ລົດຈັກສອງຄັນຂີ່ສວນທາງກັນໃນຄວາມໄວສູງຕຳກັນຢ່າງຮຸນແຮງແລ້ວຟົ້ງໄປຕຳໃສ່
ລົດໃຫຍ່ທີ່ຂີ່ມາທາງຫຼັງເຮັດໃຫ້ມີຜູ້ເສຍຊີວິດຄາທີ່ໜຶ່ງຄົນ, ເຫດການດັ່ງກ່າວເກີດຂຶ້ນໃນຄືນຂອງວັນທີ
1 ກັນຍານີ້ ຢູ່ຖະໜົນ ສີທອງ ເຂດບ້ານດົງນາໂຊກ ເມືອງ ສີໂຄດຕະບອງ ນະຄອນຫຼວງວຽງຈັນ.
ເຈົ້າໜ້າທີ່ຈະລາຈອນ ນະຄອນຫຼວງວຽງຈັນ ໃຫ້ຮູ້ວ່າ:
ພາຍຫຼັງໄດ້ຮັບແຈ້ງເກີດອຸປະຕິເຫດ, ເຈົ້າໜ້າທີ່ກໍໄດ້ຮີບຮ້ອນລົງສະຖານທີ່ເກີດເຫດ
ແລະ ພົບຜູ້ເສຍຊີວິດ 1 ຄົນ ຄື ນາງ ມະນີຈັນ ຢູ່ບ້ານດົງນາໂຊກ ເມືອງສີໂຄດຕະບອງ
ນະຄອນ ຫຼວງວຽງຈັນ ຜູ້ກ່ຽວໄດ້ຂັບຂີ່ລົດຈັກໝາຍເລກທະບຽນ ຍວ 7681 ອອກມາຈາກເຮືອນເພື່ອມຸ່ງໜ້າໄປທາງບ້ານປາກທ້າງ
ໄດ້ຕຳກັບລົດຈັກໝາຍເລກທະບຽນ ຈວ 3502 ຂັບຂີ່ໂດຍທ້າວ ສອນໄຊ ພະນັກງານທະຫານ ທີ່ຂັບມາໃນຄວາມໄວເຮັດໃຫ້ລົດຈັກຂອງນາງ
ມະນີຈັນ ຟົ້ງໄປຕຳເອົາລົດກະບະໝາຍເລກທະບຽນ ຂກ 3111 ເຮັດໃຫ້ນາງ ມະນີຈັນ ເສຍຊີວິດຄາທີ່.
ປັດຈຸບັນສາເຫດຂອງການເກີດອຸປະຕິເຫດທາງເຈົ້າໜ້າທີ່ພວມສືບສວນ- ສອບສວນ.
ເຈົ້າໜ້າທີ່ຈະລາຈອນ ນະຄອນຫຼວງຽວຽງຈັນ
ໃຫ້ຮູ້ອີກວ່າ: ໃນເດືອນຜ່ານມາຢູ່ນະຄອນຫຼວງວຽງຈັນ ມີອຸປະຕິເຫດເກີດຂື້ນ
104 ກໍລະນີ, ມີຜູ້ເສຍຊີວິດ 13 ຄົນ ຊຶ່ງເພີ່ມຂື້ນຈາກເດືອນກໍລະກົດ 2 ຄົນ, ສາເຫດສ່ວນໃຫຍ່ທີ່ພາໃຫ້ເກີດອຸປະຕິເຫດແມ່ນຂັບຂີ່ລົດໄວ,
ດື່ມສິ່ງມືນເມົາ, ປ່ຽນທີດທາງບໍ່ຮັບປະກັນ ແລະ ການລ່ວງລະເມີດລະບຽບຈະລາຈອນ ອື່ນໆອີກ.
No comments:
Post a Comment