວຄ້າຂາຍພາຍໃນ ເມືອງໄດ້ຊົມໃຊ້ໂດຍໄວ. ທ່ານ ກ່າວຕື່ມອີກວ່າ: ຕະຫລາດດັ່ງກ່າວນີ້ ໃຊ້ທຶນໃນການກໍ່ສ້າງເຖິງ 8 ຕື້ກວ່າກີບ ໂດຍແມ່ນທຶນຂອງບໍລິສັດເອງ ໃນຮູບແບບສຳປະທານ 35 ປີ, ມີເນື້ອທີ່ເຖິງ 16.500 ກວ່າແມັດມົນທົນ, ປະກອບມີ 10 ອາຄານ, ມີ 10 ກວ່າຫ້ອງຂາຍ, ມີເດີ່ນ, ຮ່ອງລະບາຍນ້ຳ ອ້ອມ ຮອບ, ກໍ່ກຳແພງອ້ອມ, ປະກອບມີຫ້ອງນ້ຳ ທັງໃນບໍລິເວນຕະຫລາດ ແລະ ນອກຕະຫລາດຈຳນວນໜຶ່ງ.

    ສ່ວນການອຳນວຍຄວາມສະດວກໃນການສຳປະທານແມ່ນ ຮູບແບບເຊົ່າຫ້ອງຂາຍເປັນລາຍເດືອນໃນລາຄາທີ່ ເໝາະສົມ, ພາຍຫລັງຕະຫລາດ ແຫ່ງນີ້ສ້າງສຳເລັດຊາວຄ້າຂາຍພາຍໃນເມືອງຊະນະຄາມຈະມີຄວາມສະດວກໃນການ ແລກປ່ຽນສິນຄ້າເຊິ່ງກັນ ແລະ ກັນສາມາດແກ້ໄຂບັນຫາການ ດຳເນີນທຸລະກິດຄ້າຂາຍໃຫ້ແກ່ຊາວເມືອງດັ່ງກ່າວໄດ້ ໂດຍພື້ນຖານ.