ສ້າງແບບແຜນດຳລົງຊີວິດທີ່ປອດໃສຂາວສະອາດ ( ຄໍລຳ ແລກປ່ຽນຄຳເຫັນ )

ໂດຍ : ຄຳກອງ ທຳມະເທວາ

     ການສ້າງແບບແຜນດຳລົງຊີວິດທີ່ປອດໃສຂາວສະອາດໃນໝູ່ ພະນັກງານ, ສະມາຊິກພັກໄດ້ກາຍເປັນບັນຫາອັນ ຮີບດ່ວນ ໃນປັດຈຸບັນ ເພາະເບິ່ງຄືວ່າສິ່ງນີ້ໄດ້ ຄ່ອຍເຊື່ອມຖອຍ. ກໍດັ່ງເຮົາຮູ້ນຳ ກັນແລ້ວວ່າ: ແບບແຜນການດຳລົງຊີວິດອັນດີງາມຂອງ ພະນັກງານ, ສະມາຊິກພັກຍາມໃດກໍໄດ້ຮັບຄວາມເຊື່ອໝັ້ນຮັກແພງ, ເຄົາລົບນັບຖືຈາກມະຫາຊົນ ແລະ ກົງກັນຂ້າມ, ໃນການ ປະຕິບັດນະໂຍບາຍເສດຖະກິດຕະຫລາດຕາມທິດສັງຄົມນິຍົມຢູ່ປະເທດເຮົາ, ຄຽງຂ້າງດ້ານດີທີ່ເປັນພື້ນຖານ ແລ້ວ, ດ້ານກົງ ກັນຂ້າມມັນກໍໄດ້ກະທົບທີ່ບໍ່ດີຕໍ່ການຂະຫຍາຍຕົວ ດ້ານໂລກະທັດຂອງພະນັກງານ, ສະມາຊິກພັກເຮົາໜັກສົມຄວນກໍ່ໃຫ້ ເກີດມີແນວຄິດຢາກໄດ້ແຕ່ຜົນປະໂຫຍດ, ແລ່ນນຳແຕ່ລາຍຮັບ ແລະ ເພື່ອເງິນເກີນໄປແລ້ວກໍຈະເຮັດໃຫ້ຄຸນຄ່າຂອງຄຸນສົມ ບັດ, ສິນທຳປະຕິວັດ, ບໍ່ຮູ້ຈຳແນກອັນຜິດອັນຖືກ, ອັນດີອັນຮ້າຍ, ຖະແນມແຕ່ບັນລຸໄດ້ຜົນປະໂຫຍດສ່ວນຕົວຂອງຕົນແມ່ນ ເຮັດໂລດ. ນີ້ແມ່ນການດຳລົງຊີວິດທີ່ຍົກສູງຄຸນຄ່າດ້ານວັດຖຸເກີນໄປ, ຖືຜົນປະໂຫຍດສ່ວນຕົວສູງກວ່າສ່ວນລວມ, ຮູ້ແຕ່ຜົນ ປະໂຫຍດສະເພາະໜ້າ, ບໍ່ເອົາໃຈໃສ່ຜົນປະໂຫຍດໄລຍະຍາວ. ຈາກນີ້ ຈຶ່ງກໍ່ໃຫ້ເກີດມີປາກົດການຫຍໍ້ທໍ້ບໍ່ດີບໍ່ງາມຕາມມາ ຄືຖືເງິນ-ຄຳເປັນຈຸດສູງສຸດ, ໂລບມາກໂລພາ, ສໍ້ລາດບັງຫລວງ, ກິນສິນບົນ, ສວຍໃຊ້ສິດອຳນາດໃນທາງທີ່ບໍ່ຖືກຕ້ອງ, ໃຊ້ ຈ່າຍຟຸມເຟືອຍ, ຮຽນລົດນິຍົມທີ່ບໍ່ສຸພາບຂອງຝ່າຍຕາເວັນຕົກ, ຫລິ້ນກິນແບບ ຕ່ຳຊ້າ ແລະ ໄພສັງຄົມອື່ນໆ... ທັງໝົດສິ່ງ ເຫລົ່ານີ້ໄດ້ເຮັດໃຫ້ ເຊື່ອມຄຸນຄ່າຄຸນສົມບັດ, ຮີດຄອງປະເພນີອັນດີງາມເຮັດໃຫ້ປະຊາຊົນຂາດຄວາມເຊື່ອໝັ້ນຕໍ່ພະນັກງານ, ສະມາຊິກພັກ.

    ຈາກສະພາບການດັ່ງກ່າວນີ້ ພວກເຮົາຕ້ອງໄດ້ເອົາໃຈໃສ່ສຶກ ສາອົບຮົມ, ກໍ່ສ້າງ ແລະ ປັບປຸງແບບແຜນດຳລົງຊີວິດປະ ຕິວັດຢ່າງຕັ້ງໜ້າຄື 1. ສ້າງໃຫ້ໄດ້ແບບແຜນດຳລົງຊີວິດມີອຸດົມການສູງ ສົ່ງ. 2. ຮູ້ປະສົມປະສານຢ່າງກົມກຽວລະຫວ່າງ 3 ຜົນປະໂຫຍດຄືຂອງຊາດ, ລວມໝູ່ ແລະ ຜົນປະໂຫຍດສ່ວນບຸກຄົນ ໃນນີ້ຕ້ອງຖືຜົນປະໂຫຍດລວມເໜືອກວ່າຜົນປະ ໂຫຍດສ່ວນຕົວ, ຮູ້ປົກປັກ ຮັກສາຊັບສິນຂອງຊາດ, ປົກ ປ້ອງຜົນປະໂຫຍດຂອງລວມໝູ່ ແລະ ສັງຄົມ. 3. ສ້າງແບບແຜນ ດຳລົງຊີວິດຕິດແທດກັບມະຫາ ຊົນ, ດຳລົງຊີວິດປອດໃສຂາວສະ ອາດ, ດີງາມ, ກະທັດຮັດ, ສຸພາບ ຮຽບຮ້ອຍ, ຖະໜອມ ຖ່ອມຕົນ ດຸ ໝັ່ນຮ່ຳຮຽນ, ເຄົາລົບລະບຽບວິ ໄນ ແລະ ກົດໝາຍບ້ານເມືອງ. 4. ຕັ້ງໜ້າສ້າງຄອບຄົວໃຫ້ເປັນຄອບຄົວວັດທະ ນະທຳໃໝ່, ຮັກ ຫອມຕ່ອມຕຸ້ມ ແລະ ມີຄວາມສະ ເໝີພາບໃນການພົວພັນລະຫວ່າງ ຜົວເມຍ, ພໍ່ແມ່ ແລະ ລູກເຕົ້າ, ຍາດຕິພີ່ ນ້ອງເປັນຕົ້ນ. 5. ຕ້ານ ແບບແຜນດຳລົງຊີວິດທີ່ຫລ້າ ຫລັງ, ຄັບແຄບ, ໜັກໄປແຕ່ຜົນ ປະໂຫຍດສ່ວນຕົວ, ຂີ້ຄ້ານມັກງ່າຍ, ຂາດຄວາມປະດິດສ້າງ, ເຊື່ອມຄຸນເສຍທາດ ແລະ ອື່ນໆ. 6. ຕ້ອງເອົາໃຈໃສ່ເຝິກຝົນຕົນ ເອງໃຫ້ດີຂຶ້ນຢ່າງບໍ່ຢຸດຢັ້ງ.

    ທັງໝົດນັ້ນຄືບາງບັນຫາທີ່ນຳມາແລກປ່ຽນກັບບັນດາທ່ານ ເພື່ອເຮັດແນວໃດໃຫ້ສັງຄົມເຮົາມີ ແຕ່ຄວາມສະຫງົບ, ມີ ຄວາມເບີກບານມ່ວນຊື່ນພ້ອມກັນສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ.