ປະຊາຊົນເມືອງແບງທີ່ຖືກຜົນກະທົບຈາກໄພທຳມະຊາດໄດ້ຮັບການຊ່ວຍເຫລືອເບື້ອງຕົ້ນ

           ປັດຈຸບັນການນຳແຂວງ ອຸດົມໄຊ ຮ່ວມກັບຄະນະແກ້ໄຂໄພພິບັດຂອງ ແຂວງ, ຂະແໜງການທີ່ກ່ຽວຂ້ອງ, ກຳລັງປ້ອງ ກັນຊາດ-ປ້ອງກັນຄວາມສະຫງົບ ແລະ ພາກສວ່ນອື່ນໆທັງພາກລັດ ແລະ ເອກະຊົນ ພວມສຸມໃສ່ຊວ່ຍ ເຫລືອ ເພື່ອບັນເທົ່າ ທຸກແກ່ປະຊາຊົນຢູ່ບ້ານເພຍຫົວນ້ຳ, ບ້ານໂພນສະອາດ, ບ້ານນາປາ ແລະ ບ້ານ ອື່ນໆ ທີ່ຢູ່ລຽບຕາມແຄມແມ່ນ້ຳແບງທີ່ຖືກຜົນກະທົບຈາກໄພທຳ ມະຊາດ ໂດຍໄດ້ນຳເອົາເຄື່ອງນຸງຫົ່ມ, ເຄື່ອງນອນ, ເຄື່ອງໃຊ້ໃນຄົວເຮືອນທີ່ຈຳເປັນຈຳນວນໜື່ງໄປມອບໃຫ້ແກ່ປະຊາຊົນ ທີ່ໄດ້ຮັບຜົນກະທົບຢູ່ບ້ານເພຍຫົວນ້ຳເປັນມູນຄ່າທັງໝົດ 19 ລ້ານກວ່າກີບ ແລະ ພາກສວນກ່ຽວຂ້ອງຕ່າງໆກໍໄດ້ລົງ ເກັບກຳຂໍ້ມູນຜົນເສຍຫາຍຈາກໄພພິບັດຄັ້ງນີ້ແລ້ວ.

           ທ່ານ ໄກຍະແກ້ວ ວົງສາລະສິນ ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງ ໄດ້ລາຍງານວ່າ: ອຳນາດ ການປົກຄອງແຂວງ ແລະ ເມືອງພວມສຸມໃສ່ໃຫ້ການ ຊວ່ຍເຫລືອບັນເທົາທຸກແກ່ປະຊາຊົນຜູ້ປະສົບໄພທຳມະຊາດ ໃນ ຄັ້ງນີ້ ສວ່ນການແກ້ໄຂສະພາບເສັ້ນທາງທີ່ເປ່ເພ ອີກປະມານ 1 ອາທິດລົດໃຫຍ່ຈຶ່ງຈະສາມາດທຽວໄດ້. ນອກຈາກນັ້ນລະບົບ ໄຟຟ້າ

ແລະ ສັນຍານໂທລະສັບກໍຖືກແກ້ໄຂໄປພ້ອມໆກັນ. ສຳລັບໄພທຳມະຊາດດັ່ງກ່າວວ່າໄດ້ ເກີດຂຶ້ນໃນຄ່ຳຄືນຂອງວັນທີ 20 ສິງ ຫາ 2013 ນີ້ໄດ້ມີຝົນຕົກໜັກເຮັດໃຫ້ສາຍນ້ຳແບງ ແລະ ສາຍ ນ້ຳອື່ນໆເພີ່ມຂຶ້ນສູງ ແລະ ນ້ຳປ່າໄຫລຊຸແຮງເກີດມີນ້ຳຖ້ວມດິນ ເຈື່ອນລົງມາທັບເຮືອນຊານ ແລະ ພື້ນທີ່ທຳການຜະລິດຂອງຊາວກະສິກອນເສຍຫາຍຢ່າງໜັກ ໂດຍສະເພາະຢູ່ເມືອງແບງ ແຂວງອຸດົມໄຊຈາກການລົງເກັບກຳຂໍ້ມູນໃນເບື້ອງຕົ້ນຮູ້ວ່າ: ປະຊາຊົນຫລາຍບ້ານໄດ້ຮັບຜົນກະທົບ, ໃນນັ້ນມີບ້ານເພຍ ຫົວນ້ຳ, ບ້ານໂພນສະອາດ, ບ້ານນາປາ ແລະ ບ້ານອື່ນໆ ທີ່ຢູ່ລຽບຕາມແຄມ ແມ່ນ້ຳແບງມີຜູ້ເສຍຊີວິດທັງໝົດ 15 ຄົນ,ຍິງ 9 ຄົນ,ໃນນັ້ນດິນ ເຈື່ອນທັບເສຍຊີວິດ 7 ຄົນ ແລະ ຖືກນ້ຳພັດເສຍຊີວິດ 8 ຄົນ. ເຮືອນ ທີ່ຖືກຜົນກະທົບຢູ່ໃນ 3 ບ້ານມີ ບ້ານເພຍຫົວນ້ຳ, ບ້ານ ໂພນສະອາດ ແລະ ບ້ານນາປາລວມ 160 ກວ່າຫລັງຖືກນ້ຳຖວ້ມ,ໃນນັ້ນ ເຮືອນທີ່ຖືກນ້ຳພັດເສຍ ຫາຍທັງໝົດເກືອບ 48 ຫລັງ, ປະຊາຊົນຂາດ ທີ່ຢູ່ອາໄສບໍ່ມີເຂົ້າກິນ 29 ຄອບຄົວ, ເລົ້າເຂົ້າຖືກນ້ຳຖວ້ມ ແລະ ນ້ຳພັດໄຫລ ເສຍຫາຍຍັງບໍ່ສາມາດຮູ້ຈຳນວນ, ເນື້ອທີ່ທຳການຜະລິດເສຍຫາຍຫລາຍກວ່າ 200 ເຮັກຕາ, ສັດລ້ຽງງົວ 35 ໂຕ, ໝູເກືອບ 20 ໂຕ ແລະ ສັດປີກເສຍຫາຍເກືອບທຸກຄອບຄົວທີ່ໄດ້ຮັບຜົນກະທົບ, ເສັ້ນ ທາງຖືກຕັດຂາດ 3 ຈຸດ, ຂົວຂາດ 4 ຈຸດ, ດິນ ເຈື່ອນຕົ້ນໄມ້ຫັກທັບທາງ ແລະ ທາງ ເປ່ເພເລັກນ້ອຍມີຫລາຍກວ່າ 10 ຈຸດ, ເສົາໄຟຟ້າຫັກ-ລົ້ມລວມໄລຍະທາງປະມານ 15 ກິໂລແມັດ ຫລື ປະມານ 200 ກວ່າຕົ້ນ, ດ້ານການສື່ສານຖືກຕັດຂາດປະຊາຊົນບໍ່ມີນ້ຳໃຊ້ນ້ຳດື່ມບໍ່ມີໄຟຟ້າໃຊ້.

         ສ່ວນມູນຄ່າການເສຍຫາຍທັງໝົດມາຮອດປະຈຸບັນຍັງບໍ່ສາມາດປະເມີນໄດ້ເທື່ອຊຶ່ງທາງຄະນະກຳມະການຄວບຄຸມ ໄພພິບັດຂັ້ນແຂວງ ແລະ ເມືອງພວມສືບຕໍ່ກັບກຳຂໍ້ມູນຕື່ມອີກ.