ພາກທຸລະກິດເລັ່ງປັບປຸງຄຸນນະພາບເພື່ອກຽມ​ເຂົ້າສູ່ AEC.

      ຫົວໜ່ວຍທຸລະກິດຂະໜາດກາງ ແລະ ໃຫຍ່ໃນລາວກຳລັງເລັ່ງປັບ ປຸງຄຸນ ນະພາບຂອງຕົນເອງ ເພື່ອ ກຽມຄວາມພ້ອມເຂົ້າສູ່ຕະຫຼາດ AEC ແລະ ສາກົນ ຊຶ່ງບັນດານັກທຸລະກິດຕ່າງກໍວາງກົນລະຍຸດ ແລະ ຍຸດທະສາດການບໍລິຫານທຸລະ ກິດຂອງຕົນໃຫ້ມີຄວາມພ້ອມຮອບດ້ານນັບທັງຫົວ ໜ່ວຍທຸລະກິດຂະໜາດໃຫຍ່ ດັ່ງ ບໍລິສັດເບຍລາວ, ບໍ່ຄຳເຊໂປນ ແລະ ອື່ນໆ ແລະ ພ້ອມນັ້ນກໍສະເໜີໃຫ້ພາ ກລັດເບິ່ງຄືນກົດໝາຍການຄ້າ ແລະ ນິຕິກຳອື່ນໆວ່າເໝາະສົມແລ້ວບໍເພື່ອໃຫ້ທຸລ ະກິດຂອງລາວເສຍປຽບ.

          ໃນງານວາງສະແດງສິນຄ້າຜະລິດຕະພັນລາວຄັ້ງທີ 3 ຜ່ານມາ ນີ້, ບັນດານັກທຸລະກິດຂອງລາວ ໄດ້ຮ່ວມ ກັນເປີດ ການສົນທະນາແລກປ່ຽນຄວາມຄິດເຫັນທາງການຄ້າ ແລະ ປະສົບການຕ່າງໆຂອງການດຳເນີນທຸລະກິດ ເພື່ອຈະເປັນບົດຮຽນ

ແລະ ປັບປຸງຕົນເອງ ເພື່ອສາມາດກ້າວເຂົ້າສູ່ປະຊາຄົມເສດຖະກິດອາຊຽນ ໃນປີ 2015 ນີ້ ໄດ້ສະດວກ, ທ່ານ ກິດສະໜາ ວົງໄຊ ຜູ້ອຳນວຍການໃຫຍ່ບໍລິສັດເບຍລາວ ຍົກໃຫ້ເຫັນວ່າ: ເຫຼືອເວລາອີກ ບໍ່ທໍ່ໃດປີ ກໍຈະມີການຮວມຕົວຂອງປະຊາ ຄົມເສດຖະກິດອາຊຽນ  ແລະ ເວລານັ້ນມັນຈະເປັນໂອກາດໃຫ້ພວກ ເຮົາ ເປີດກ້ວາງການຕະຫຼາດ ແລະ ການດຳເນີນທຸລະ ກິດ, ດັ່ງນັ້ນຖ້າຫາກພວກເຮົາບໍ່ມີການກຽມຄວາມພ້ອມ ກໍຈະເຮັດໃຫ້ການເຂົ້າສູ່ຕະຫຼາດດັ່ງກ່າວພົບຄວາມຫຍຸ້ງຍາກ, ດັງນັ້ນ ສຳລັບບໍລິສັດເບຍລາວ ກໍໄດ້ວາງແຜນລົງ ທຶນເຂົ້າໃສ່ການດຳເນີນທຸລະກິດຂອງຕົນອີກ 130 ລ້ານໂດລາ ເພື່ອຍົກສູງຄຸນນະ ພາບການຜະລິດ ແບະ ເພີ່ມສະມັດຕະພາບການສົ່ງອອກໃຫ້ຫຼາຍຂຶ້ນ.

           ທ່ານ ສີໜຸກ ສີສົມບັດ ປະທານສະມາຄົມກາເຟລາວ ເຈົ້າຂອງກາໝາຍສິນຄ້າກາເຟສີໜຸກລະ ບຸວ່າ: ປະຈຸບັນທາງສະມາຄົມກາເຟລາວ ມີຄວາມພະຍາຍາມປຸກລະດົມຜູ້ຜະລິດກາເຟໃຫ້ມີການພັດທະນາຕົນເອງກໍຄື ການສ້າງກາໝາຍສິນຄ້າຫຍີ່ຫໍ້ກາເຟລາວດ້ວຍຄຸນນະພາບ ເພື່ອສົ່ງອອກສູ່ຕະຫຼາດສາກົນ, ຊຶ່ງໂອກາດ ຂອງການຮ່ວມເປັນປະຊາຄົມເສດຖະກິດອາຊຽນນີ້ ແມ່ນຕະເຮັດໃຫ້ການສົ່ງອອກກາເຟລາວໄດ້ສູງຂຶ້ນ, ແຕ່ສິ່ງທີ່ຕ້ອງປັບປຸງຕົນເອງເພື່ອສາມາດແຂ່ງຂັນກັບເຂົາເຈົ້ານັ້ນແມ່ນຕ້ອງໄດ້ເນັ້ນດ້ານຄຸນນະພາບ ໃຫ້ເປັນທີ່ ຍອມຮັບ ແລະ ການຫຸ້ມຫໍ່ເພື່ອໃຫ້ເຫັນວ່າສິນຄ້າລາວ ແລະ ກາໝາຍສິນຄ້າເປັນທີ່ຍອມຮັບຂອງສາກົນ ເພື່ອຄວາມໄດ້ປຽບໃນການແຂ່ງຂັນໄດ້ກັບປະເທດອື່ນໆໄດ້.

           ແນວໃດກໍ ດີ ທ່ານ ດາວວອນ ພະຈັນທະວົງ ຮອງປະທານສະພາອຸດສາຫະກຳ ແລະ ການຄ້າ ແຫ່ງຊາດ ລາວ ກໍໃຫ້ທັດສະນະວ່າ: ປະຈຸບັນສະພາບເສດຖະກິດຂອງລາວມີການເຕີບໃຫຍ່, ຫົວໜ່ວຍທຸກລະກິດ ຂອງ ລາວຕ່າງໄດ້ຮັບການສ້າງຕັ້ງຂື້ນຫຼາຍຂະແໜງ ແລະ ສ້າງເປັນສະມາຄົມ ທີ່ພົ້ນເດັ່ນແມ່ນປະເພດຫັດຖະກຳ, ເຟີນີເຈີ, ກາເຟ ແລະ ອື່ນໆ ຊຶ່ງນັບວ່າມີຄຸນນະພາບສູງເມື່ອທຽບກັບສາກົນ, ແຕ່ການເຂົ້າຮ່ວມປະຊາຄົມເສດຖະກິດ ອາຊຽນໃນປີ 2015 ນີ້, ພາກອຸດສາຫະກຳຂອງລາວຕ້ອງປັບປຸງຫຼາຍດ້ານເປັນຕົ້ນແມ່ນການຍົກລະດັບຄຸນ ນະພາບການຜະລິດໃຫ້ສູງຂຶ້ນ, ພ້ອມດຽວກັນຂະແໜງມະຫາພາກກໍຄວນເບິ່ງຄືນກົດໝາຍການຄ້າ ແລະ ນິຕິກຳຕ່າງໆເພື່ອໃຫ້ທຸລະກິດຂອງລາວປຽບດ້ານການຄ້າກັບປະເທດອື່ນໆ.