ຫລາຍເສັ້ນທາງລົດຕິດຍາວຢຽດ ຍ້ອນປ່ຽນລະບົບການສັນຈອນໃຫມ່

         ໃນຕອນເຊົ້າວັນທີ 26 ສິງ ຫານີ້,ຫລາຍເສັ້ນທາງໃນຕົວ ເມືອງນະຄອນ ຫລວງວຽງຈັນ, ໄດ້ປະສົບບັນຫາການຕິດຂັດ ແອ ອັດຍາວຫລາຍກິໂລແມັດ ແລະ ເປັນອຳມະພາດໃນຫລາຍຈຸດ ແບບບໍ່ເຄີຍເຫັນມາກ່ອນ, ພາຍຫລັງພະແນກໂຍທາທິ ການ ແລະ ຂົນສົ່ງ ນະຄອນຫລວງວຽງຈັນ ເລີ່ມຈັດຕັ້ງປະຕິບັດແຜນປັບປຸງການ ສັນຈອນ ເພື່ອຫລຸດຜ່ອນບັນຫາຄວາມແອອັດ ແລະ ອຸປະຕິເຫດຕາມທ້ອງ ຖະໜົນໃນຕົວເມືອງ.

           ການປັບປຸງການສັນຈອນ ໃໝ່ນີ້ແມ່ນໄດ້ປ່ຽນເສັ້ນທາງແຄມຂອງເຂດເມືອງຈັນທະບູລີ ທີ່ເຄີຍແລ່ນໄດ້ສອງເບື້ອງ ໃຫ້ມາແລ່ນເບື້ອງດຽວຂາຂຶ້ນ, ຈາກບັນຫາດັ່ງກ່າວ ຈຶ່ງເຮັດໃຫ້ເກີດສະພາບການຈໍລະຈອນໃນເສັ້ນທາງສຸພານຸວົງມາຫາຖະ ໜົນເສດຖາທິລາດອອກໄປເສັ້ນທາງເລກIຕິດຂັດຍາວຢຽດຫລາຍກິໂລແມັດໂດຍສະເພາະແຕ່ສາມແຍກສີໄຄເຂດເມືອງສີ

ໂຄດຕະບອງຂຶ້ນມາຮອດໃຈກາງຕົວເມືອງ ແລະ ເສັ້ນທາງແຄມຂອງແຕ່ໂຮງໝໍມະໂຫສົດຈົນມາຮອດສາມແຍກປາກປ່າສັກ ແລະ ເກີດມີລົດຕິດເປັນອຳມະພາດໃນສີ່ແຍກໄຟອຳນາດຫລາຍຈຸດ ເຊັ່ນ: ສີ່ແຍກກະຊວງແຜນການ ແລະ ການລົງທຶນ, ສີ ແຍກວັດອິນແປງ, ສີຫອມ ແລະ ອື່ນໆ ຍ້ອນໄດ້ຮັບຜົນກະທົບຈາກການປ່ຽນການສັນຈອນໃໝ່ຄືດັ່ງກ່າວ, ເຊິ່ງຕ້ອງໄດ້ລະ ດົມກຳລັງເຈົ້າໜ້າທີ່ຈະລາຈອນຈຳນວນຫລາຍ ເພື່ອມາປະຕິບັດໜ້າທີ່ຄວບຄຸມ ແລະ ລະບາຍການສັນຈອນດ້ວຍຄວາມໜັກ ໜ່ວງສົມຄວນກ່ອນການສັນຈອນຈະໄດ້ມີການເຄື່ອນຕົວໄປຢ່າງຊ້າໆ.

          ຜູ້ຂັບຂີ່ລົດໃຫຍ່ທ່ານໜຶ່ງ ກ່າວຕໍ່ນັກຂ່າວພວກເຮົາວ່າ:ປົກ ກະຕິຂ້າພະເຈົ້າຂັບລົດອອກຈາກເຮືອນຢູ່ບ້ານໜອງດ້ວງ ມາຫ້ອງການຢູ່ເຂດນ້ຳຜຸໃຊ້ເວລາປະມານ 10- 20ນາທີ,ແຕ່ສຳລັບໃນເຊົ້າ ມື້ວານ ນີ້ປະກົດວ່າລົດຕິດແອອັດຜິດປົກກະຕິຈຶ່ງ ເສຍເວລາໄປເປັນຊົ່ວໂມງ ແລະ ອີກບໍ່ເທົ່າໃດມື້ ກໍຈະເປີດສົກຮຽນໃໝ່ແລ້ວຖ້າພາກສ່ວນກ່ຽວຂ້ອງບໍ່ຮີບຮ້ອນແກ້ໄຂຢ່າງຈິງ ຈັງກໍຍິ່ງຈະສ້າງຄວາມສັບສົນຫລາຍກວ່າເກົ່າ.