ຫລວງພະບາງ-ວັງວຽງນັກທ່ອງທ່ຽວຫລຸດລົງຮຽກຮ້ອງໃຫ້ເພີ່ມການໂຄສະນາ

         ເມືອງຫລວງພະບາງ ແລະ ເມືອງວັງວຽງ ແຂວງວຽງຈັນ, ເຊິ່ງແມ່ນສະ ຖານທີ່ສຳຄັນໃນການດຶງດູດນັກທ່ອງທ່ຽວເຂົ້າມາລາວພວມປະເຊີນບັນ ຫາຈຳນວນ ນັກທ່ອງທ່ຽວຫລຸດລົງໂດຍສະ ເພາະແມ່ນນັກທ່ອງທ່ຽວຈາກບັນດາປະເທດເອີຣົບ ແລະ ອາເມລິກາ ຂະນະທີ່ຜູ້ຕາງໜ້າສະມາຄົມກຸ່ມທຸລະກິດທ່ອງທ່ຽວ -ໂຮງແຮມ ຮຽກຮ້ອງໃຫ້ພາກລັດກ່ຽວຂ້ອງສຸມໃສ່ໂຄສະນາການທ່ອງທ່ຽວລາວໃຫ້ແຂງ ແຮງກວ່າເກົ່າ.

           ບັນຫາດັ່ງກ່າວ ໄດ້ຍົກຂຶ້ນມາລາຍງານໃນກອງປະຊຸມທຸລະກິດລາວຄັ້ງທີ VIII ໃນວັນທີ 20 ສິງຫານີ້ ຢູ່ນະຄອນ ຫລວງວຽງຈັນ ໂດຍສະມາຄົມກຸ່ມທຸລະກິດທ່ອງທ່ຽວ-ໂຮງແຮມ ໄດ້ສະເໜີວ່າ: ເປັນທີ່ຮັບຮູ້ກັນດີວ່າ ສປປ ລາວ ໄດ້ກາຍ ເປັນປະເທດທີ່ໜ້າທ່ອງທ່ຽວທີ່ສຸດຂອງໂລກ ໃນປີ 2013 ແຕ່ການໂຄສະນາກ່ຽວກັບ ການທ່ອງທ່ຽວລາວ ຍັງບໍ່ທັນເຮັດໄດ້ດີ ເທົ່າທີ່ຄວນບັນດາບໍລິສັດທ່ອງທ່ຽວສົ່ງແຂກມາລາວ ກໍບໍ່ມີໃຜຮູ້ວ່າປະເທດ ລາວເປັນ ປະເທດທີ່ໜ້າທ່ອງທ່ຽວ ທີ່ສຸດໃນໂລກ ສົມທົບກັບໃນປີນີ້ ການແກ່ງແຍ່ງແຂ່ງຂັນລູກຄ້າ ກັບຫລາຍປະເທດໂດຍສະເພາະ

ປະເທດມຽນມ້າເຊິ່ງເປັນປະເທດເປີດໃໝ່ເຮັດໃຫ້ລູກຄ້າມີຄວາມສົນໃຈກວ່າໂດຍສະເພາະຈາກບັນດາປະເທດເອີຣົບ ແລະ ອາເມລິກາ ແມ່ນຫລຸດລົງຢ່າງເຫັນໄດ້ຈະແຈ້ງຄືຢູ່ແຂວງຫລວງພະບາງ ແລະ ວັງວຽງ. ດັ່ງນັ້ນ ເພື່ອເປັນການດຶງດູດນັກທ່ອງ ທ່ຽວໃຫ້ເຂົ້າມາທ່ຽວຫລາຍ ແລະ ໃຫ້ມີບັນຍາກາດຟົດຟື້ນຄືດັ່ງຜ່ານມາຂໍໃຫ້ພາກລັດກ່ຽວຂ້ອງເຂົ້າມາ ຊ່ວຍໃນການໂຄສະ ນາການທ່ອງທ່ຽວໃນຮູບແບບຕ່າງໃຫ້ ຫລາຍກວ່າເກົ່າທັງພາຍໃນ ແລະ ຕ່າງປະເທດ, ນອກຈາກນີ້ໃຫ້ກວດຄືນບັນດາບໍລິສັດ ທ່ອງທ່ຽວຈຳນວນໜຶ່ງທີ່ເຄື່ອນໄຫວບໍ່ຖືກລະບຽບໃຫ້ຫັນເຂົ້າສູ່ລະບຽບກົດໝາຍເພື່ອຮັບປະກັນໃຫ້ການທ່ອງທ່ຽວສ້າງລາຍຮັບເຂົ້າປະເທດໄດ້ຫລາຍເທົ່າທີ່ຈະ ຫລາຍໄດ້. 

           ແນວໃດກໍຕາມສະມາຄົມທ່ອງທ່ຽວໃຫ້ຮູ້ວ່າ: ຜ່ານມາພາກສ່ວນກ່ຽວຂ້ອງໄດ້ເອົາໃຈໃສ່ແກ້ໄຂບັນຫາຫຍໍ້ທໍ້ຕ່າງໆ ເຊັ່ນ: ການມົ້ວສຸມຢາເສບຕິດຕ່າງໆຂອງນັກທ່ອງທ່ຽວ, ບັນຫາໂສເພນີ ແລະ ອື່ນໆ ຢ່າງຕໍ່ເນື່ອງແຕ່ສອງສາມປີມານີ້ປາ ກົດມີສະພາບເຫດການລັກເຄື່ອງຂອງນັກທ່ອງທ່ຽວເກີດຂຶ້ນຕາມເຮືອນພັກ ແລະ ໂຮງແຮມ ແລະ ສິ່ງດັ່ງກ່າວ ໄດ້ສົ່ງຜົນ ກະທົບຕໍ່ຄວາມຮູ້ສຶກຂອງນັກທ່ອງທ່ຽວທີ່ເຫັນວ່າປະເທດລາວມີຄວາມປອດໄພດັ່ງເມື່ອກ່ອນນັ້ນກໍອາດໝົດຫາຍໄປຍ້ອນ ບັນຫາບໍ່ດີດັ່ງກ່າວນີ້.