ລາວ-ຈີນ ສືບຕໍ່ຮັດແຫນ້ນຄູ່ຮ່ວມມືຍຸດທະສາດຮອບດ້ານ

              ໃນຕອນບ່າຍວັນທີ 3 ສິງຫາ 2013 ນີ້ ຢູ່ທີ່ທຳ ນຽບປະທານປະເທດ, ທ່ານ ຈູມມາລີ ໄຊຍະສອນ ປະທານປະເທດ ແຫ່ງສາທາລະນະລັດປະຊາທິປະ ໄຕ ປະຊາຊົນລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ຫວ່າງອີ້ (Wang Yi) ລັດຖະມົນຕີ ວ່າການກະຊວງການຕ່າງ ປະເທດ ແຫ່ງ ສປ.ຈີນ ໃນ ໂອກາດເດີນທາງມາຢ້ຽມຢາມ ລາວ ຢ່າງ ເປັນທາງການແຕ່ວັນທີ 2-3 ສິງຫາ 2013 ນີ້ ໂດຍຕອບສະໜອງຕາມຄຳເຊີນຂອງ ທ່ານ ດຣ. ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນ ຕີວ່າການກະຊວງການຕ່າງປະເທດຂອງລາວ.                             

    ປະທານປະເທດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ ຫວ່າງອີ້ ທີ່ໄດ້ນຳພາຄະນະ ເດີນທາງມາຢ້ຽມ ຢາມ ສປປ ລາວ ຢ່າງເປັນທາງການໃນຄັ້ງນີ້ ຊຶ່ງເປັນການປະກອບສ່ວນສຳຄັນເຂົ້າໃນ ການເພີ່ມທະວີຮັດແໜ້ນສາຍພົວພັນ ຮ່ວມມືສອງຝ່າຍລະຫວ່າງປະເທດລາວ-ຈີນ ບົນຈິດໃຈເປັນຄູ່ຮ່ວມມືຍຸດທະສາດຮອບດ້ານໃຫ້ມີບາດກ້າວຂະຫຍາຍຕົວ

ຂຶ້ນໄປເລື້ອຍໆເວົ້າລວມ, ເວົ້າສະເພາະກໍແມ່ນການ ເສີມຂະຫຍາຍການພົວພັນຮ່ວມມືລະຫວ່າງກະຊວງການຕ່າງປະເທດແຫ່ງ ສປປ. ລາວ ແລະ ສປ.ຈີນ. ພ້ອມນີ້, ທ່ານ ຍັງໄດ້ສະແດງຄວາມຂອບໃຈຜ່ານ ທ່ານ ຫວ່າງອີ້ ໄປຍັງລັດຖະບານຈີນ (ສະພາ ກາແດງ ຈີນ) ທີ່ໄດ້ຊ່ວຍເຫລືອ ສປປ ລາວຢ່າງທັນການເພື່ອນຳໄປຊ່ວຍເຫລືອ ແລະ ສະກັດກັ້ນພະຍາດໄຂເລືອດ ອອກທີ່ ພວມລະບາດໃນປັດຈຸບັນ, ຕາງໜ້າໃຫ້ແກ່ພັກ-ລັດຖະບານ ແລະ ປະຊາຊົນລາວສະແດງຄວາມ ຂອບໃຈຢ່າງຈິງໃຈ ແລະ ຄວາມຮູ້ບຸນຄຸນຢ່າງເລິກເຊິ່ງຕໍ່ພັກ- ລັດຖະບານ ແລະ ປະຊາຊົນຈີນທີ່ໄດ້ໃຫ້ ການຊ່ວຍເຫລືອອັນລ້ຳຄ່າແກ່ພາລະ ກິດປົກ ປ່ອຍຊາດໃນເມື່ອກ່ອນກໍຄືພາລະກິດໃນການສ້າງສາພັດທະ ນາປະເທດຊາດໃນປັດຈຸບັນ ແລະ ໃນໂອກາດນີ້, ປະທານປະເທດ ຍັງໄດ້ສະເໜີໃຫ້ທັງສອງປະເທດສືບຕໍ່ ສະໜັບສະໜູນ ແລະ ປະສານສົມທົບກັນຢ່າງໃກ້ຊິດໃນເວທີພາກພື້ນ ແລະ ສາກົນ ເຮັດໃຫ້ພາລະບົດບາດຂອງສອງປະເທດສູງເດັ່ນຂຶ້ນທັງເປັນທ່າແຮງໃຫ້ແກ່ການພັດທະນາປະເທດຊາດເພື່ອພ້ອມກັນກ້າວຂຶ້ນສູ່ ສັງຄົມນິຍົມຢ່າງມີເປົ້າໝາຍ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ.                 

        ໃນຕອນບ່າຍຂອງວັນດຽວກັນ, ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ກໍ ໄດ້ໃຫ້ກຽດຕ້ອນຮັບ ທ່ານ ຫວ່າງອີ້  ລັດຖະມົນຕີວ່າການກະຊວງການຕ່າງປະເທດແຫ່ງ ສປ. ຈີນ  ເຊັ່ນ ດຽວກັນ. ໃນໂອກາດນີ້, ທ່ານ ຫວ່າງອີ້ ລັດຖະມົນຕີວ່າການກະຊວງການຕ່າງປະເທດແຫ່ງ ສປ. ຈີນ ໄດ້ ຕາງໜ້າຄະນະສະແດງຄວາມຂອບອົກຂອບໃຈຕໍ່ການຕ້ອນຮັບອັນອົບອຸ່ນຂອງປະທານປະເທດ ແລະ ນາຍົກລັດຖະມົນຕີແຫ່ງ ສປປ ລາວ ພ້ອມທັງໄດ້ແຈ້ງໃຫ້ຊາບເຖິງຜົນການພົບປະສອງຝ່າຍຊຶ່ງຝ່າຍລາວ ນຳໂດຍ ທ່ານ ດຣ. ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະ ເທດຊຶ່ງສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນແບບຄູ່ຮ່ວມ ມືຍຸດທະສາດຮອບດ້ານລະຫວ່າງສອງປະເທດໄດ້ຮັບການເສີມຂະຫຍາຍຢ່າງຕໍ່ເນື່ອງ ແລະ ເພີ່ມທະວີຂຶ້ນ ເລື້ອຍໆ, ສອງຝ່າຍໄດ້ສະແດງຄວາມຊື່ນຊົມຍິນດີຕໍ່ຜົນການພົວພັນຮ່ວມມືຊ່ວຍເຫລືອເຊິ່ງກັນ ແລະ ກັນ ໃນດ້ານຕ່າງໆອັນໄດ້ນຳຜົນປະໂຫຍດຕົວຈິງມາສູ່ປະຊາຊົນສອງຊາດ ໂດຍສະເພາະແມ່ນການຊ່ວຍເຫລືອ ສປປ ລາວ ໃນຫລາຍດ້ານລວມທັງຄວາມພ້ອມເພື່ອກ້າວເຂົ້າສູ່ປະຊາຄົມອາຊຽນ ໃນປີ 2015 ກໍ ຄືການ ປະຕິບັດເປົ້າໝາຍສະຫັດສະວັດ ແລະ ການປະຕິບັດຄາດໝາຍສູ້ຊົນເຮັດໃຫ້ ສປປ ລາວ ຫລຸດພົ້ນອອກ ຈາກຄວາມດ້ອຍ ພັດທະນາໃນປີ 2020.               

            ນອກຈາກນັ້ນ, ສອງຝ່າຍ ຍັງໄດ້ລົງເລິກປຶກສາຫາລືກ່ຽວກັບການສ້າງແຜນປະຕິບັດງານ ວ່າ ດ້ວຍການເສີມຂະຫຍາຍສາຍພົວພັນແບບຄູ່ຮ່ວມມືຍຸດທະສາດຮອບດ້ານ ລະຫວ່າງລັດຖະບານ ລາວ ແລະ ຈີນ, ການຮ່ວມມືດ້ານເສດຖະກິດ, ການຄ້າ, ການລົງ ທຶນ, ການຮ່ວມມືໃນຂົງເຂດການສຶກສາ, ສາ ທາລະນະສຸກ, ວັດທະນະທຳ-ສັງຄົມ ແລະ ຂະແໜງການອື່ນໆລວມທັງການເປີດກົງສູນໃຫຍ່ແຫ່ງ ສປປ ລາວ ຢູ່ກວາງໂຈ. ພ້ອມດຽວກັນນີ້, ລັດຖະມົນຕີ ຫວ່າງອີ້ ກໍໄດ້ ຢືນຢັນເຈຕະນາລົມຂອງລັດຖະບານ ຈີນໃນການຮ່ວມມືຢ່າງເປັນຮູບປະທຳເພື່ອເຮັດໃຫ້ທາງລົດໄຟ ລາວ-ຈີນ ໄດ້ຮັບການລົງມືກໍ່ສ້າງໃນມໍ່ໆນີ້. ພິເສດລັດຖະບານຈີນຈະໃຫ້ທຶນກູ້ຢຶມລັດຖະບານລາວຈຳນວນ 573 ລ້ານຢວນ ສຳລັບໂຄງການຂະ ຫຍາຍນ້ຳປະປາດົງໝາກຄາຍ ແລະ ຈະໃຫ້ການຊ່ວຍເຫລືອຕ້ານພະຍາດໄຂ້ເລືອດອອກຕື່ມອີກຈຳນວນ 200.000 ໂດລາສະຫະລັດ; ສອງຝ່າຍ ຍັງໄດ້ຕີລາຄາສູງຕໍ່ການພົວພັນຮ່ວມມືລະຫວ່າງສອງກະຊວງ ການຕ່າງປະເທດພ້ອມທັງໄດ້ ແລກປ່ຽນຄຳເຫັນຕໍ່ບາງບັນຫາ ສາກົນ ແລະ ພາກພື້ນທີ່ທັງສອງຝ່າຍມີ ຄວາມສົນໃຈໂດຍສະພາະການພົວພັນຮ່ວມມືໃນຂອບສປຊ, ອາຊຽນ-ຈີນ ແລະ ອື່ນໆ, ສອງຝ່າຍຢືນຢັນ ທີ່ຈະສືບຕໍ່ຮ່ວມມືກັນໃນຂົງເຂດການຕ່າງປະເທດ ກໍຄືການປຶກສາຫາລື ແລະ ການສະໜັບສະໜູນເຊິ່ງ ກັນ ແລະ ກັນໃນບັນຫາພາກພື້ນ ແລະ ສາກົນ. ພ້ອມ ກັນນີ້, ຝ່າຍຈີ ກໍໄດ້ຕົກລົງສະໜອງທຶນການສຶກສາ ຈຳນວນໜຶ່ງຫໃ້ແກ່ກະຊວງການຕ່າງປະເທດຂອງລາວ.