ວັນທີ 27 ມັງກອນນີ້, ທ່ານ ຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ພ້ອມພັນລະຍາ ແລະ ຄະນະໄດ້ໄປຢ້ຽມຢາມ ແລະ ພົບປະໂອ້ລົມພະນັກງານຫລັກແຫລ່ງເມືອງສັງທອງ ນະຄອນຫລວງວຽງຈັນ.
ທ່ານ ບຸນທ່ຽງ ຂຸນສີ ເລຂາພັກເມືອງ, ເຈົ້າເມືອງສັງທອງ
ໄດ້ລາຍງານສະພາບການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມໃນຊຸມປີຜ່ານມາ
ແລະ ທິດທາງແຜນການສົກປີ 2013-2014 ແລະ ວຽກງານ 3 ສ້າງຢູ່ເມືອງຕົນວ່າ: ເມືອງສັງທອງຍັງມີຄວາມຫຍຸ້ງຍາກ
ແລະ ສິ່ງທ້າທາຍຫລາຍຢ່າງເຊັ່ນ: ພື້ນ ຖານໂຄງລ່າງ ເສັ້ນທາງຄົມມະ ນາຄົມຍັງບໍ່ທັນຮັບປະກັນໄດ້ສອງລະດູ,
ໂຮງຮຽນຍັງບໍ່ທັນຕອບສະໜອງໄດ້ກັບຄວາມຮຽກຮ້ອງຕ້ອງການ ເພາະວ່າໃນແຕ່ລະປີນັກຮຽນໄດ້ມີໂຕເລກເພີ່ມຂຶ້ນເລື້ອຍໆ,
ສຸກສາລາ ແລະ ຖົງຢາປະຈຳບ້ານກໍຍັງບໍ່ທັນຕອບສະໜອງໄດ້ກັບຄວາມຮຽກຮ້ອງຕ້ອງການຂອງພໍ່ແມ່ປະຊາຊົນ.
ສ່ວນວຽກງານ 3 ສ້າງ, ເມືອງສັງທອງແມ່ນໜຶ່ງໃນ
51 ເມືອງທົ່ວປະເທດເປັນເມືອງເຮັດທົດລອງ 3 ສ້າງ ພາຍຫລັງໄດ້
ຈັດຕັ້ງເຊື່ອມຊຶມມະຕິ
03/ກມສພ ແລະ ຄຳສັ່ງເລກທີ 16/ນຍ ຢູ່ຂັ້ນເມືອງແລ້ວ ໃນກາງເດືອນມີນາ 2012 ໄດ້ຫັນເອົາພະນັກງານ 7 ຫ້ອງການລົງໄປເຄື່ອນໄຫວຢູ່ບ້ານທົດລອງຂອງເມືອງ ເຊິ່ງແມ່ນບ້ານໃຫຍ່ນາຈະເລີນ ແລະ ຜ່ານການຈັດ ຕັ້ງປະຕິບັດເຫັນວ່າມີຫລາຍຂົງເຂດວຽກງານແມ່ນມີບາດກ້າວຂະຫຍາຍຕົວດີຂຶ້ນ, ຄວາມຕື່ນຕົວຂອງປະຊາຊົນຢູ່ບ້ານທົດລອງກໍດີ ຖ້າທຽບໃສ່ເມື່ອກ່ອນ.
ໂອກາດດັ່ງກ່າວ, ປະທານປະເທດ ຈູມມາລີ ໄຊຍະສອນ
ໄດ້ໃຫ້ກຽດໂອ້ລົມໂດຍເນັ້ນໃຫ້ເມືອງສັງທອງສືບຕໍ່ເອົາໃຈໃສ່ ການພັດທະນາບ້ານ
ໂດຍການເຕົ້າໂຮມບ້ານນ້ອຍເປັນບ້ານໃຫຍ່ສຸມໃສ່ຜະລິດກະສິກຳເປັນສິນຄ້າເພື່ອໃຫ້ປະຊາຊົນມີວຽກເຮັດງານທຳ,
ມີລາຍຮັບເພື່ອແກ້ໄຂຄວາມທຸກຍາກຂອງເຂົາເຈົ້າ, ສືບຕໍ່ປັບປຸງອຳນາດການປົກຄອງຂັ້ນເມືອງໃຫ້ມີຄວາມໜັກແໜ້ນເຂັ້ມແຂງ,
ພະນັກງານຂັ້ນເມືອງຕ້ອງລົງໄປຊ່ວຍວຽກຢູ່ຂັ້ນບ້ານ, ບຳລຸງກໍ່ສ້າງພະນັກງານກັບທີ່ຂັ້ນບ້ານພ້ອມທັງປັບປຸງ
ແບ່ງຄວາມຮັບຜິດຊອບໃຫ້ຈະແຈ້ງລະຫວ່າງເລຂາພັກບ້ານ ແລະ ນາຍບ້ານ, ສ້າງພະນັກງານວິຊາການເປັນຕົ້ນພະນັກ
ງານກະສິກຳ ເພື່ອໃຫ້ເປັນຜູ້ພາເຮັດພາສ້າງ ໂດຍສະເພາະເອົາໃຈໃສ່ສ້າງຄອບຄົວຕົວແບບປູກຝັງ-ລ້ຽງສັດ,
ສ້າງກຸ່ມການຜະລິດ ເພື່ອຍູ້ການຜະລິດເປັນສິນຄ້າ ໂດຍອີງໃສ່ທ່າແຮງບົ່ມຊ້ອນ
ເພື່ອໃຫ້ມີຫລາຍໂຄງການເກີດຂຶ້ນ ທັງຮັກສາໄດ້ມູນເຊື້ອເມືອງວິລະຊົນຕະຫລອດໄປຮອດເຊັ່ນລູກເຊັ່ນຫລານ.
ໃນໂອກາດດັ່ງກ່າວ, ທ່ານ ຈູມມາລີ ໄຊຍະສອນ
ພ້ອມຄະນະ ຍັງໄດ້ໄປຢ້ຽມຢາມ ແລະ ພົບປະໂອ້ລົມປະຊາຊົນບ້ານສະນອດ ເຊິ່ງເປັນບ້ານຫັດຖະກຳຈັກສານໄມ້ປ່ອງເປັນສິນຄ້າຕື່ມອີກ.
No comments:
Post a Comment