ສົກຮຽນໃຫມ່ເປີດຫົວໃຈ ກຽມພ້ອມ ຫລື ຍັງ ? ( ຄໍລຳ ແລກປ່ຽນຄຳເຫັນ )

ໂດຍ : ຊາຍຄຳ ຈຳປາອຸທຸມ

     ວັນທີ 1 ກັນຍາຂອງທຸກໆປີ ຖື ວ່າເປັນມື້ເປີດສົກຮຽນໃໝ່ ເຊິ່ງມື້ ດັ່ງກ່າວນີ້ແມ່ນມີຄວາມສຳຄັນຫລາຍຕໍ່ກັບຊີວິດຂອງ ນັກຮຽນ- ນັກສຶກສາ ແລະ ຂອງຜູ້ເປັນພໍ່ແມ່ ແລະ ຈະຕ້ອງມີຄວາມຮັບຜິດຊອບເຊິ່ງກັນ ແລະ ກັນໃນການຫ້າງຫາກະກຽມ ເງື່ອນໄຂຕ່າງໆດັ່ງອຸປະກອນການສຶກສາ, ຄ່າຮຽນ ຕະຫລອດຮອດຄວາມພ້ອມ ທັງດ້ານຈິດໃຈນຳອີກ. ນອກຈາກຈະຕ້ອງ ມີເງິນຈຳນວນໜຶ່ງຖ້າຜູ້ມີຖານະຄອບຄົວດີແດ່ກໍຈະ ບໍ່ຢາກ, ແຕ່ສຳລັບຄອບຄົວທີ່ບໍ່ຄ່ອຍມີລາຍຮັບຫລາຍປານໃດບາງຄົນ ຈຳເປັນຕ້ອງໄດ້ຂາຍດິນ ດອນຕອນຫຍ້າ, ຂາຍງົວ-ຄວາຍ ຫາທຸກວິທີ ເພື່ອມີເງື່ອນໄຂສົ່ງເສີມໃຫ້ແກ່ລູກໄດ້ຮຽນໜັງສື, ແຕ່ ກົງກັນຂ້າມ ຜູ້ເປັນລູກພັດບໍ່ຄິດ ແນວນັ້ນ ພັດມານຳໃຊ້ສະຖານທີ່ ໂຮງຮຽນເປັນບ່ອນອວດລ້ຳ- ອວດລວຍ, ອວດຮັ່ງ-ອວດ ມີ ໂດຍບໍ່ຄຳນຶງເຖິງລາຍຮັບ-ລາຍ ຈ່າຍຂອງພໍ່ແມ່, ບາງຄົນພໍ່ແມ່ ຕອບສະໜອງໃຫ້ບໍ່ໄດ້ກໍກາຍເປັນ ຄົນກ້າວລ້າວ, ອອກໂຮງ ຮຽນໄປ ກໍມີ. ຂະນະທີ່ພໍ່ແມ່ມີຄວາມຫວັງ- ຕັ້ງອົກຕັ້ງໃຈຢາກເຫັນລູກໄດ້ ຮຽນໜັງສື ແລະ ເປັນຄົນດີຄົນກ້າວໜ້າເຖິງທຸກ ຍາກລຳບາກ ປານໃດກໍຕາມ ພໍ່ແມ່ກໍຍອມອົດ ຍອມທົນ ບາງຄົນອາບເຫື່ອຕາງ ນ້ຳ, ອົດກິນ-ອົດຢູ່ອຶດຕາຫລັບຂັບຕານອນ ເພື່ອຢາກມີລາຍຮັບໄວ້ໃຫ້ລູກໄດ້ຮຽນໄວ້ໃຫ້ລູກໄດ້ໃຊ້ຈ່າຍ. ບາງຄົນຍອມເອົາຜືນດິນຍອມເອົາເຮືອນນອນໄປຊວດໄປ ຈຳ

ເພື່ອໄດ້ເງິນຄຳມາດາວລົດ ໃຫຍ່ໃຫ້ລູກໄດ້ຂີ່ ເພື່ອເອົາໜ້າ ເອົາຕາລູກ, ແຕ່ສິ່ງນີ້ກໍບໍ່ແມ່ນການສົ່ງເສີມທີ່ດີ ແລະ ອັນດີທີ່ສຸດ ນັ້ນ ແມ່ນຜູ້ເປັນພໍ່ແມ່ຄວນເບິ່ງ ແຍງລູກຢ່າງໃກ້ຊິດຕິດແທດ ເອົາ ໃຈໃສ່ການກວດກາຕິດຕາມຜົນການຮຽນຂອງລູກໃຫ້ເປັນ ປະຈຳ ເຊັ່ນ: ຕ້ອງຮູ້ກວດກາເບິ່ງວ່າລູກໄປໂຮງຮຽນແທ້ ຫລື ບໍ່, ການ ຮຽນເປັນແນວໃດ, ກວດກາເບິ່ງ ປຶ້ມສໍ ແລະ ບົດຮຽນ ຂອງລູກເປັນ ແນວໃດ. ພ້ອມນັ້ນ ກໍຕ້ອງຮູ້ວ່າໝູ່ຄູ່ຂອງລູກເປັນຄົນແນວໃດ ? ເພາະໝູ່ຄູ່ກໍແມ່ນອີກສິ່ງໜຶ່ງທີ່ຈະພາໃຫ້ລູກ ດີ ຫລື ບໍ່. ດັ່ງສຸພາສິດ ລາວເຮົາເວົ້າວ່າ: “ພົບຄົນດີມີສີ ແກ່ຕົວ ພົບຄົນຊົ່ວພາຕົວໝົ່ນ ໝອງ”. ຜູ້ເປັນລູກກໍຕ້ອງເປັນເຈົ້າການ ສຶກສາຮ່ຳຮຽນ ຮຽນແທ້ ຮຽນເພື່ອຫາຄວາມຮູ້ບໍ່ຄວນເຮັດໃຫ້ພໍ່ແມ່ໜັກອົກໜັກໃຈ.

    ສິ່ງທີ່ເວົ້າມານີ້ ເປັນພຽງຂໍ້ຄິດໜຶ່ງເຊິ່ງຫລາຍຄົນໄດ້ສົນທະນາກັນເລື່ອງນີ້ຢູ່ໃນສັງຄົມ, ຖ້າຫາກພວກເຮົາຊ່ວຍກັນສະກັດ ກັ້ນໃຫ້ ສິ່ງທີ່ບໍ່ດີງາມເກີດຂຶ້ນໄດ້ກໍຈະເຮັດໃຫ້ສັງຄົມສະຫງົບປອດໄພ, ຄອບຄົວກໍຈະມີແຕ່ສັນຕິສຸກ.