ຫາລືການແກ້ໄຂຜົນກະທົບດ້ານສິ່ງແວດລ້ອມ-ສັງຄົມຈາກໂຄງການປູຢາງພາລາກາວຊູຢູ່ແຂວງເຊກອງ

          ໃນວັນທີ 21 ສິງຫານີ້ຢູ່ ຫ້ອງວ່າການປົກຄອງເມືອງລະມາມ ແຂວງເຊກອງ, ກົມປະເມີນຜົນກະທົບຕໍ່ສິ່ງແວດລ້ອມ ແລະ ສັງຄົມກະຊວງຊັບພະຍາກອນທຳມະຊາດ ແລະ ສິ່ງແວດລ້ອມຮ່ວມກັບ ບໍລິສັດ ຢາງພາລາກາວຊູ ລາວ-ຫວຽດ (LVF) ດຳເນີນ ການປະເມີນຜົນກະທົບດ້ານສິ່ງແວດລ້ອມ ແລະ ສັງຄົມຂອງໂຄງການປູກຢາງພາລາກາວຊູ ແລະໂຮງງານປຸງແຕ່ງ ຢາງກາວຊູ ຢູ່ແຂວງດັ່ງກ່າວ, ໂດຍການເຂົ້າຮ່ວມຂອງຮອງເຈົ້າແຂວງແຂວງເຊກອງ ທ່ານ ລ້ຽງ ຄຳພູນ,ຊ່ອງໜ້າອຳນາດ ການປົກຄອງ 2 ເມືອງລະມາມ ແລະ ທ່າແຕງ ແລະ ປະຊາຊົນຜູ້ຖືກຜົນກະທົບເຂົ້າຮ່ວມ.   

            ກອງປະຊຸມໄດ້ພ້ອມກັນປຶກສາຫາລືແລກປ່ຽນບົດຮຽນ ແລະ ຊອກວິທີແກ້ໄຂບັນຫາທີ່ມີຄວາມສ່ຽງຕໍ່ ສິ່ງແວດ ລ້ອມ, ດິນຟ້າອາກາດ, ການດຳລົງຊີວິດຂອງປະຊາຊົນ, ບັນຫາຄ່າແຮງງານບໍ່ຍຸດຕິທຳ, ການບຸກເບີກເນື້ອທີ່ກາຍເຂດອະນຸ ມັດ, ການນຳໃຊ້ແຮງງານຕ່າງດ້າວລວມທັງນະໂຍບາຍຊ່ວຍເຫລືອບ້ານ, ການຂົນສົ່ງແຮງງານ ແລະ ວິທີທຳມາຫາກິນຂອງປະ ຊາຊົນໃນເຂດສວນຢາງຊຶ່ງມີເນື້ອທີ່ 3 ພັນກວ່າເຮັກຕາ, ກວມເອົາຈຳນວນ 18 ບ້ານຂອງເມືອງທ່າແຕງ ແລະ 2 ບ້ານຂອງ

ເມືອງລະມາມ, ສຳລັບໂຮງງານ-ຢາງພາລາຕັ້ງຫ່າງຈາກບ້ານປ່າໄລ່ ເມືອງທ່າແຕງ 800 ແມັດ ທີ່ມີຄວັນຂອງໂຮງງານທຳລາຍ ມົນລະຜິດອາກາດຊຶ່ງຜູ້ດຳລົງຊີວິດຢູ່ບໍລິເວນໃກ້ຄຽງມີຄວາມເປັນຫ່ວງ ແລະ ລໍຄອຍການແກ້ໄຂຈາກພາກສ່ວນກ່ຽວຂ້ອງ. ໂຮງງານນີ້ ມີບໍລິມາດການຜະລິດ 3 ພັນໂຕນ ຕໍ່ປີ, ສະເພາະປີນີ້ທາງບໍລິສັດ ໄດ້ເລິ່ມກີດຢາງ-­ເນື້ອທີ່ 800 ເຮັກຕາ ເທົ່າກັບ 27 % ຂອງເນື້ອທີ່ປູກໃນສອງຕົວເມືອງ, ຮອດປີ 2017 ຄາດໝາຍໃຫ້ໄດ້ກີດ 100% ແລະ ຄາດຄະເນນ້ຳຢາງໃຫ້ໄດ້ 2 ໂຕນຕໍ່ເຮັກຕາ ໂດຍທັງສອງຝ່າຍໄດ້ຮ່ວມກັນຊອກວິທີການແກ້ໄຂເຮັດໃຫ້ປະຊາຊົນແຂວງເຊກອງມີວຽກເຮັດງານທຳ ແລະ ມີລາຍຮັບຫລາຍຂຶ້ນ .         

        ເຖິງຢ່າງໃດກໍດີກອງປະຊຸມຍັງໄດ້ເປັນເອກະສັນກັນວາງຂໍ້ກຳນົດໃຫ້ບໍລິສັດທີ່ດຳເນີນໂຄງການຕ້ອງຮັບປະກັນຕໍ່ຄວາມ ສຽ່ງຜົນກະທົບບາງດ້ານເຊັ່ນ: ນ້ຳຫວ້ຍບາງສາຍ, ສິ່ງເສດເຫລືອຈາກໂຮງງານ, ແຮງງານຈາກຖິ່ນອື່ນ ທາງບໍລິສັດຈະຕ້ອງໄດ້ ເອົາໃຈໃສ່ແກ້ໄຂດ້ວຍຄວາມຮັບຜິດຊອບສູງໂດຍບໍ່ໃຫ້ເກີດຜົນກະທົບ ແລະ ໃຫ້ຄ່າຊົດເຊີຍແກ່ຄອບຄົວ ແລະ ບ້ານທີ່ຖືກຜົນ ກະທົບຄືກັບໂຄງການອື່ນໆທີ່ລົງທຶນ ຢູ່ ສປປ.ລາວ ຕໍ່ບັນຫານີ້, ຮອງເຈົ້າແຂວງເຊກອງໄດ້ເນັ້ນ ວ່າ:ໂຄງການປູກ ແລະ ສ້າງຕັ້ງ ໂຮງງານປຸງແຕ່ງຢາງ ກາວຊູ ຂອງບໍລິສັດ LVF ແມ່ນອີກໜຶ່ງໂຄງການທີ່ ໄດ້ຂຸດ ຄົ້ນທ່າແຮງບົ່ມ ຊ້ອນຢູ່ ແຂວງເຊກອງ, ຊຶ່ງ ເປັນການລົງທຶນທີ່ໃຫ້ຜົນຕອບແທນທາງດ້ານເສດຖະກິດ ແລະ ສັງຄົມສູງພໍສົມຄວນແຕ່ຍ້ອນຈຸດພິເສດດ້ານທີ່ຕັ້ງຂອງໂຄງ ການດັ່ງກ່າວທີ່ມີເນື້ອທີ່ກວ້າງຂວາງຈິ່ງເຮັດໃຫ້ມີຜົນກະທົບຕໍ່ຊັບພະຍາກອນທຳມະຊາດ, ດັ່ງນັ້ນເພື່ອເຮັດໃຫ້ໂຄງການໄດ້ມີ ການພັດທະນາຕ້ອງໄດ້ມີມາດຕະການປອ້ງກັນ ແລະ ຫລຸດຜອ່ນຜົນກະທົບຕໍ່ສິ່ງແວດລອ້ມ ແລະ ສັງຄົມໂດຍຫລີກລຽງບໍ່ ໃຫ້ມີຜົນກະທົບຫລືມີຜົນກະທົບໜ້ອຍທີ່ສຸດຕໍ່ການດຳລົງຊີວິດ ແລະ ເນື້ອທີ່ທຳການຜະລິດຂອງປະຊາຊົນໃນເຂດນີ້.