laophatthananewspaper: ສະຫລອງການປົກປັກຮັກສາມູນມໍລະດົກທາງດ້ານວັດທະນະທຳ

ພິທີສະເຫລີມສະຫລອງແຫ່ໜັງສືໃບລານຄົບຮອບ 10 ປີ ໄດ້ຈັດຂຶ້ນໃນວັນທີ 10 ມັງກອນນີ້, ຢູ່ບ້ານນາຊອນນະຄອນຫລວງ ວຽງຈັນໂດຍມີ ພຣະອາຈານ ວັນນາ ສຸຣິຍະວົງ ປະທານ ອົງ ການພຸດທະສາສະໜາ ນະຄອນ ຫລວງວຽງຈັນ, ມີ ທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າ ການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ມີບັນດາພະສົງສາມະເນນ, ຊາວບ້ານ, ແນວໂຮມ, ອົງການຈັດຕັ້ງຕ່າງໆພາຍໃນບ້ານນາຊອນ ແລະ ບ້ານອ້ອມຂ້າງ ເຂົ້າຮ່ວມ.

ທ່ານ ນາງ ຂັນທະມາລີ ຍັງນຸວົງ ອຳນວຍການຫໍສະໝຸດແຫ່ງຊາດ ກ່າວວ່າ: ວຽກງານປົກປັກຮັກສາໜັງສືໃບລານ ໄດ້ເລີ່ມຕົ້ນໃນການສຳຫລວດແຕ່ປີ 1992 ເປັນຕົ້ນມາ, ໂດຍໄດ້ຮັບທຶນສະໜັບສະໜູນຈາກລັດຖະ ບານເຢຍລະມັນໃນການຟື້ນຟູປົກປັກຮັກສາໜັງສືໃບລານກໍຄືການສືບສານໃນການປົກປັກຮັກສາມູນມໍລະດົກທາງດ້ານພູມປັນຍາຂອງບັນພະບຸລຸດລາວເຮົາທີ່ໄດ້ປະດິດຄິດແຕ່ງ, ຄົງຕົວໃນຮູບແບບການຈາລຶກເປັນລາຍລັກອັກສອນທີ່ຖ່າຍທອດຈາກຄູອາ ຈານມາເຖິງຮຸ່ນສືບທອດໃນປັດ ຈຸບັນ, ພ້ອມທັງເສີມຂະຫຍາຍ, ປົກປັກຮັກສາ, ບົວລະບັດຂັດສີດ້ວຍວິທີວິທະຍາທີ່ທັນສະໄໝແບບວິທະຍາສາດທັງປະສົມ

ປະ ສານແບບວິທີບູຮານທີ່ເຄີຍປະ ຕິບັດສືບທອດກັນມາເປັນເວລາຫລາຍສັດຕະວັດ. ໃຫ້ໄດ້ທັງປະ ລິມານ ແລະ ຄຸນນະພາບໃຫ້ມີການເຜີຍແຜ່ຢ່າງກ້ວາງຂວາງໃນວົງສາຄະນາຍາດຄົນລາວ. ໜັງສືໃບລານເປັນໜັງສືສັກສິດທີ່ປະຊາຊົນລາວມີຄວາມເຄົາລົບຢຳເກງຕະຫລອດມາຍັງໄດ້ຖືກນຳມາໃຊ້ໃນການດຳລົງຊີວິດຂອງປວງຊົນຊາວລາວເຮົາໃນທາງພຸດທະສາສະໜາ ແລະ ອື່ນໆ.

ໃນໂອກາດດັ່ງກ່າວທ່ານ ບົວເງິນ ຊາພູວົງ ລັດຖະມົນຕີຊ່ວຍ ວ່າການກະຊວງຖະແຫລ່ງຂ່າວ,ວັດທະນາທຳ ແລະ ທ່ອງທ່ຽວງ ໄດ້ໃຫ້ຮູ້ວ່າ:ໜັງສືໃບລານເປັນມູນມໍລະດົກທາງດ້ານປັນຍາຂອງບັນພະບຸລຸດລາວໂດຍມີ ພະ ອາຈານ ແລະ ຊາວບ້ານໄດ້ອະ ນຸລັກຮັກສາໄວ້ໃຫ້ລູກຫລານ, ນັກຄົ້ນຄວ້າ, ນັກສຶກສາ, ປັນຍາຊົນ ແລະ ຜູ້ສົນໃຈໃນການຄົ້ນ ຄວ້າຮ່ຳຮຽນທັງຫລາຍໄດ້ຊົມໃຊ້ຢ່າງກວ້າງຂວາງທັງພາຍໃນ ແລະ ຕ່າງປະເທດ. ເພື່ອເຮັດໃຫ້ວຽກງານປົກປັກຮັກສາໜັງສືໃບລານຂອງລາວໃຫ້ມີຄວາມຍືນຍົງຈົນເຖິງປະຈຸບັນ, ເຮັດໃຫ້ມີຊື່ສຽງໃນພາກພື້ນ ແລະ ສາກົນ, ທັງເປັນທີ່ຍອມຮັບຂອງສາກົນວ່າລາວມີມໍລະດົກທາງດ້ານວັດ ທະນະທຳຢ່າງຫລວງຫລາຍ. ເພື່ອເປັນການສືບທອດການເຜີຍແຜ່ວິທີປົກປັກຮັກສາ, ການສືບຕໍ່ການຈານໃບລານໃຫ້ຄົນຮຸ່ນຕໍ່ໆໄປ ແລະ ສິ່ງສຳຄັນຢ່າງຍິ່ງແມ່ນ ການບໍລິການໃຫ້ມີການນຳໃຊ້ໜັງສືໃບລານໃຫ້ກ້ວາງຂວາງໃນທົ່ວສັງຄົມ.