ທົ່ວ​ປະ​ເທດ​ສຳ​ເລັດ​ການ​ສອບ​ເສັງເຂົ້າລັດຖະກອນພາກຄວາມຮູ້ທົ່ວໄປ

            ການສອບເສັງເຂົ້າເປັນລັດຖະກອນພາກຄວາມຮູ້ທົ່ວໄປທົ່ວປະເທດ ໄດ້ ຈັດຂຶ້ນ ໃນວັນທີ 14 ກັນຍານີ້, ສະ​ເພາະຢູ່ນະຄອນຫລວງວຽງຈັນ ​ມີທັງ​ໝົດ 9 ສູນ​ສອບ​ເສັງຄືສູນ​ສອບ​ເສັງລະດັບ​ຊັ້ນສູງ​ຂຶ້ນ​ໄປ​ປະກອບ​ມີມະຫາວິທະຍາ​ໄລ​ແຫ່ງ​ຊາດ, ມສ. ສາທິດ, ໂຮງຮຽນປະຖົມ​ສາທິດ, ມສ.ວຽງ​ຈັນ, ມສ. ມິດຕະພາບລາວ- ຫວຽດນາມ,ມສ.​ອານຸ,ມສ. ມິດຕະພາບວຽງ​ຈັນ-​ໂຮ່ຈີ​ມິນ, ມປ.ຈັນທະ​ບູລີ. ສ່ວນ ລະດັບ​ຊັ້ນຕົ້ນ​​ຢູ່ສູນສອບ​ເສັງ​ ມສ. ໜອງ​ບອນ, ມີ​ຜູ້​ເຂົ້າ​ຮ່ວມ​ສອບ​ເສັງທັງ​ໝົດ 12.424 ຄົນ​. ຂະນະ​ທີ່ຢູ່​ສູນ​ສອບ​ເສັງ​ບັນດາແຂວງໃນຂອບເຂດທົ່ວປະເທດມີ​ຜູ້​ເຂົ້າ​ສອບ​ເສັງ​ທັງ​ໝົດ 25.956 ຄົນ.

             ຕາມ​ການ​ລາຍ​ງານ​ຈາກ​ກະຊວງ​ພາຍ​ໃນໃຫ້​ຮູ້​ວ່າ: ເພື່ອເລືອກເຟັ້ນ ແລະ ບັນຈຸເຂົ້າເປັນລັດຖະກອນຕາມຫລັກການ ສະເໝີພາບ, ເປີດເຜີຍ, ພາວະວິໄສ ແລະ ເປັນທຳບົນພື້ນຖານຄວາມຮູ້ຄວາມສາມາດ ແລະ ມາດຕະຖານຂອງຕຳແໜ່ງງານ ນັ້ນ, ກະຊວງພາຍໃນໄດ້ເອົາໃຈໃສ່ຄົ້ນຄວ້າການຮັບບັນຈຸລັດຖະກອນໃໝ່ ແລະ ​ໄດ້​ເລີ່​ມ​ເປີດ​ໃຫ້​ລົງທະບຽນ​ເຂົ້ນສອບ​ເສັງ​ມາ​

ແຕ່​ວັນ​ທີ 1 ກໍລະກົດຫາ​ວັນ​ທີ 30 ສິງຫາ 2013  ​ແລະ ​ໄດ້​ດຳ​ເນີນ​ການ​ສອບ​ເສັງຄັ້ງທີ  I ພາກຄວາມຮູ້ທົ່ວໄປໃນ​ວັນ​ທີ 14 ກັນຍາ 2013. ພາຍຫລັງ​ສຳ​ເລັດ​ການ​ສອບເສັງຮອບທີ I ແລ້ວ,ຜູ້ໃດໄດ້ຄະແນນ 50% ຂຶ້ນໄປ ​​ຈະ​ໄດ້ເຂົ້າສອບເສັງ ຮອບທີ II ພາກວິຊາສະເພາະ ​ໃນ​ຕົ້ນ​ເດືອນ​ທັນວາ 2013 ​ນີ້. ສ່ວນຜູ້ທີ່ບໍ່ໄດ້ຕາມຄາດໝາຍໃຫ້ສືບຕໍ່ປັບປຸງຄວາມຮູ້ຂອງຕົນຕື່ມກຽມເຂົ້າສອບເສັງຮອບທີ I ໃນ ປີຕໍ່ໄປ.

            ​ສົກ​ປີ 2012-2013 ​ເປັນ​ປີ​ທຳ​ອິດ​ທີ່​ລັດຖະບານ​ໄດ້​ມີ​ການ​ສອບ​ເສັງ​ເອົາ​ລັດຖະກອນ​ເພື່ອ​ບັນຈຸ​ເຂົ້າ​ໃນ​ຕຳ​ແໜ່ງ​ງານ​ຕ່າງໆ​ຢູ່​ຕາມ​ສຳນັກງານ-ອົງການ​ອ້ອມ​ຂ້າງ​ສູນ​ກາງ ​ແລະ ທ້ອງ​ຖິ່ນ​ທົ່ວ​ປະ​ເທດ ​ໃນ​ໂກ​ຕາ​ລັດຖະກອນ​ໃໝ່​ສົກ​ປີ 2013-2014 ​ໂດຍ​ມອບ​ໃຫ້​ກະຊວງ​ພາຍ​ໃນສົມທົບ​ກັບ​ພະ​ແນ​ກພາຍ​ໃນ​ເປັນ​ຜູ້​ຈັດຕັ້ງປະຕິ ບັດຊຶ່ງ​​ຈະ​ໄດ້ສອບເສັງ 2 ຄັ້ງຄື ຄັ້ງທີ  I ແມ່ນການສອບເສັງ ພາກຄວາມຮູ້ທົ່ວໄປ ແລະຄັ້ງທີ II ແມ່ນການສອບເສັງພາກວິຊາສະເພາະໝາຍວ່າຜ່ານການສອບເສັງຄັ້ງທີ I ພາກຄວາມຮູ້ທົ່ວໄປ ແລ້ວ, ຜູ້ທີ່ໄດ້ຄະແນນ 50% ຂຶ້ນໄປຈຶ່ງຈະໄດ້ຮັບໃບຢັ້ງຢືນ ແລະ ມີສິດສອບເສັງຄັ້ງທີ II ຢູ່ຕາມບັນດາກະຊວງ, ອົງການ ແລະ ທ້ອງຖິ່ນ.