ກຽມເປີດບໍລິການວີຊາ ເຂົ້າປະເທດອັງກິດຢູ່ລາວ ໃນທ້າຍເດືອນກັນຍານີ້

            ທ່ານ ຟີລິບ ມາໂລນ ເອກອັກຄະຣາຊະທູດ ວິສາມັນຜູ້ມີອຳນາດເຕັມ ແຫ່ງປະເທດອັງກິດປະຈຳລາວ ໄດ້ຖະແຫລງ ຕໍ່ສື່ມວນຊົນກ່ຽວກັບການເປີດໜ່ວຍບໍລິ ການວີຊາ (Visa)ອັງກິດເຄື່ອນທີ່ຢູ່ ສປປ ລາວ ຊຶ່ງຈະເລີ່ມແຕ່ໃນວັນ ທີ 26 ກັນ ຍາ 2013 ນີ້ເປັນຕົ້ນໄປ, ຜູ້ທີ່ມີຄວາມຕ້ອງການຈະຍື່ນຄຳຮ້ອງ ຂໍວີຊາໄປປະເທດອັງກິດບໍ່ ຈຳເປັນຕ້ອງເດີນທາງໄປບາງກອກ ປະເທດໄທ ເພື່ອຍື່ນແບບຟອມສະໝັກຂໍວີຊາອີກ ຕໍ່ໄປຊຶ່ງໜ່ວຍບໍລິການ ດັ່ງກ່າວຈະເປີດບໍລິການທຸກໆ 3 ເດືອນ.

         ພິທີຖະແຫລງຂ່າວດັ່ງກ່າວ ໄດ້ຈັດຂຶ້ນໃນວັນທີ 6 ກັນຍາ 2013 ຢູ່ສະຖານ ເອກອັກຄະຣາຊະທູດ ອັງກິດ ປະຈຳລາວ, ທ່ານ ທູດ ກ່າວວ່າ: ສະຖານທູດອັງກິດ ປະຈຳລາວ ກໍຄື ລັດຖະບານອັງ ກິດ ໄດ້ໃຫ້ຄວາມສຳຄັນຕໍ່ການຮັດແໜ້ນສາຍພົວ ພັນລະຫວ່າງປະຊາຊົນສອງຊາດລາວ- ອັງກິດ ໂດຍມີຄວາມມຸ່ງມາດປາຖະໜາຢາກເຫັນປະຊາຊົນຈາກ ສປປ ລາວ ເດີນທາງ ໄປຢ້ຽມຢາມ, ເຮັດທຸລະກິດ, ລົງທຶນ ແລະ ສຶກສາຮ່ຳຮຽນຢູ່ປະເທດອັງກິດຫລາຍຂຶ້ນ. ສະນັ້ນ ຈິ່ງໄດ້ມີການປັບປຸງຂອດ

ການບໍລິການວີຊາໂດຍຈັດຕັ້ງໃຫ້ມີໜ່ວຍບໍລິການວີຊາອັງກິດເຄື່ອນທີ່ຢູ ສປປ ລາວ ເພາະໃນໄລຍະຜ່ານມາ, ບັນດາຜູ້ສະໝັກ ທີ່ມີຈຸດປະສົງຍື່ນຄຳຮ້ອງຂໍວີຊາອັງກິດຕ້ອງໄດ້ເດີນທາງໄປບາງກອກ ເພື່ອປະກອບຂໍ້ມູນໄບໂອເມຕຼິກ (ພິມລາຍນິ້ວມື ແລະ ຮູບຖ່າຍລະບົບດີຈິຕອນ). ແຕ່ປັດຈຸບັນສາມາດເຂົ້າຮັບການບໍລິການຈາກໜ່ວຍບໍລິການວີຊາແບບເຄື່ອນທີ່ດັ່ງກ່າວ ຢູ່ສະ ຖານເອກອັກຄະຣາຊະທູດອັງກິດປະຈຳ ສປປ ລາວ ຢູ່ນະຄອນຫລວງວຽງຈັນ ເມື່ອສຳເລັດຂັ້ນຕອນການສະໝັກຂໍວີຊາອັງ ກິດ. ຈາກນັ້ນ, ຄຳຮ້ອງຂໍວີຊາກໍຈະສົ່ງໄປບາງກອກ ເພື່ອໃຫ້ພະນັກງານຂອງສຳນັກງານວີຊາ ແລະ ຄົນ ເຂົ້າເມືອງຂອງປະ ເທດອັງກິດກວດສອບເມື່ອສຳເລັດສົມບູນແລ້ວກໍຈະສົ່ງກັບຄືນມາສະຖານທູດອັງກິດປະຈຳລາວ.

      ທູດອັງກິດຍັງ ໃຫ້ຮູ້ອີກ ວ່າ: ຜູ້ທີ່ຕ້ອງການໃຊ້ບໍລິການນີ້ ຈະຕ້ອງຈ່າຍຄ່າທຳນຽມ 75 ປອນ ຫລື ປະມານ 900.000 ກີບ ເພີ່ມຈາກຄ່າທຳນຽມຄຳຮ້ອງຂໍວີ ຊາ ຊຶ່ງຄ່າທຳນຽມດັ່ງກ່າວ ແມ່ນ ລວມທັງຄ່າໃຊ້ຈ່າຍສຳລັບການສົ່ງເອກະສານຄຳຮ້ອງ ໄປຍັງບາງກອກ ແລະ ເອົາກັບຄືນມາສະຖານທູດອັງກິດປະຈຳລາວເມື່ອການດຳເນີນການຕໍ່ຄຳຮ້ອງສຳເລັດ. ລວມຄ່າໃຊ້ຈ່າຍ ທັງໝົດປະມານ 1.860.000 ກີບ ຊຶ່ງຈະເປັນການປະຢັດຄ່າໃຊ້ຈ່າຍເມື່ອທຽບໃສ່ຄ່າໃຊ້ຈ່າຍທີ່ຈະຕ້ອງເດີນທາງໄປບາງ ກອກໂດຍຕົນເອງ.