ເປີດໂຄງການເຊື່ອມໂຍງສາກົນດ້ານການຄ້າຢູ່ລາວ

          ໂຄງການເຊື່ອມໂຍງສາກົນດ້ານການຄ້າ (the Enhanced Integrated Framework Project or EIF) ທີ່ມີສໍານັກງານຢູ່ເຈີນນີວາ ປະເທດສະວິດ, ໄດ້ສະໜັບສະໜູນທຶນຈໍານວນ 2,5 ລ້ານກວ່າໂດລາສະຫະລັດ ເພື່ອຈັດຕັ້ງປະ ຕິບັດໂຄງການດັ່ງກ່າວບ້ວງທີ 2 ກ່ຽວກັບການເສີມສ້າງຄວາມເຂັ້ມແຂງ ໃຫ້ແກ່ໂຄງ ລ່າງພື້ນຖານ ດ້ານຄຸນນະພາບແຫ່ງຊາດ ແລະ ສະຖິຕິອຸດສາຫະກໍາແກ່ ສປປ ລາວ ຊຶ່ງຈະຕັ້ງປະຕິບັດແຕ່ປີ 2014-2016 ຂະນະທີ່ລັດຖະບານກໍໄດ້ປະກອບສ່ວນເຂົ້າ ໃນໂຄງການດັ່ງກ່າວປະມານ 871.200 ໂດລາສະຫະລັດ ແລະ ເປີດໂຄງການຢ່າງເປັນທາງການໃນວັນທີ 21 ມັງກອນນີ້ ໂດຍການເຂົ້າຮ່ວມຂອງທ່ານນາງ ເຂັມມະນີ ພົນເສນາ ລັດຖະມົນຕີຊ່ວຍວ່າການກະຊວງອຸດສາຫະກໍາ ແລະ ການຄ້າ, ທ່ານ ນາງ ຮາງ ທຣານ ຜູ້ປະສານງານໂຄງການ ເຊື່ອມໂຍງສາກົນດ້ານການຄ້າທີ່ສໍານັກງານຢູ່ເຈີນນີວາປະເທດສະວິດພ້ອມບັນດາ ເຈົ້າໜ້າທີ່ກ່ຽວຂ້ອງຈຳນວນໜຶ່ງ.   

         ທ່ານ ສີລິສໍາພັນ ວໍລະຈິດ ຫົວໜ້າກົມແຜນ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ ກ່າວວ່າ:ໂຄງ ການ EIF ບ້ວງທີ 2 ແມ່ນບາດກ້າວໜຶ່ງໃນການເສີມສ້າງສະພາບແວດລ້ອມທາງທຸລະກິດໂດຍສຸມໃສ່ 2 ອົງປະກອບຫລັກ ຄື: ເພື່ອແກ້ໄຂບັນຫາການເຂົ້າເຖິງຕະຫລາດສໍາລັບພາກທຸລະກິດໂດຍຜ່ານການຊ່ວຍເຫລືອໃນ ການເຂົ້າເຖິງການບໍລິ ການເພື່ອຢັ້ງຢືນຄຸນນະພາບ ແລະ ການບໍລິການດ້ານກວດສອບ ແລະ ແນ່ໃສ່ການສົ່ງ ເສີມຄວາມເຂັ້ມແຂງ ໃຫ້ແກ່ກົມອຸດ ສາຫະກໍາ ແລະ ຫັດຖະກໍາໃນການສ້າງສະຖິຕິອຸດສາຫະກໍາເພື່ອຮັບໃຊ້ໃນການ ຄົ້ນຄວ້າບັນດານະໂຍບາຍພັດທະ ນາຂະແໜງການອຸດສາຫະກໍາ. ທ່ານກ່າວຕື່ມວ່າ:ແຕ່ອະດີດຮອດປັດ ຈຸບັນການໃຊ້ບໍລິການນີ້ ໄດ້ເຮັດຢູ່ຕ່າງປະເທດໂດຍ ສະເພາະປະເທດໄທ ແລະ ຫວຽດນາມ ຂະນະດຽວກັນ ນັກທຸລະກິດລາວພົບວ່າການໃຊ້ບໍລິການດ້ານນີ້ ແມ່ນແພງຫລາຍ, ໃຊ້ເວລາດົນ ແລະ ມີຫລາຍຂັ້ນຕອນ ຊຶ່ງ ໄດ້ເຮັດໃຫ້ນັກທຸລະກິດພົບຄວາມຍຸ້ງຍາກ ແລະ ຈໍາກັດການເຂົ້າເຖິງບັນດາຕະ ຫລາດໃໝ່ໆ ແລະ ການເຂົ້າຮ່ວມ ການສະໜອງຂໍ້ມູນລະບົບຕ່ອງໂສ້ໃນພາກພື້ນ ແລະ ໂລກຢ່າງຕໍ່ເນື່ອງສະນັ້ນເຊື່ອວ່າໂຄງ ການນີ້ ຈະສ້າງຄວາມ ເຂັ້ມແຂງໃຫ້ແກ່ລະບົບກວດສອບ ແລະ ອອກໃບຢັ້ງຢືນຄຸນນະພາບ ຢູ່ພາຍໃນປະເທດຢ່າງມີປະ ສິດທິຜົນສູງ ແລະ ພວມມີຄວາມຕ້ອງການສູງເຊັ່ນດຽວກັນ.

         ທຶນຊ່ວຍເຫລືອນີ້ແມ່ນໜ່ວຍງານຈັດຕັ້ງປະຕິບັດໂຄງການລະດັບຊາດ(National Implementation Unit or NIU), ກົມແຜນການ ແລະ ການຮ່ວມມືພາຍໃນກະຊວງອຸດສາຫະກໍາ ແລະ ການຄ້າເປັນຜູ້ບໍລິການ ແລະ ຄຸ້ມຄອງ; ສ່ວນການປະຕິບັດບັນດາກິດຈະກໍາ ຫລື ການຈັດຕັ້ງປະຕິບັດໂດຍບັນດາກົມວິຊາການທີ່ກ່ຽວ ຂ້ອງລວມມີ: ກົມອຸດສາຫະກໍາ ແລະ ຫັດຖະກໍາ ຂອງກະຊວງອຸດສາຫະກໍາ ແລະ ການຄ້າ, ກົມມາດຕະຖານ ແລະ ວັດແທກກະຊວງວິທະຍາສາດ ແລະ ເຕັກໂນໂລຊີ.