ໂທລະພາບລາວໄດ້ຮັບສິດຖ່າຍທອດສົດກິລາບານເຕະລະດັບໂລກ

      ໃນວັນທີ 26 ສິງຫານີ້, ຢູ່ໂຮງ ແຮມລາວພາຊາ, ນະຄອນຫລວງວຽງຈັນ. ໄດ້ມີພິທີລົງນາມບົດບັນທຶກການຮ່ວມມືລະຫວ່າງສະຖານີໂທລະພາບແຫ່ງຊາດ ລາວ ແລະ ບໍລິສັດ ທຣູ ວີຊັນ (ປະເທດ ໄທ) ເພື່ອຖ່າຍທອດສົດການລາຍການແຂ່ງ ຂັນກິລາບານເຕະ ຢູ ຟາແຊມປ່ຽນສລິກ(UEFA Champions Leagues), ຢູຟາ ຊູບເປີຄັບ (UEFA Super Cup) ແລະ ຢູຟາ ເອີໂຣປາລິກ (UEFA Europa Leagues),ໂດຍການໃຫ້ກຽດເຂົ້າຮ່ວມຂອງທ່ານ ສະຫວັນຄອນ ຣາຊະມົນ ຕີ ລັດຖະມົນຕີຊ່ວຍວ່າການກະຊວງຖະ ແຫລ່ງຂ່າວ, ວັດທະນາທຳ ແລະ ທ່ອງທ່ຽວ, ທ່ານ ພິດສະນຸ ຈັນວິທັດ ເອກອັກຄະ ລາຊະທູດແຫ່ງຣາຊະອານາ ຈັກໄທປະຈຳລາວ, ມີບັນທ່ານເລຂາທິການສະມາຄົມ ລາວ-ໄທ, ໄທ-ລາວເພື່ອມິດ ຕະພາບ ແລະ ບັນດາທ່ານຄະນະອຳນວຍການສະຖານີໂທລະພາບແຫ່ງຊາດ, ຄະນະຜູ້ບໍລິຫານ ບໍລິສັດ ທຣູ ວີຊັນ, ບໍລິສັດ ທຣິບໂພຼ ເອັສ ແລະ ແຂກຖືກເຊິນ ພ້ອມດ້ວຍສື່ມວນຊົນເຂົ້າຮ່ວມຢ່າງຫລວງຫລາຍ.

         ສັນຍາດັ່ງກ່າວ ແມ່ນການ ຕົກລົງບໍ່ໃຫ້ເສຍຄ່າລິຄະສິດໃນການອອກອາກາດຂອງສະຖານີ ໂທລະພາບແຫ່ງຊາດລາວ ເພື່ອ ຖ່າຍທອດພາບ ແລະ ສຽງການ ແຂ່ງຂັນກິລາບານເຕະ ຢູຟາແຊມ ປ່ຽນສລິກ (UEFA Champions Leagues), ຢູຟາຊູບເປີຄັບ (UEFA Super Cup) ແລະ ຢູຟາ ເອີໂຣປາລິກ (UEFA Europa Leagues) ລະດູການ

2013-2014 ໂດຍຜ່ານສັນຍານພາກພື້ນດິນຂອງ ບໍລິສັດ ອີທີແອລ (ETL) ມະຫາຊົນ ແລະ ລວມເຖິງການອອກອາກາດ ເທບບັນ ທຶກພາບການແຂ່ງຂັນນັດຊ້ອນພາຍໃນ 24 ຊົ່ວໂມງ ແລະ ສະຫລຸບຄືນຜົນ ການແຂ່ງ ຂັນປະຈຳອາທິດໂດຍຈະເລີ່ມຖ່າຍ ທອດສົດເທື່ອທຳອິດໃນເຊົ້າ ວັນທີ 31 ສິງຫາ 2013 ທີ່ຈະເຖິງນີ້ເວລາ 01:00 ນາທີ ແລະ ຈະ ພາກເປັນສາພາລາວ.

       ທ່ານ ສຸກກະເສີມ ໂພທິສານ ເລຂາທິການສະມາຄົມລາວ-ໄທ ເພື່ອມິດຕະພາບ ກ່າວວ່າ: ຜົນສຳເລັດຂອງການຮ່ວມມື ດັ່ງ ກ່າວແມ່ນໄດ້ຮັບການສະໜັບສະໜູນໂດຍສະມາຄົມໄທ-ລາວ, ລາວ-ໄທ ເພື່ອມິດຕະພາບ ແລະ ຖືເປັນອີກຜົນສຳເລັດ ໜຶ່ງໃນການສົ່ງເສີມສາຍສຳພັນ ແລະ ຄວາມຮ່ວມມືລະຫວ່າງສອງປະເທດ ລາວ-ໄທ ທີ່ນຳມາເຊິ່ງຜົນປະໂຫຍດ ແລະ ຄວາມ ສະໜຸກສະໜານຈາກການແຂ່ງຂັນກິລາຍອດນິຍົມອັນດັບແຖວໜ້າຂອງໂລກ ມາໃຫ້ຜູ້ບໍລິໂພກກໍຄືປະຊາຊົນລາວບັນດາເຜົ່າ ໃນຂອບເຂດທົ່ວປະເທດໄດ້ຮັບຊົມ.

            ນອກຈາກນີ້ ບໍລິສັດ ທຣູ ວີຊັນ ຍັງໄດ້ຮ່ວມເຊັນສັນຍາກັບ ບໍລິສັດ ທຣິບໂພຼເອັສ (Triple-S) ລາວ ຈຳກັດ ເພື່ອ ນຳສະເໜີລາຍການນາໆສາລະ, ກິລາ ແລະ ບັນເທິງຕ່າງປະເທດພາຍໃຕ້ລິຂະສິດຂອງບໍລິສັດ ທຣູ ວີຊັນ ເຊັ່ນ: ລາຍການ ກ໋ອຟ, ແຂ່ງຂັນດອກປີກ ໄກ່ນາໆຊາດ, ລາຍການບັນເທິງ ຈາກ ສ ເກົາຫລີ ແລະ ຮູບເງົາ ຕ່າງປະເທດ ແລະ ລາຍການໃໝ່ ທີ່ຜະລິດໂດຍບໍລິສັດ ທຣິບໂພຼ ເອັສ ເຊັ່ນ:ລາຍການໂຈ ແດນຈຳ ປາ ແລະ ລາຍການກະເສດໂລກ ສົ່ງເສີມກະສິກຳລາວ ອອກອາ ກາດຜ່ານ ຊອງທຣູ ວີຊັນ ນຳດ້ວຍ.