ອັງເຊີນພະບາງຂຶ້ນປະດິດສະຖານຢູ່ຫໍພະບາງຫລັງໃຫມ່

      ພິທີອັງເຊີນພະບາງຂຶ້ນປະດິດສະຖານຢູ່ຫໍພະບາງຫລັງໃໝ່ ໄດ້ຈັດຂຶ້ນໃນຕອນ ເຊົ້າຂອງວັນທີ 14 ທັນວາຜ່ານມານີ້, ໂດຍ ຫໍພະບາງຫລັງໃໝ່ນີ້ຕັ້ງຢູ່ບໍລິເວນຫໍພິພິທະ ພັນແຫ່ງຊາດຫລວງພະບາງ ເມືອງ ແລະ ແຂວງຫລວງພະບາງ ໂດຍທ່ານ ຈູມມາລີ ໄຊ ຍະສອນ ປະທານປະເທດ ແຫ່ງ ສປປ ລາວ, ທ່ານ ສົມສະຫວາດ ເລັ່ງສະຫວັດ ຮອງ ນາຍົກລັດຖະມົນຕີ, ປະທານຈັດພິທີອັງເຊີນພະບາງຂຶ້ນປະດິດສະຖານທີ່ຫໍພະບາງ ຫລັງໃໝ່່, ທ່ານ ອາຊາງ ລາວ​ລີ ຮອງນາຍົກລັດ ຖະມົນຕີ, ຜູ້​ຊີ້ນຳ​ວຽກ​ງານ​ວັດທະ ນະທຳ​-ສັງຄົມ, ບັນດາກົມການເມືອງສູນກາງພັກ, ລັດຖະມົນຕີກະຊວງ ຖະແຫລງ ຂ່າວ- ວັດທະນະທຳ ແລະ ທ່ອງ ທ່ຽວ, ເຈົ້າຄອງນະຄອນຫລວງວຽງ ຈັນ, ບັນດາເຈົ້າແຂວງ, ຮອງ ເຈົ້າແຂວງຕະຫລອດບັນດາ ມວນຊົນຫລວງພະບາງ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຮ່ວມ​ເປັນ​ຈຳນວນ​ຫລາຍ.

            ພິທີອັງເຊີນດັ່ງກ່າວໄດ້ດຳ ເນີນເປັນເວລາ 3 ມື້ 3 ຄືນ ຄືແຕ່ວັນທີ 14-16 ທັນວາ2013 ໂດຍມີພິທີແຫ່ພະບາງ

ອ້ອມເມືອງຕາມເສັ້ນທາງກາງເມືອງທີ່ໄດ້ກຳນົດໄວ້, ເລີ່ມແຕ່ໜ້າວັດທາດນ້ອຍ-ຫໍພະບາງ 11 ຂະບວນ, ກອງຜ້າປ່າສາມັກຄີ. ຂະນະທີ່ພິທີທາງສາສະໜານັ້ນ, ພະສົງ 25 ອົງ ໄດ້ສູດພຸດທະມົນ, ເທດສະຫລອງຫໍພະບາງ. ນອກນີ້ກໍໄດ້ຄົບງັນຕາມປະເພ ນີທັງໄດ້ສະແດງຟ້ອນພະລັກພະລາມ, ຟ້ອນນາງແກ້ວ, ຂັບທຸ້ມ, ອ່ານໜັງສື,ຂັບສະຫລາງສາມສ່າວເພື່ອອະນຸລັກປົກປັກຮັກ ສາພະບາງທີ່ເປັນພະພຸດທະຮູບຄູ່ບ້ານຄູ່ເມືອງຂອງຊາວລາວທົ່ວປະເທດທັງເປັນມໍລະດົກອັນລ້ຳຄ່າທາງວັດທະນະທຳຂອງຊາດທີ່ມີຊື່ສຽງຂອງແຂວງຫລວງພະບາງໃຫ້ ຍືນຍົງຄົງຢູ່ກັບບ້ານເມືອງໄປຊົ່ວກາລະນານ.

            ​ໂອກາດ​ດັ່ງກ່າວ, ທ່ານ ສົມ ສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ປະທານຈັດພິທີອັງເຊີນພະບາງ ​ໄດ້​ກ່າວ ວ່າ:ພວກເຮົາເອກອ້າງທະນົງໃຈເປັນຢ່າງຍິ່ງທີ່​ໄດ້​ຈັດພິທີຂຶ້ນໃນມື້ນີ້ເຊິ່ງເປັນເຫດການໜຶ່ງທີ່ສຳຄັນໃນຂະບວນການລວມ ຂອງທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວ ທີ່ພວມອອກແຮງແຂ່ງຂັນຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ ແລະ ແຜນພັດທະນາເສດຖະກິດສັງຄົມ 5 ປີຄັ້ງທີ 7 ໃນເຄິ່ງສະ​ໄໝ​ທີສອງທັງສ້າງຜົນງານຂ່ຳນັບຮັບຕ້ອນ 2 ວັນ ປະຫວັດສາດຂອງພັກ ແລະ ຂອງຊາດຄືວັນສ້າງຕັ້ງພັກປະຊາຊົນປະຕິວັດລາວຄົບຮອບ 60 ປີ ແລະ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ. ຂໍສະແດງຄວາມເຄົາລົບນັບຖືຢ່າງສູງຕໍ່ທ່ານ ຈູມມາລີ ໄຊ ຍະສອນ ປະທານປະເທດພ້ອມດ້ວຍພັນລະຍາທີ່ໄດ້ໃຫ້ກຽດເປັນປະທານພິທີອັນເປັນສິລິມຸງຄຸນນີ້. ສິ່ງນີ້ເປັນການຢືນຢັນ ເຖິງນະໂຍບາຍອັນຖືກຕ້ອງຂອງພັກ ແລະ ລັດເຮົາຕໍ່ການປົກປັກຮັກສາ ແລະ ເສີມຂະຫຍາຍມູນເຊື້ອວັດທະນະທຳ ແລະ ຮີດ ຄອງປະເພນີອັນດີງາມຂອງຊາດລາວເຮົາ. ທັງນີ້ ເມື່ອສະຕະວັດທີ 14, ພະເຈົ້າຟ້າງຸ່ມມະຫາລາດໄດ້ເຕົ້າໂຮມເອົາບັນດາຫົວ ເມືອງນ້ອຍທີ່ກະແຈກກະຈາຍມາໂຮມເຂົ້າກັນເປັນອານາຈັກລາວລ້ານຊ້າງອັນກວ້າງໃຫຍ່ໄພສານທີ່ເປັນເອກະພາບກາຍເປັນ ລັດສັກດີນາລວມສູນລັດທຳອິດຂອງຊາດລາວ. ເພື່ອປັບປຸງແນວຄິດຈິດໃຈຂອງປວງຊົນລາວບັນດາເຜົ່າໃຫ້ເປັນປຶກແຜ່ນອັນ ດຽວ, ພະເຈົ້າຟ້າງຸ່ມມະຫາລາດໄດ້ນຳເອົາພະພຸດທະສາສະໜານິກາຍຫິນະຍານເຂົ້າມາອານາຈັກລາວລ້ານຊ້າງ ໂດຍຜ່ານປະ ເທດຂະ​ແ​ມ​ ( ປັດຈຸບັນແມ່ນປະເທດກຳປູເຈຍ) ໂດຍໄດ້ຊົງຂໍເອົາພະພຸດທະຮູບຄຳອົງສັກສິດຄືອົງພະບາງຈາກກະສັດ ຂອງກຳ ປູເຈຍມາພ້ອມ. ຈາກນັ້ນ, ອົງພະບາງຈຶ່ງກາຍເປັນປູສະນີວັດຖຸລ້ຳຄ່າມະຫາສານ, ເປັນພະມິ່ງບ້ານຂວັນເມືອງປະດິດສະຖານ ຢູ່ຄູ່ກັບຊາດລາວມາເປັນເວລາ 600 ກວ່າປີ. ຕາມຕຳນານກ່າວໄວ້ວ່າ: ອົງພະບາງໄດ້ຫລໍ່ຢູ່ສີລັງກາທະວີບ   (ປະເທດສີລັງກາ ໃນປັດຈຸບັນ) ເຊິ່ງຕາມປະເພນີສະໄໝນັ້ນ, ຄຳ ແມ່ນວັດຖຸປະເສີດເປັນສິຣິມຸງຄຸນຕໍ່ບ້ານເມືອງ, ເປັນວັດຖຸປະດັບເອ້ ແລະ ເໝາະສົມຕໍ່ຜູ້ມີຄຸນງາມຄວາມດີຕໍ່ສັງຄົມ ແລະ ປະເທດຊາດ. ພະບາງເປັນພະພຸດທະຮູບຢືນ, ພະຫັດມືທັງສອງເບື້ອງຍົກ ໄວ້ ພຽງພະອຸລາເອິກປິດພະຫັດທັງສອງ ໄປກ້ຳໜ້າ ເຊິ່ງສະແດງອອກເຖິງກິລິຍາຫ້າມບໍ່ໃຫ້ວິວາດຜິດຖຽງກັນ. ພະບາງເປັນອົງທີ່ມີລິດເດດສັກສິດເຂັດຢຳມະຫັດສະຈັນ ແລະ ທີ່ສຳຄັນຍິ່ງເປັນພະພຸດທະຮູບຄູ່ປາລະມີຂອງພະມະຫາກະສັດ

ລາວມາແຕ່ສະໄໝລາວລ້ານຊ້າງ ແລະ ເປັນທີ່ເຄົາລົບບູຊາ ກາບໄຫວ້ຂອງພຸດທະສາສະນິກະຊົນມາໄດ້ຫລາຍພັນປີແລ້ວ ເຊິ່ງ ຫລາຍຮ້ອຍປີຜ່ານມາ, ພະບາງເຄີຍປະດິດສະຖານຢູ່ຫລາຍບ່ອນເຊັ່ນ:ເມືອງວຽງຄຳແຂວງວຽງຈັນ, ວັດມະໂນລົມ, ວັດວິ ຊຸນ, ວັດໃຫຍ່ເມືອງຫລວງພະບາງ. ດັ່ງນັ້ນ, ຈຶ່ງໄດ້ຮຽກຮ້ອງ ອົງການຈັດຕັ້ງພັກ-ລັດທຸກຂັ້ນ ແລະ ປະຊາຊົນທຸກເຜົ່າທຸກຊັ້ນ ຄົນຢູ່ຫລວງພະບາງ ແລະ ໃນທົ່ວປະເທດຈົ່ງເຊີດຊູຄວາມຮັບຜິດຊອບຮ່ວມກັນປົກປັກຮັກສາອົງພະບາງ ແລະ ຫໍພະບາງ ແຫ່ງນີ້ໃຫ້ຄົງຢູ່ກັບຊາດລາວເຮົາຕະຫລອດໄປ.

              ໂອກາດນີ້, ທ່ານ ຈູມມາລີ ໄຊ ຍະສອນ ໄດ້ຂຶ້ນກ່າວອາລາດທະນາອັງເຊີນອົງພະບາງຂຶ້ນປະດິດສະຖານຢູ່ຫໍພະ ບາງຫລັງໃໝ່.