ເກີດອຸປະຕິເຫດຍົນໂດຍສານວຽງຈັນ-ປາກເຊ ຕົກລົງນ້ຳຂອງເຂດ ແຂວງຈຳປາສັກ

         ອີງຕາມການລາຍງານໃຫ້ຮູ້ຂອງເຈົ້າໜ້າທີ່ລັດວິສາຫະກິດການບິນລາວ ແຂວງຈຳປາສັກໃນຕອນແລງວັນທີ 16 ຕຸລາ ນີ້ວ່າ: ເວລາປະມານ 16:30 ໂມງ, ຍົນໂດຍສານວຽງຈັນ-ປາກເຊ ຮຸ່ນ ATR 72: 600 ຖ້ຽວບິນ 301 QV ຂອງລັດວິສາ ຫະກິດການບິນລາວໄດ້ເກີດອຸປະຕິເຫດຕົກລົງນ້ຳຂອງລະຫວ່າງ​ດອນ​ເຂາະເມືອງປາກເຊ ​ແລະ ບ້ານພະລິງ ເມືອງ​ໂພນ​ທອງ ແຂວງຈຳປາສັກໃນຂະນະ ຍົນພວມຫລຸດລະດັບລົງສູ່ສະໜາມບິນປາກ ເຊໂດຍຍົນລຳດັ່ງກ່າວໄດ້ບິນຂຶ້ນຈາກສະ ໜາມບິນວຽງຈັນໃນເວລາ 14:44 ໂມງເຊິ່ງມີຜູ້ໂດຍສານຄົນລາວ ແລະ ຕ່າງປະເທດ ລວມທັງຜູ້ຂັບຍົນ ທັງໝົດ 44 ຄົນ, ພາຍຫລັງເກີດ ເຫດດັ່ງກ່າວ, ທາງອຳນາດການ ປົກຄອງ ແລະ ເຈົ້າໜ້າທີ່ກ່ຽວຂ້ອງພາຍໃນແຂວງຈຳປາສັກ ໄດ້ຮີບຮ້ອນເຂົ້າໃຫ້ການ ຊ່ວຍເຫລືອກູ້ໄພຢ່າງຮີບດ່ວນ, ແຕ່ການຊ່ວຍເຫລືອແມ່ນດຳເນີນໄປດ້ວຍຄວາມຫຍຸ້ງຍາກຫລາຍ ເນື່ອງຈາກພາຍຫລັງຍົນ ຕົກລົງ ນ້ຳຂອງແລ້ວກໍຈົມລົງນ້ຳທັນທີ ພ້ອມທັງມີກະແສນ້ຳໄຫລແຮງ ແລະ ມີລົມ ແລະ ຝົນຕົກແຮງນຳອີກ ແລະ ໃນເວ ລາຕໍ່ມາ ໜ່ວຍງານກູ້ໄພຈຶ່ງໄດ້ພົບສົບຜູ້ເສຍຊີວິດຄົນທຳອິດເປັນຍິງຊາວຕ່າງປະເທດ.

    ຕາມການສອບຖາມປະຊາຊົນທ່ານໜຶ່ງທີ່ເຫັນເຫດການໄດ້ເລົ່າສູ່ນັກຂ່າວພວກເຮົາຟັງວ່າ: ໃນຂະນະທີ່ຍົນພວມຫລຸດລະ ດັບລົງສູ່​ສະໜາມ​ບິນ​ປາ​ກ​ເຊ​ນັ້ນກໍເກີດມີລົມພັດ ແລະ ຝົນຕົກໜັກ, ຈາກນັ້ນ ກໍໄດ້ຍີນສຽງຍົນລຳດັ່ງກ່າວຕົກລົງສູ່ນ້ຳຢ່າງ ແຮງ.

        ແຕ່ແນວໃດກໍຕາມ, ສ່ວນສາເຫດຂອງການເກີດອຸປະຕິເຫດຄັ້ງນີ້ ຍັງຢູ່ໃນຂັ້ນຕອນການສອບສວນ-ສຶບສວນຂອງເຈົ້າ ໜ້າທີ່ກ່ຽວຂ້ອງໃນຂັ້ນຕໍ່ໄປ.