ໃນວັນທີ 21 ຕຸລານີ້, ເວລາ 14:15 ໂມງ
ຜູ້ນຳພັກ-ລັດ ແລະ ປະຊາຊົນລາວບັນດາເຜົ່າໃນທົ່ວປະເທດ ໄດ້ພ້ອມກັນຢືນກົມຫົວເປັນເວລາ
1 ນາທີ ເພື່ອໄວ້ອາໄລໃຫ້ແກ່ດວງວິນຍານຂອງຜູ້ເຄາະຮ້າຍຈາກໂສກນາດຕະກຳເຮືອບິນໂດຍ
ສານວຽງຈັນ-ປາກເຊ ATR72:600 ຖ້ຽວບິນ QV301 ຕົກລົງນ້ຳຂອງເຂດແຂວງຈຳປາສັກ ໃນວັນທີ
16 ຕຸລາຜ່ານມາ, ພາໃຫ້ຜູ້ໂດຍສານຈຳນວນ 44 ຄົນ ແລະ ຈຸບິນອີກ 5 ຄົນ ເສຍຊີວິດທັງໝົດ.
ເຫດການດັ່ງກ່າວແມ່ນການສູນເສຍທັງຊີວິດ ແລະ ຊັບສິນຄັ້ງຍິ່ງໃຫຍ່ເປັນປະຫວັດ ສາດຂອງລາວ
ແລະ ເພື່ອແບ່ງເບົາຄວາມໂສກເສົ້າສະຫລົດໃຈຂອງຍາດພີ່ນ້ອງຜູ້ເຄາະຮ້າຍຈາກເຫດການບໍ່ເພິ່ງປາຖະໜານີ້,
ລັດຖະບານຈຶ່ງແຈ້ງການໃຫ້ທຸກພາກສ່ວນອົງການຈັດຕັ້ງ ພັກ-ລັດໃນທົ່ວປະເທດ ຈັດພິທີໄວ້
ອາໄລພ້ອມກັນໃນເວລາ 14:15 ໂມງ ຂອງວັນທີ 21 ຕຸລານີ້, ໂດຍຢູ່ຫ້ອງວ່າການລັດຖະ
ບານ, ທ່ານນາຍົກລັດຖະມົນຕີ ທອງສິງ ທຳມະວົງ ພ້ອມຄະນະລັດຖະບານ ກໍໄດ້ຈັດພິທີໄວ້ອາໄລເຖິງດວງວິນຍານຂອງຜູ້ເສຍຊີວິດຈາກອຸປະຕິເຫດດັ່ງກ່າວເປັນເວລາ
1 ນາທີ. ຂະນະດຽວກັນ ຢູ່ສະໂມ ສອນ ຫລັກ 4 ເມືອງປາກເຊ ແຂວງຈຳ ປາສັກ ກໍຈັດພິທີໄວ້ອາໄລເຊັ່ນ
ດຽວກັນ ໂດຍມີທ່ານ ພົນໂທ ດວງໃຈ ພິຈິດ ຮອງນາ ຍົກລັດຖະມົນຕີ, ລັດ ຖະມົນຕີວ່າການກະຊວງປ້ອງກັນປະເທດ
ພ້ອມການນຳຂັ້ນສູງຂອງ ແຂວງດັ່ງກ່າວເຂົ້າຮ່ວມ ແລະ
ໃນໂອກາດດຽວກັນ ຢູ່ກະຊວງຖະແຫລງຂ່າວ,
ວັດທະນະທຳ ແລະ ທ່ອງທ່ຽວ ກໍໄດ້ຈັດພິທີໄວ້ອາໄລ ໂດຍມີທ່ານ ສາສະດາຈານ ດຣ.
ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ
ແລະ ຄະນະນຳກະຊວງດັ່ງກ່າວເຂົ້າຮ່ວມ.
ຂ່າວຍັງໃຫ້ຮູ້ອີກວ່າ: ໃນມື້ດຽວກັນ,
ເວລາ 14:15 ໂມງ ຢູ່ໂຮງໝໍແມ່ ແລະ ເດັກ ກໍຈັດພິທີໄວ້ອາໄລເຖິງດວງວິນຍານຂອງຜູ້ປະສົບເຄາະຮ້າຍຈາກເຮືອບິນຕົກຢູ່ແຂວງຈຳປາສັກ
ໂດຍມີທ່ານ ຮອງ ສາສະດາຈານ ດຣ. ບົວວັນ ແສນສະຖິດ ອຳນວຍການໂຮງໝໍ ແລະ ພະນັກງານແພດໝໍຂອງໂຮງໝໍດັ່ງກ່າວເຂົ້າຮ່ວມ
100 ກວ່າຄົນ ແລະ ຢູ່ບັນດາກະຊວງ, ອົງການທຽບເທົ່າ ແລະ ເຂດແຂວງທົ່ວປະເທດ
ຕ່າງກໍໄດ້ຈັດພິທີໄວ້ອາໄລເຊັ່ນດຽວກັນ ໂດຍຢູ່ແຕ່ລະແຫ່ງນັ້ນແມ່ນເຕັມໄປດ້ວຍບັນຍາກາດແຫ່ງຄວາມໂສກເສົ້າເສຍດາຍຕໍ່ເຫດການສູນເສຍຄັ້ງ
ຍິ່ງໃຫຍ່ທີ່ເກີດຂຶ້ນດັ່ງກ່າວ.
No comments:
Post a Comment