ທະນາຄານໂລກສະຫນອງທຶນ 20 ລ້ານໂດລາສະຫະລັດໃຫ້ແກ່ລາວ

           ທະນາຄານໂລກສະໜອງທຶນ 20 ລ້ານໂດລາສະຫະລັດໃຫ້ ແກ່ສ ປປ ລາວ ສຳລັບແຜນງານສະໜັບສະໜູນການ ຫລຸດຜ່ອນຄວາມທຸກຍາກໄລຍະ 9 ຫລື PovertyReductionSupport Operation(PRSO9) ເພື່ອຊ່ວຍເຫລືອ ວຽກງານປະຕິຮູບດ້ານນະໂຍບາຍ ແລະ ອົງກອນເພື່ອກໍໃຫ້ເກີດຄວາມຢືນຍົງໃນການຄຸ້ມຄອງລາຍຮັບທີ່ເພີ່ມຂຶ້ນຈາກຂະ ແໜງຊັບພະຍາກອນທຳມະຊາດ, ເຮັດໃຫ້ການບໍລິການພາກລັດຕ່າງໆໃນລາວ ໄດ້ຮັບການປັບປຸງໃຫ້ດີຂຶ້ນກ່າວເກົ່າ ແລະ ເພື່ອ ສະໜັບສະໜູນບັນດາບູລິມະສິດຂອງລັດຖະບານທີ່ໄດ້ກຳນົດໄວ້ໃນແຜນພັດທະນາເສດຖະກິດ- ສັງຄົມແຫ່ງຊາດຄັ້ງທີ 7.

          ພິທີເຊັນລົງນາມສັນຍາທຶນຊ່ວຍເຫລືອດັ່ງກ່າວໄດ້ມີຂຶ້ນທີ່ສຳນັກງານໃຫຍ່ກຸ່ມທະນາຄານໂລກທີ່ວໍຊິງຕັນ ດີຊີ ສະຫະ ລັດອາເມລິກາ ໃນລະຫວ່າງທີ່ບັນດາຄະນະຜູ້ແທນຈາກ ສປປ ລາວ ໄດ້ເດີນທາງເຂົ້າຮ່ວມກອງປະຊຸມປະຈຳປີ 2013 ຂອງ ກຸ່ມທະນາຄານໂລກ ແລະ ກອງທຶນການເງິນລະຫວ່າງປະເທດທີ່ສະຫະລັດອາເມລິກາ ເຊິ່ງຕາງໜ້າເຊັນລົງນາມສັນຍາຝ່າຍ ລັດຖະບານລາວຕາງໜ້າໂດຍທ່ານ ພູເພັດ ຄຳພູນວົງ ລັດຖະມົນຕີວ່າການກະຊວງການເງິນ ແລະ ຝ່າຍທະນາຄານໂລກຕາງໜ້າ ໂດຍ ທ່ານ ອູຣິກ ຊັກຄາວ ຜູ້ອຳນວຍການທະນາຄານໂລກປະຈຳພາກພື້ນອາຊີຕາເວັນອອກສ່ຽງໃຕ້ມີພາກສ່ວນທີ່ກ່ຽວຂ້ອງ ຂອງທັງສອງຝ່າຍເຂົ້າຮ່ວມເປັນສັກຂີພິຍານ.

      ໂອກາດດັ່ງກ່າວ, ທ່ານ ພູເພັດ ໄດ້ໃຫ້ຮູ້ວ່າ:ແຜນງານຂອງລັດຖະບານທີ່ໄດ້ຮັບການຊ່ວຍເຫລືອຈາກແຜນງານສະໜັບ ສະໜູນການຫລຸດຜ່ອນຄວາມທຸກຍາກ ຫລື PRSO ນີ້, ແມ່ນມີເປົ້າໝາຍແນໃສ່ຂົງເຂດນະໂຍບາຍຕ່າງໆທີ່ມີຄວາມສຳຄັນ ເປັນຢ່າງຍິ່ງໃນການພັດທະນາຂອງ ສປປ ລາວ ແຜນງານດັ່ງກ່າວຈະຊ່ວຍຊຸກຍູ້ໃຫ້ເສດຖະກິດມີການຈະເລີນເຕີບໂຕຂຶ້ນ ແລະ ຊ່ວຍຊຸກຍູ້ເຂົ້າໃນວຽກງານຫລຸດຜ່ອນຄວາມທຸກຍາກ, PRSO9 ແມ່ນແນໃສ່ເສີມສ້າງຄວາມເຂັ້ມແຂງດ້ານການປະສານ ງານ ແລະ ການຄຸ້ມຄອງນະໂຍບາຍເສດຖະກິດມະຫາພາກ ແລະ ດ້ານການຄຸ້ມຄອງງົບປະມານແບບຍືນຍົງໂດຍສະເພາະໃນ ຂະແໜງການໄຟຟ້ານ້ຳຕົກແລະບໍ່ແຮ່, ການສະໜັບສະໜູນຈາກແຜນງານ PRSO ນີ້ ແມ່ນໄດ້ຊ່ວຍໃຫ້ການຈັດຕັ້ງປະຕິບັດ ບັນດາກົດລະບຽບດ້ານການຄ້າແລະການລົງທຶນມີຄວາມໂປ່ງໃສຂຶ້ນ, ຊ່ວຍພັດທະນາຂອບວຽກສຳລັບກົດລະບຽບກ່ຽວກັບ ອາກອນຊັບພະຍາກອນທຳມະຊາດ ແລະ ບັນດາຂໍ້ກຳນົດຕ່າງໆໃຫ້ມີຄວາມໜັກແໜ້ນຂຶ້ນຊ່ວຍເສີມສ້າງຄວາມເຂັ້ມແຂງໃຫ້ ແກ່ການຄຸ້ມຄອງລາຍຮັບພາກລັດ ແລະ ຊ່ວຍປັບປຸງການວາງແຜນໃນຂະແໜງສຶກສາທິການ ແລະ ສາທາລະນະສຸກ.

      ທ່ານ ອູຣິກ ຊັກຄາວກ່າວວ່າ: ທະນາຄານໂລກມີຄວາມຍິນດີທີ່ຈະຊ່ວຍສະໜັບສະໜູນແຜນງານດັ່ງກ່າວຊຶ່ງພວກເຮົາ ຫວັງວ່າການຊ່ວຍເຫລືອຄັ້ງນີ້ຈະຊ່ວຍເພີ່ມພູນແຫ່ລງທຶນສຳລັບການສະໜອງການບໍລິການພາກລັດໃຫ້ມີປະສິດທິຜົນ ແລະ ປັບປຸງຊີວິດການເປັນຢູ່ຂອງປະຊາຊົນລາວໃຫ້ດີຂຶ້ນ.

             ແຜນງານສະໜັບສະໜູນການຫລຸດຜ່ອນຄວາມທຸກຍາກໄລຍະ 9 ນີ້, ຖືເປັນສ່ວນສຳຄັນຂອງຍຸດທະສາດຂອງ ການຮ່ວມມືພັດທະນາ ສປປ ລາວ ປະຈຳປີ 2012-2016 ຂອງກຸ່ມທະນາຄານໂລກທີ່ທາງສະພາບໍລິຫານໄດ້ຮັບຮອງເອົາໃນ ເດືອນມີນາ 2012 ຍຸດທະສາດຮ່ວມພັດທະນາປະເທດນີ້ ແມ່ນມີເປົ້າໝາຍແນໃສ່ເສີມສ້າງຄວາມອາດສາມາດໃນການແຂ່ງ ຂັນແລະການເຊື່ອມໂຍງ, ການຄຸ້ມຄອງທຳມະຊາດແບບຍືນຍົງ ແລະ ການພັດທະນາແບບທົ່ວເຖິງດ້ວຍການປັບປຸງການຄຸ້ມ ຄອງພາກລັດໃຫ້ເຂັ້ມແຂງ.