laophatthananewspaper: ເພີ່ມຄວາມຮັບຮູ້ບົດບາດຍິງຊາຍໃນການເຊື່ອມໂຍງອາຊຽນໃຫ້ພະນັກງານຫລັກແຫລ່ງກະຊວງ ຖວທ

ຄະນະກຳມະການ ເພື່ອຄວາມກ້າວ ໜ້າແມ່ຍິງ, ແມ່ ແລະ ເດັກ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມພາຍໃຕ້ຫົວຂໍ້ “ບົດບາດຍິງຊາຍໃນການເຊື່ອມໂຍງອາຊຽນ” ຂຶ້ນໃນວັນທີ 16 ກໍລະກົດ 2013 ຢູ່ກະຊວງດັ່ງກ່າວ ໂດຍມີທ່ານ ສະຫວັນຄອນ ຣາຊະມຸນຕີ ລັດຖະມົນຕີຊ່ວຍວ່າການກະຊວງ ຖວທ,ຄະນະກຳມະທິ ການແຫ່ງຊາດເພື່ອຄວາມກ້າວໜ້າແມ່ຍິງທັງເປັນຫົວໜ້າຄະນະກຳມາທິການເພື່ອຄວາມກ້າວໜ້າແມ່ຍິງ ແລະ ວຽກງານແມ່ ແລະ ເດັກກະຊວງ ຖວທ, ທ່ານນາງ ບົວຈັນ ສີຫານາດ ຄະນະບໍລິຫານງານສູນກາງສະຫະພັນແມ່ຍິງລາວ, ຫົວໜ້າຫ້ອງການສູນກາງສະຫະພັນແມ່ ຍິງລາວ,ບັນດາຫົວໜ້າກົມ,ຮອງກົມ, ຫົວໜ້າພະແນກພ້ອມດ້ວຍສຳມະນາອ້ອມຂ້າງກະຊວງ ຖວທ ເຂົ້າຮ່ວມ.

ທ່ານ ສະຫວັນຄອນ ຣາຊະມຸນຕີ ໄດ້ກ່າວບາງຕອນສຳຄັນວ່າ:ບັນຫາຄວາມບໍ່ສະເໝີພາບ ລະຫວ່າງຍິງ- ຊາຍ ບໍ່ແມ່ນເກີດຂຶ້ນສະເພາະຢູ່ພຽງແຕ່ປະເທດເຮົາເທົ່ານັ້ນ,ແຕ່ຫາກເປັນບັນຫາທີ່ເກີດ ຂຶ້ນຢູ່ຫລາຍປະເທດໃນໂລກເຊິ່ງເປັນຜົນສະທ້ອນໃຫ້ແກ່ການບັນລຸເປົ້າໝາຍສະ ຫັດສະວັດເພື່ອການພັດທະນາເສດຖະ ກິດ-ສັງຄົມ, ຄອບຄົວ.ລັດຖະບານ ແຫ່ງ ສປປ ລາວ ໄດ້ມີນະໂຍບາຍປົກປ້ອງສິດຜົນປະໂຫຍດໃຫ້ແກ່ແມ່ຍິງ ແລະ ພະ ຍາຍາມສ້າງທຸກເງື່ອນໄຂ ເພື່ອເຮັດໃຫ້ວຽກງານສົ່ງເສີມຄວາມສະເໝີພາບລະ ຫວ່າງ ຍິງ-ຊາຍ ຢູ່ ສປປ ລາວ ກໍຄືພາຍໃນຂົງເຂດຖະແຫລງຂ່າວ,ວັດທະນະທຳ ແລະທ່ອງທ່ຽວໃຫ້ມີການ

ພັດທະນາຢ່າງຕໍ່ເນື່ອງເຊິ່ງໄລຍະຜ່ານມາ, ພັກ ແລະ ລັດຖະບານ ຍາມໃດກໍໄດ້ເອົາໃຈໃສ່ກຳນົດນະໂຍ ບາຍ ແລະ ສ້າງເງື່ອນໄຂ ເພື່ອໃຫ້ແມ່ຍິງໄດ້ມີໂອກາດພັດທະນາ,ເຝິກຝົນຫລໍ່ຫລອມຕົນເອງ ແລະ ໃຫ້ແມ່ຍິງໄດ້ມີສ່ວນຮ່ວມຫລາຍຂຶ້ນ ປະກອບສ່ວນໃນທຸກຂົງເຂດວຽກງານ,ເພີ່ມຈຳນວນແມ່ ຍິງເຂົ້າໃນຕຳແໜ່ງຕັດສິນວຽກງານໃນຂັ້ນຕ່າງໆທຸກລະດັບ ແລະ ຍົກລະດັບຊິວິດການເປັນຢູ່ຂອງເພດຍິງໃຫ້ນັບມື້ດີຂຶ້ນເທື່ອລະກ້າວແນໃສ່ຮັບປະກັນການແກ້ໄຂຊ່ອງຫວ່າງ, ຄວາມແຕກໂຕນ, ເງື່ອນໄຂ, ໂອກາດ ແລະ ສະຖານະພາບຂອງຜູ້ຍິງ ແລະ ກ້າວໄປເຖິງລຶບລ້າງທຸກຮູບການຈຳແນກຕໍ່ແມ່ ຍິງໃນຄອບຄົວ ແລະ ທົ່ວສັງຄົມ ດັ່ງທີ່ໄດ້ລະບຸໄວ້ໃນລັດຖະທຳມະນູນ,ກົດໝາຍແຫ່ງ ສປປ.ລາວ ກໍຄືການປະຕິບັດສົນທິສັນ ຍາວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງທີ່ລັດຖະບານໄດ້ຮັບຮອງເອົາໃນປີ 1980 ແລະ ແຜນຍຸດທະສາດແຫ່ງຊາດ ເພື່ອສົ່ງເສີມຄວາມກ້າວໜ້າແມ່ຍິງ 5 ປີ ຄັ້ງທີ II (2010-2015) ໃຫ້ໄດ້ຮັບການຈັດຕັ້ງປະຕິບັດເທື່ອລະກ້າວ.

ກອງປະຊຸມດັ່ງກ່າວ,ຜູ້ເຂົ້າຮ່ວມຍັງໄດ້ຮັບຮູ້-ເຂົ້າໃຈ ແລະ ມີຄວາມເປັນເອກະພາບໃນທຸກຂະແໜງການກ່ຽວກັບຄວາມສຳຄັນຕໍ່ການສົ່ງເສີມຄວາມສະເໝີພາບລະຫວ່າງຍິງ-ຊາຍໃນການນຳເອົາບົດຮຽນດັ່ງກ່າວໄປຈັດຕັ້ງປະຕິບັດ ແລະ ຜັນຂະຫຍາຍຕາມເງື່ອນໄຂຕົວຈິງໃຫ້ຮູ້ເຖິງການປະຕິບັດພັນທະຂອງລັດພາຄີຕໍ່ສົນທິສັນຍາວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງ ທີ່ ສປປ.ລາວ ໄດ້ຮັບ ຮອງ ແລະ ໃຫ້ສັດຕະຍາບັນໃນປີ 1981.