ນາຍົກລັດຖະມົນຕີ ລາວ-ໄທ ຮ່ວມໃສ່ບາດມິດຕະພາບບຸນອອກພັນສາ ພສ 2556 ຢູ່ຫນອງຄາຍ

    ໃນຕອນເຊົ້າວັນທີ 19 ຕຸລານີ້, ຢູ່ວັດໂພໄຊ ເທສະບານເມືອງ ແຂວງໜອງຄາຍ ຣາຊະອານາຈັກໄທ, ທ່ານນາຍົກລັດຖະມົນ ຕີແຫ່ງ ສປປ ລາວ ທອງສິງ ທຳມະວົງ ແລະ ທ່ານນາຍົກລັດຖະມົນຕີແຫ່ງຣາຊະອານາຈັກໄທ ນາງ ຍິ່ງລັກ ຊິນນະວັດ ໄດ້ ຮ່ວມໃສ່ບາດມິດຕະພາບໃນໂອກາດບຸນອອກພັນສາປາວໍລະນາ ພສ 2556 ໂດຍມີ ຊາວພຸດຈາກສອງປະເທດເຂົ້າຮ່ວມຢ່າງ ຫລວງຫລາຍ.

     ໃນໂອກາດດັ່ງກ່າວ, ນາຍົກທັງສອງປະເທດໄດ້ສັກກາລະບູຊາພະຫລວງພໍ່ໃສ ແລະ ຖວາຍ ຜ້າໄກ ແລະ ທຽນພັນສາໃຫ້ ແກ່່ຄະນະພະສົງທັງລາວ ແລະ ໄທ ແລະ ກ່າວຖວາຍຮັບສີນ 5  ຈາກ ນັ້ນຈຶ່ງໄດ້ ພ້ອມກັນໃສ່ບາດຈຳນວນ 3.099 ໜ່ວຍ. ພ້ອມທັງກ່າວເຖິງສາຍພົວພັນສະໜິດສະໜົມຂອງສອງປະເທດລາວ-ໄທ ທີ່ມີມາ​ແຕ່ດົນນານ​ແລ້ວນັ້ນນັບ​ມື້ຍິ່ງ​ໄດ້​ຮັບ​ການ​ເສີມ​ຂະຫຍາຍ.

     ທ່ານນາຍົກລັດຖະມົນຕີ ທອງສິງ ທຳມະວົງ ກ່າວໃນພິທີ ອັນສຳຄັນນີ້ວ່າ: ການຮ່ວມ​ກັນໃສ່ບາດເທື່ອນີ້ແມ່ນຄັ້ງປະຫວັດ ສາດລະຫວ່າງນາຍົກລັດຖະມົນຕີສອງປະ​ເທດ ແລະ ເປັນຂີດໝາຍອັນດີໃນການເສີມສ້າງສາຍພົວພັນ ແລະ ມິດຕະພາບລະ ຫວ່າງສອງປະເທດໃຫ້ໜັກແໜ້ນ ແລະ ແໜ້ນແຟ້ນຍິ່ງໆຂຶ້ນ.

ໃນວັນດຽວກັນ, ຢູ່ ສປປ ລາວ, ຊາວພຸດລາວໃນທົ່ວປະເທດກໍພ້ອມໃຈກັນໄປໃສ່ບາດໃນໂອກາດບຸນອອກພັນສາຢ່າງ ເປັນຂ ະບວນຟົດຟື້ນ, ວັດຫລາຍແຫ່ງເປັນຕົ້ນ: ວັດທາດຫລວງ, ວັດສີເມືອງ, ວັດອົງຕື້, ວັດຊຽງຍືນ, ວັດໂພນສະອາດ ແລະ ວັດແຫ່ງ ອື່ນໆຢູ່ນະຄອນຫລວງວຽງຈັນ ແມ່ນມີຜູ້ຄົນເຂົ້າໄປໃສ່ບາດຖວາຍເຄື່ອງສັງຄະທານຕ່າງໆເປັນຈຳນວນຫລວງຫລາຍ. ພ້ອມກັບ ການຮັບຟັງທຳມະເທດສະໜາຕ່າງໆເພື່ອອຸທິດສ່ວນບຸນກຸສົນໃຫ້ກັບຍາດພີ່ນ້ອງໄດ້ລ່ວງລັບໄປແລ້ວ.

      ສ່ວນໃນຕອນຄ່ຳກໍມີການວຽນທຽນ ແລະ ໄຫລເຮືອໄຟຕາມປະເພນີ ​ແລະ ວັດທະນະທຳທີ່ເຄີຍໄດ້ປະຕິບັດມາໃນແຕ່ ລະປີ.