ເພື່ອເປັນການຈັດຕັ້ງປະຕິບັດແຜນພັດທະນາພະລັງງານໄຟຟ້າຂອງ
ສປປ ລາວ ເຮັດໃຫ້ປະຊາຊົນລາວບັນດາເຜົ່າໄດ້ຊົມໃຊ້ໄຟຟ້າ 90% ໃນຂອບເຂດທົ່ວປະເທດໃນປີ
2020 ໃຫ້ປາກົດຜົນເປັນຈິງ. ດັ່ງນັ້ນ ໃນວັນທີ 28 ທັນວາ, ຢູ່ແຂວງບໍ່ແກ້ວ ໄດ້ມີພິທີວາງສີລາເລິກກໍ່ສ້າງໂຄງການເຂື່ອນໄຟຟ້ານ້ຳຕົກນ້ຳທາ
1 ຂຶ້ນ ໂດຍການເຂົ້າຮ່ວມຂອງທ່ານ ສົມສະຫວາດ ເລັ່ງສະ ຫວັດ ຮອງນາຍົກ ລັດຖະມົນຕີ,
ຜູ້ຊີ້ນຳວຽກງານເສດຖະກິດ, ທ່ານເຈົ້າແຂວງຫລວງນ້ຳທາ, ແຂວງບໍ່ແກ້ວ, ທ່ານເອກອັກຄະລັດຖະ ທູດຈີນປະຈຳລາວ,
ບັນດາຜູ້ຕາງໜ້າຈາກກະຊວງກ່ຽວຂ້ອງເຂົ້າຮ່ວມ.
ໂຄງການດັ່ງກ່າວໄດ້ມີການເຊັນບົດບັນທຶກຄວາມເຂົ້າໃຈມາແຕ່ເດືອນສິງຫາ
2006 ເຊິ່ງຕັ້ງຢູ່ເຂດເມືອງຜາອຸດົມ ແຂວງບໍ່ແກ້ວ ແລະ ເມືອງນາແລ ແຂວງຫລວງນ້ຳທາ
ໂດຍມີເປົ້າໝາຍ ເພື່ອແນໃສ່ເປັນແຫລ່ງຜະລິດພະລັງງານໄຟຟ້າທີ່ຊົມໃຊ້ພາຍໃນ
ປະເທດກໍຄືຂອງບັນດາແຂວງພາກເໜືອຂອງລາວສົ່ງເຂົ້າໃນຕາຂ່າຍໄຟຟ້າຂອງລັດວິສາຫະກິດໄຟຟ້າລາວ
ອັນເປັນການສ້າງເງື່ອນໄຂດ້ານພະລັງງານ ເພື່ອຮອງຮັບໃຫ້ແກ່ການລົງທຶນດ້ານອຸດສາຫະກຳ,
ກະສິ ກຳ ແລະ ການບໍລິການ ກໍຄືການພັດທະນາເສດຖະກິດ-ສັງຄົມໂດຍລວມຢູ່ບັນດາແຂວງພາກເໜືອໃຫ້ມີການຂະຫຍາຍຕົວຢ່າງໜັກແໜ້ນ
ແລະ ສາມາດເຊື່ອມໂຍງກັບການພັດທະນາຢູ່ພາກພື້ນ, ເວົ້າສະເພາະກໍແມ່ນການປະກອບ
ສ່ວນເຂົ້າໃນການແກ້ໄຂຄວາມ ທຸກຍາກຂອງປະຊາຊົນບັນດາເຜົ່າຂອງສອງເມືອງທຸກຍາກທີ່ຢູ່ໃນເຂດໂຄງການດັ່ງກ່າວ
ແລະ ຍົກລະດັບຊີວິດການເປັນຢູ່ຂອງເຂົາເຈົ້າໃຫ້ນັບມື້ນັບດີຂຶ້ນເປັນກ້າວໆ.
ໂຄງການເຂື່ອນໄຟຟ້ານ້ຳຕົກນ້ຳທາ 1 ມີກຳລັງຕິດຕັ້ງ ທັງໝົດ 168 ເມກາວັດ, ສາມາດຜະລິດພະລັງງານສະເລ່ຍໄດ້
759 ກິກະວັດໂມງຕໍ່ປີ ລວມມູນຄ່າການກໍ່ສ້າງ 471 ລ້ານໂດລາສະ ຫະລັດ ເຊິ່ງຈະເລີ່ມຜະລິດໄຟຟ້າຂາຍໄດ້ໃນທ້າຍປີ
2017 ເປັນຮູບແບບກໍ່ສ້າງດຳເນີນງານ ແລະ ມອບໂອນຄືນໃຫ້ລັດຖະບານລາວ (BOT)
ໃນໄລຍະສຳປະທານ 28 ປີ ໂດຍແມ່ນລັດວິສາຫະກິດໄຟ ຟ້າລາວຖືຮຸ້ນ 20% ແລະ ບໍລິສັດຕາຂ່າຍໄຟຟ້າພາກໃຕ້ຈີນ
CSGI (China Southern Grid International) ຖືຮຸ້ນ 80%.
ໂອກາດນີ້, ຮອງນາຍົກລັດ ຖະມົນຕີ ສົມສະຫວາດ
ເລັ່ງສະ ຫວັດ ໄດ້ກ່າວວ່າ: ໂຄງການນີ້ ຖ້າເບິ່ງປະສິດທິຜົນທາງດ້ານເສດຖະກິດແມ່ນບໍ່ຫລາຍ,
ແຕ່ມັນມີຄວາມໝາຍທາງດ້ານການເມືອງອັນເລິກເຊິ່ງ, ພວກເຮົາຮູ້ແລ້ວວ່າ:
ເມືອງນາແລກໍເປັນເມືອງວິລະຊົນ ແລະ ເມືອງຜາອຸດົມກໍເປັນເມືອງຖານທີ່ໝັ້ນ
ປະ ຕິວັດໃນສະໄໝຕໍ່ສູ້ກູ້ຊາດ, ຖ້າປະ ຊາຊົນສອງເມືອງບໍ່ໃຫ້ການສະ ໜັບສະໜູນ
ການປົດປ່ອຍພາກເໜືອຂອງລາວກໍຈະມີຄວາມຫຍຸ້ງຍາກຫລາຍ. ດັ່ງນັ້ນ ລັດຖະ ບານລາວ
ຈຶ່ງໄດ້ຮຽກຮ້ອງເຖິງນັກລົງທຶນຕ່າງປະເທດໃຫ້ມາກໍ່ ສ້າງເຂື່ອນແຫ່ງນີ້ ເຊິ່ງກໍມີຫລາຍບໍລິສັດໄດ້ມາສຳຫລວດສຶກສາ,
ແຕ່ກໍບໍ່ສາ ມາດເຮັດໄດ້ ຍ້ອນປະ ສິດທິຜົນດ້ານເສດຖະກິດໜ້ອຍ, ແຕ່ເຫັນໄດ້ຄວາມໝາຍດ້ານການເມືອງດັ່ງກ່າວ,
ບໍລິສັດ CSGI ກໍຕັດສິນໃຈກໍ່ສ້າງເຂື່ອນແຫ່ງນີ້ ອັນເປັນການປະຕິບັດຄຳຊີ້ນຳຂອງການນຳພັກກອມມູນິດຈີນໃນການຮັດແໜ້ນມິດຕະພາບ
ແລະ ການຮ່ວມມືຮອບດ້ານໃນຖານະການເປັນຄູ່ຮ່ວມຍຸດທະສາດຮອບດ້ານ ລະຫວ່າງ ຈີນກັບລາວ
ອັນເປັນການຢັ້ງຢືນວ່າ: ພັກ ແລະ ລັດຖະບານຈີນ ກໍໃຫ້ ການສະໜັບສະໜູນ ພັກ ແລະ
ລັດ ຖະບານລາວ. ພ້ອມນີ້ ທ່ານຍັງໄດ້ສະແດງຄວາມຮູ້ບຸນຄຸນ ແລະ ຂອບໃຈ ພັກ, ລັດຖະບານ
ແລະ ປະຊາຊົນຈີນ ກໍຄືບໍລິສັດ CSGI ທີ່ໄດ້ຕັດສິນໃຈມາກໍ່ສ້າງໂຄງການດັ່ງກ່າວ
ແລະ ສະແດງຄວາມຫວັງວ່າ: ໂຄງການເຂື່ອນໄຟຟ້າແຫ່ງນີ້ຈະສຳເລັດຜົນຕາມກຳນົດເວລາດ້ວຍຄຸນນະພາບທີ່ຮັບປະກັນ
ແລະ ຈະພ້ອມກັນຕິດຕາມຊຸກຍູ້ໂຄງການນີ້ໃຫ້ປະສົບຜົນສຳເລັດຢ່າງແທ້ຈິງ.
No comments:
Post a Comment