ກະຊວງອຸດສາຫະກຳ ແລະ ການຄ້າ ໄດ້ຊີ້ແຈງກ່ຽວກັບການປ່ອຍໃຫ້ມີການນຳເຂົ້າລົດເປັນຈຳນວນຫລາຍໃນໄລຍະຜ່ານມາ,
ພາຍຫລັງສັງຄົມໃຫ້ຄວາມສົນໃຈວ່າ: ບັນຫາດັ່ງກ່າວພາໃຫ້ເກີດສະພາບລົດຕິດແອອັດໃນຕົວເມືອງ.
ກະຊວງດັ່ງກ່າວ ໃຫ້ຮູ້ວ່າ: ປັດຈຸບັນ
ບັນຫາທີ່ພົ້ນເດັ່ນພວມໄດ້ຮັບຄວາມສົນໃຈຈາກສັງຄົມແມ່ນການນຳເຂົ້າ ແລະ ຈຳໜ່າຍລົດຂອງບັນດາບໍລິສັດຕ່າງໆໃນທົ່ວປະເທດ
ເຊິ່ງໃນນັ້ນລວມມີທັງການນຳເຂົ້າລົດທີ່ຖືກຕ້ອງ ແລະ ບໍ່ຖືກຕ້ອງຕາມລະບຽບກົດໝາຍ,
ການຫລັ່ງໄຫລເຂົ້າມາຢ່າງຫລວງຫລາຍຂອງຍານພາຫະນະໄດ້ສົ່ງຜົນກະທົບຕໍ່ການເຄື່ອນໄຫວ
ແລະ ດຳລົງຊີວິດຂອງປະຊາຊົນໃນຕົວເມືອງຫລາຍພໍສົມຄວນ ເປັນຕົ້ນສະ ພາບການສັນຈອນທີ່ບໍ່ຄ່ອງຕົວ
(ລົດຕິດ), ສຽງເນືອງນັນ, ອຸປະຕິເຫດ
ແລະ ອື່ນໆ ທັງໝົດນີ້ບໍ່ພຽງແຕ່ແມ່ນເກີດຈາກສາເຫດຂອງການປ່ອຍໃຫ້ມີການນຳເຂົ້າ
ຫລາຍເກີນໄປ ດັ່ງທີ່ສັງຄົມເຂົ້າໃຈ, ແຕ່ມັນພົວພັນເຖິງການກວດ ກາ, ການຈັດຕັ້ງປະຕິບັດກົດລະ
ບຽບການຈະລາຈອນບໍ່ທົ່ວເຖິງ, ການຈັດສັນເສັ້ນທາງສຳລັບການສັນຈອນໄປ-ມາທີ່ບໍ່ເປັນລະບົບ
ລວມເຖິງການຄຸ້ມຄອງການນຳເຂົ້າພາຫະນະທີ່ບໍ່ປະຕິບັດຕາມລະບຽບການທີ່ມີຢູ່.
ການນຳເຂົ້າ ລົດມີລັກສະນະເພີ່ມຂຶ້ນທຸກປີ ຈາກ 1,1 ລ້ານກວ່າຄັນ ໃນປີ 2011
ເພີ່ມຂຶ້ນ 12% ໃນສົກປີ 2012 ແລະ 5% (6 ເດືອນຕົ້ນປີ 2013 ຈຳ ນວນລົດທີ່ຂຶ້ນທະບຽນທັງໝົດມີ
1,3 ລ້ານກວ່າຄັນ), ໃນນັ້ນ 79% ແມ່ນລົດຈັກ. ສາເຫດຕົ້ນຕໍທີ່ພາໃຫ້ມີການນຳເຂົ້າທີ່ເພີ່ມຂຶ້ນທຸກປີ
ແມ່ນມາຈາກການຂະຫຍາຍຕົວດ້ານເສດຖະກິດ, ຄວາມຕ້ອງການລົດເພື່ອຮັບໃຊ້ໃນການຂົນສົ່ງສິນຄ້າ,
ການຜະ ລິດ ແລະ ການຄ້າຂາຍຍ່ອຍແບບເຄື່ອນທີ່ເພີ່ມຂຶ້ນ ອັນທີ່ເຫັນໄດ້ຊັດເຈນແມ່ນລົດບັນທຸກ
1-2,5 ໂຕນ ທີ່ເລາະ ຫລື ຈອດຂາຍສິນຄ້າຕາມແຄມທາງ ແລະ ຢູ່ຕາມຊົນ ນະບົດ. ນອກຈາກນັ້ນ
ປະຊາຊົນທີ່ມີລາຍຮັບເພີ່ມຂຶ້ນກໍຢາກຊົມໃຊ້ລົດເຂົ້າໃນວຽກງານປະຈຳວັນ, ສ້າງຄວາມສະດວກສະບາຍໃຫ້ແກ່ຕົນເອງ
ແລະ ຄອບຄົວ.
ກະຊວງດັ່ງກ່າວ ໃຫ້ຮູ້ວ່າ: ການຄຸ້ມຄອງການນຳເຂົ້າພາ
ຫະນະແມ່ນພົວພັນເຖິງຫລາຍກະຊວງກ່ຽວຂ້ອງ, ແຕ່ການຈັດ ຕັ້ງປະຕິບັດຜ່ານມາເຫັນວ່າບາງຂະແໜງການຍັງບໍ່ທັນເອົາໃຈໃສ່ໃນການຈັດຕັ້ງປະຕິບັດລະບຽບການຄຸ້ມຄອງການນຳເຂົ້າຢ່າງເຂັ້ມງວດ,
ຍັງມີປາກົດການໃນການອະນຸມັດໃຫ້ບັນດາບໍລິສັດ, ບຸກຄົນ ຫລື ນິຕິບຸກຄົນທີ່ບໍ່ມີມາດ
ຖານເງື່ອນໄຂຄົບຖ້ວນໃນການນຳເຂົ້າ ແລະ ຈຳໜ່າຍ, ມີການອອກໃບຢັ້ງຢືນເຕັກນິກທີ່ບໍ່ຖືກ
ຕ້ອງກັບສະພາບລົດຕົວຈິງເຊັ່ນ: ການຫ້າມລົດທີ່ມີຄວາມແຮງເກີນ 250 ຊີຊີ,
ແຕ່ໃນຕົວຈິງຍັງເຫັນແລ່ນຕາມທ້ອງຖະໜົນ ແລະ ການແຈ້ງເສຍພາສີຕ່ຳກວ່າລາ ຄາຕົວຈິງ.
ຕົວຢ່າງລົດກະບະລາ ຄາໂຮງງານ 15 ພັນໂດລາສະ ຫະລັດ ແຕ່ແຈ້ງເສຍພາສີພຽງ ແຕ່ 7.200 ໂດລາສະຫະລັດ.
ພາຍຫລັງ ສປປ ລາວ ໄດ້ຖືກຮັບຮອງເຂົ້າເປັນສະມາຊິກອົງການການຄ້າໂລກການຫ້າມນຳເຂົ້າແມ່ນບໍ່ສາມາດຫ້າມໄດ້,
ແຕ່ຖ້າຕ້ອງການຫລຸດຜ່ອນການນຳເຂົ້າລົດສາມາດສ້າງມາດຕະ ການອື່ນໄດ້ເຊັ່ນ: ແຕ່ລະຂະແໜງ ການເປັນເຈົ້າການ
ປະຕິ ບັດລະບຽບການທີ່ວາງອອກຢ່າງເຂັ້ມງວດເຊັ່ນ: ການຄຸ້ມຄອງການນຳເຂົ້າ, ການກວດກາສະພາບເຕັກນິກ,
ການເກັບພາສີ-ອາກອນ, ການຈຳໜ່າຍ ແລະ ອື່ນໆ; ເຫັນຄວນນຳໃຊ້ລາຄາພາຫະນະຕົວຈິງໃນການແຈ້ງເສຍພາສີ-ອາກອນເວລານຳເຂົ້າ
ເພື່ອເຮັດໃຫ້ ການ ເກັບລາຍຮັບເຂົ້າງົບປະ ມານ ໄດ້ຮັບປະສິດທິຜົນສູງກວ່າ ເກົ່າ ແລະ ຈະເຮັດໃຫ້ຫລຸດຜ່ອນ
ການນຳເຂົ້າ ລົດ; ການປັບປຸງ ລະບົບຂົນສົ່ງໃຫ້ແກ່ສາທາລະນະ ຫລາຍຂຶ້ນເຊັ່ນ: ລົດເມ ແລະ ລະ
ດົມໃຫ້ນັກລົງທຶນ ພາຍໃນ ແລະ ຕ່າງປະເທດມາລົງທຶນໃສ່ບໍລິ ການຂົນສົ່ງມວນຊົນຢ່າງກວ້າງ ຂວາງ
ແລະ ທົ່ວເຖິງ; ປັບປຸງ ລະ ບົບການສັນຈອນ ແລະ ລະບົບ ການຈອດລົດ, ປັດຈຸບັນຂະແໜງ ໂຍທາທິການ
ແລະ ຂົນສົ່ງ ແລະ ຕຳຫລວດຈະລາຈອນພວມທົດ ລອງຢ່າງເຂັ້ມ ງວດຕໍ່ບັນຫານີ້ ເພື່ອຫລຸດຜ່ອນຄວາມແອອັດ
ຕາມທ້ອງຖະໜົນ; ສືບຕໍ່ປະຕິບັດ ຂໍ້ຕົກລົງຂອງນາຍົກລັດຖະມົນຕີສະບັບ ເລກທີ 78/ນຍ ວ່າດ້ວຍ
ການຢຸດຕິການນຳເຂົ້າລົດມືສອງ ແລະ ການຢຸດຕິໃຫ້ນະໂຍບາຍ ຫລຸດຜ່ອນພາສີ-ອາກອນສຳລັບ ການນຳເຂົ້າລົດ
Hybrid, ລົດທີ່ແລ່ນດ້ວຍອາຍແກັສ NGV, LPG ແລະ ນ້ຳມັນເຊື້ອໄຟ.
No comments:
Post a Comment